Жугьдариз 1 - Гирами Китаб

Аллагь Чан Балин мелзналан улхури гъахьну

¹ Гъушу вахтари гизаф ражари ва гьар жюрейиинди Аллагь пайгъамбрариланмина ихь абйирихъди улхури гъахьну.

² Хъа гьаму аьхиримжи вахтари Аллагь адмийирихъди Чан Балин мелзналан улхури гъахьну. Дугъу Думу вари Чан хилиъ бисуз Улупнайир ву. Дугъу Гьадгъуланмина вари завар-жилар арайиз гъахну.

³ Бай – Аллагьдин ад атӀабгурайи Нур ву. Думу Аллагьдин аллагьвал ву. Дугъу, Бали, Чан кьудратлу гафниинди дюнʼя, ккададабхъуз гъидритди, дебккна. Думу, ихь гунгьар марцц дапӀну, аьршариъ ВаритӀанзаанурин арччул хилихъинди деъна.

Иса Месигь вари малайикартӀанна зиина ву

⁴ Малайикарин аьхювалтӀан Иса Месигьдиз дурубкьнайи аьхювал фукьан зиина вуш, малайикартӀан Думура гьадмукьан зиина ву.

⁵ Аллагьди фуну малайикдиз ва фила гьамци гъапну: «Уву Йиз Бай вува. Гъи Узу Яв Адаш гъахьунза»? Ясана: «Узу Дугъан Адаш хьидиза, хъа Думу Йиз Бай хьиди»?

⁶ Чан Сарпир, дюнʼяйиъ аъри, Аллагьди кӀура: „Гъит Аллагьдин вари малайикари Мугъаз икрам апӀри“.

⁷ Малайикарикан дупна: „Чан малайикарикан Дугъу микӀар апӀуру ва Чан лукӀарикан – цӀин мелзар“.

⁸ Хъа Дугъу Чан Балкан гьамци кӀура: «Жан Аллагь! Яв Паччагьвалин тахт гьаммишандиз вуяв, гьякьʼвал – Яв Паччагьлугъдин паччагьвалин маргъ вуяв.

⁹ Увуз дюзвал ккун гъабхьунвуз, хъа нягьякьвал – даккун, гьаддиз, жан Аллагь, Яв Аллагьди Уву имбудартӀан заан гъапӀну, кӀулкан кдатру ччимси, Учвʼин шадвал улубзну».

¹⁰ Ва, гьамци, Балканра дибикӀна: „Жан Агъа! ВаритӀан улихь Уву дюнʼя арайиз хуз бин ккивунва, гьаци аьршарра Яв хиларин ляхин ву.

¹¹ Жилна аьршар ккадахьиди, хъа Уву гьаммишан гъуздива. Дурар, палтарси, йирси духьну, гъюдучӀвиди.

¹² Ва Уву дурар, сарун лазим дару валжагъси, дидиржну гьадагъидива. Хъа, палатси, дурар цӀийидарихьди гьюдюхидива. Аммаки Уву дигиш Шлур дарва, ва Яв яшарин аьхир айиб дар!“

¹³ Малайикарикан шлиз ва фила гьамци дупна: „Узу Яв вари душмнар Яв ликарикк духну ккахьайизкьан, Йиз арччул хилихъинди деъну гъуз?“

¹⁴ Малайикар уьрхювал рубкьуз ккайидарин гъайгъушнаъ хьуз гьаънайи рюгьяр даринхъа?