Юнус 3 - Гирами Китаб

Юнус Ниневияйиъ

¹ Юнусдиз РАББИЙИН гаф хъанара гъюру:

² – Гьамусяаьт Ниневия кӀуру зурба шагьриз гъарах ва душваъ дурариз Узу амур гъапӀубдикан кидибт.

³ Юнус, гьадмусяаьт РАББИЙИ гъаписи, Ниневияйиз гъушну. Ниневия зурба аьхю шагьур вуйи, дидлан илдицури, шубуд йигъ гъябгъюйи.

⁴ Ва Юнус йигъандин арайиъ, гьамци кӀури, чахьан шлубкьан лицуз хъюгъну: – ЯгъчӀвур йигълан Ниневия ккадабхъиди!

⁵ Ниневиялуйир Аллагьдин гафнахъ хъугъну. БицӀидарилан аьхюдариина, варидари ушвар дисуз хъюгъну, ва, швумалвалин лишан вуди, ирин палат алабхьну.

⁶ Думу гаф Ниневияйин паччагьдихьнара гъурубкьган, паччагьра, чан тахтналан улдучӀвну, паччагьдин палат илдибтну, ирин палат алабхьну, рюкъдиин деъну,

⁷ ва паччагьдинна паччагьлугъдин гъуллугъчйирин терефнаан Ниневияйиъ гьамциб буйругъ апӀуз гъитну: «Я инсанари, я чӀатху я жвилли мал-гъарайи, фукӀа дирипӀри, дурубхъри, чӀурариъ даришри,

⁸ ва ирин палат али инсанарина мал-гъарайи, Аллагьдиз ижмиди ккарагри. Гъит гьарсар кас писвал апӀбан ва инсафсузвалин рякъхъан хъадакри.

⁹ Шлиз аьгъя, белки, Аллагьди чан кьаст дигиш апӀур ва чан убхьурайи хъял ухьʼина гъюз гъидритур ва ухьу чӀивиди гъузур».

¹⁰ Ва Аллагьдиз дурарин ляхнар дяркъну, дурар чӀуру рякъʼан удучӀвуб аьгъю гъабхьну дурарин язухъ дапӀну, дурар Чав улупу кьазайиккан азад гъапӀну.