Юнус 2 - Гирами Китаб

Юнус ккарагуб

¹ РАББИЙИ, гьапӀну, аьхю балугъихьди Юнус хътӀюкьюз гъитнийи; ва Юнус шубуд йигъанна шубуд йишван аьхю балугъин фуниъ гъузу.

² Юнусди, дидин фунʼан чан РАББИ Аллагьдиз ккарагури,

³ гьамци гъапи: – Хажалатнаъ, я РАББИ, Увухьна илтӀикӀунза, ва Уву узуз жаваб тувунва; гъачӀидарин дюнʼяйиан гьарай гъапӀза, ва Увуз йиз дих гъеебхьвуз.

⁴ Узу дегьнайиз, гьюлин кӀваз гатӀахьунва, штун гъатари кьялаъ тӀаънайзу, вари Яв штар, вари Яв лепйир йиз зиълантина гъягъюйи.

⁵ Ва фикир гъапӀунза: узу Яв уларихьан марцц дапӀна, амма узуз Яв Гирами хал хъана рябкъидизуз.

⁶ Шид дюдеригъна дуфнайиз, кӀан ккадрушваригъ гъяхъназу; гьюлин укӀар-шуршмар кӀуллан илдижнайиз.

⁷ Дагъларин ччиварихьнакьан гьюлин дегьнйириз ис гъахьунза, жили гьаргандиз чан рякъяр хъяркьюнзуз. Амма Уву, йиз РАББИ, йиз Аллагь, йиз жан накьвдиан адабгъунва!

⁸ Йиз рюгь аьзабнаъ ади, ил улдубтӀурайиган, РАББИ кӀваин гъапӀунза, ва йиз ккарагуб Увухьна, Яв Гирами хулаз гъурубкьну.

⁹ КучӀлин ужуз аллагьариз гьюрмат апӀурайидари чпиз гъапӀу рягьим кӀваълан гьапӀнийи,

¹⁰ хъа узу тярифнан гафниинди Увуз гъурбан апӀурза: туву гаф тамам апӀурза. Инсан уьрхювал РАББИЙИН ихтиярнаъ а!

¹¹ Амур гъапну РАББИЙИ балугъиз, ва диди Юнус чан айтӀан къураматдиинди идитну.