Юнус 1 - Гирами Китаб

Юнус РАББИЙИХЪ хъпехъундар

¹ Саб ражари Амиттайин бай Юнусдиз РАББИЙИН гаф гъюру:

² – Гьамусяаьт Ниневия кӀуру зурба шагьриз гъарах, душван агьалйириз Узу амур гъапӀубдикан кидибт, фицики дурарин пис ляхнарикан Узухьна хабар дуфна.

³ Амма Юнусдиз РАББИЙИХЬАН гьадмусяаьт Таршишдиз гьергуз ккун гъабхьну. Думу, Яффайиз душну, Таршишдиз гъябгъру гими дабгну, чахьан рубкьру гьякъи тувну, РАББИЙИХЬАН Таршишдиз гьергбан бадали, дидиъ эъну.

⁴ Хъа РАББИЙИ гьациб микӀ гъитӀибккнуки – гьюлʼина, гими гьамус-хъа уьбгъюр, кӀурусиб тӀурфан гъудубжвнийи.

⁵ Гимичйириз гучӀ гъабхьи, гьарсар чан аллагьдиз ккарагуз ва, гими пчӀу хьпан бадали, дидиъ айи шейʼар гьюлиз гатӀахьуз хъюгъю; хъа Юнус кӀуруш, гимийин сабуну хулаз ктучӀвну, дахъну, дерин нивкӀуз гъушнийи.

⁶ Юнусдихьна гимийин аьхюр гъафну ва гъапну: – Уву гьаз даахнава? Гъудужв, увура яв аллагьдиз ккараг; белки, дугъан ухьу кӀваин шул, ва ухьу чӀивиди гъузур.

⁷ Хъа гимичйири сари-сариз гъапну: – Гъачай, му кьаза ухьʼина фуж себеб вуди гъафнуш, аьгъю апӀуз, тупут ипурхьа. Тупут ипнийи – ва Юнусдиин алабхъу.

⁸ Думуган дурари дугъаз гъапну: – Шлин кӀуллантина учʼина му кьаза гъафнуш! Уву наънан гъафир вуш, йип. Яв кеспи-пише фу вуяв? Фуну уьлкейиан, фуну халкьдикан вува?

⁹ Ва дугъу дурариз жаваб тувру: – Узу жугьуд вуза, гьюлна къурамат яратмиш гъапӀу Заварин РАББИ вуйи Аллагьдихьан гучӀ айир вуза.

¹⁰ Юнусди инсанариз, РАББИЙИХЬАН гьерграйир вуза, гъапиган, дурарик аьхю гучӀ ва гъалабулугъ кабхъу, ва дурари дугъаз гъапну: – Уву мици гьаз гъапӀунва?

¹¹ Ва гъапну дурари: – Гьамус гьюл яваш хьпан бадали, учу увкан гьапӀну ккунду? Лигру гьялариан, гьюл гьич яваш хьуз ккадайи.

¹² Думуган Юнусди дурариз гъапну: – Дидисну, узу гьюлизди гатӀахьай ва гьюл ичв улихь яваш хьибди, аьгъязуз, диди му тӀурфан йиз кӀуллантина ккебгъуб ву.

¹³ Хъа гимичйири кӀуруш, къураматдиина ухди хъуркьбан бадали, гими хъапӀру кьасйирин гьяракат шлубкьан артухъ апӀурайи, амма зегьметар дав вуйи – дици апӀбахъ, гьюлин тӀурфан, аьксина вуди, гужал шуйи.

¹⁴ Мици шули гъябкъган, дурар РАББИЙИХЬИНДИ илтӀикӀну: – Увуз миннат, РАББИ! Гьаму касдин кӀуллантина учура йихуз мигъитан! Учу тахсир ктру му кас гъакӀиш, учуз жаза мутувана. Уву, РАББИ, Увуз ккуниб апӀрур вува.

¹⁵ Хъа дурари Юнус, дидисну, гьюлизди гатӀахьну, ва гьюлин тюнтвал яваш шулу.

¹⁶ Дурариз РАББИЙИХЬАН аьхю гучӀ гъабхьну, дурари РАББИЙИЗ гъурбанар гъапӀну ва хъана апӀуз гаф тувну.