Югьандин-3 1 - Гирами Китаб

¹ Яшлу аьхюрихьан – узуз гьякьвалиъди ккун гъахьи, йиз багьа вуйи дуст Гайдиз.

² Йиз масан дуст, увуз варибдиъ хъуркьувалар ва мюгькам сагъвал хьпан бадали ккарагураза, хъа уву Рюгьниинди сагъ вуйивал узуз аьгъязуз.

³ Гьамина гъафи гъардшари увкан, гьякьвализ яв аьгьтлу вуйиваликан ва яв дугъри уьмрикан ктибтиган, узу гизаф шад гъахьунза.

⁴ Узуз йиз веледар гьякь рякъюъди гъярайиваликан ебхьубтӀан артухъ жара шад хабар адарзуз.

Пешкеш ва тягьна

⁵ Йиз масан дуст, уву гъардшарихъ зигурайи зегьметну, гьеле дурарин арайиъ мушвʼан дарудар ашра, яв дугъриваликан кӀура.

⁶ Гъардшари яв масанваликан хъугънайидарин жямяаьтдин улихь ктибтнийи. Уву ужуб ляхин апӀидийва, эгер дурарихьди чпин рякъ давам апӀуз Аллагьдиз лайикь вуйи рякъʼин алаънийиш.

⁷ Дурар Месигьдин ччвур бадали рякъюъ учӀвна, ва хътругърударихьан фукӀара кьабул гъапӀундар.

⁸ Гьаци вуйиган, гьацдар касариз, гьякьвалин гъуллугънаъ хьпан бадали, ухьу хил гьачӀабккну ккунду.

⁹ Узу хъугърударин жямяаьтдиз кагъаз гъибикӀунза, хъа дурарин аьхюр хьуз ккуни Диотрефди, учу кӀурайиб кьабул апӀурадар.

¹⁰ Гьаддиз, эгер узу гъафиш, дугъу гьапӀраш, ктибтидиза. Дугъу кьутӀкьли гафариинди учук тахсрар кирчра, аммаки мидканра дугъаз гьубкӀрадар. Дугъу ихь гъардшар хяларди кьабул апӀурадар ва апӀуз ккунидарихьди гъитрадар, дурар хъугърударин жямяаьтлугъдианра кмиди утӀурккура!

¹¹ Багьа вуйи дуст, писвалихьна магьачӀаккан, хъа – ужувлахьна. Ужувлан ляхнар апӀрур Аллагьдинур ву. Шли чӀурувал апӀураш, думу зат Аллагь аьгъю гъахьир дар.

¹² Деметрикан варидари, гьякь рякъʼин аливаликанра, ужуйи кӀура. Гьацдар гафар дугъкан учура кӀурача, хъа ич шагьидвал, увуз аьгъюганси, гьякь вуйич.

¹³ Хъана гизафубдикан узхьан увуз ктибтуз шуйзухьан, хъа кьалмииндина чернилиинди дици апӀуз ккундарзуз.

¹⁴ Багарихьди уву машна-машди рякъюр кӀури умуд кайиз, ва гьадмуган гафар апӀидихьа.

¹⁵ Саламат ишриву. Вари дустари увуз саламар хътаура. Увура, ччвурар дидисну, вари дустариз саламар йип.