Югьандин-2 1 - Гирами Китаб

¹ Яшлу аьхюрихьан – Аллагьди кадагънайи агъа-ханумдиз – хъугърударин жямяаьтдиз ва дугъан бицӀидариз. Узу учву вари гьякьвалиъди ккун гъапӀунзачву. Гьацира, гьякьвалин гъавриъ ахъу вариди учву ккун гъапӀну,

² фицики ухьуъ гьякьвал яшамиш шула. Му гьякьвал ухьухъди гьаммишандиз хъайиб ву.

³ Учвуз Аллагь Адашдихьан ва Дугъан Бай Иса Месигьдихьан гьякьвалиъди ва масанвалиъди ужʼвал, рягьимлувал ва мясляаьт ибшричвуз.

Масанваликан насигьят

⁴ Яв саб кьадар бицӀидар, ихь Адашди табшурмиш дапӀнайиганси, гьякьвалин рякъюъди гъягъюри гъяркъган, гизаф шад гъахьунза.

⁵ Хъа магьа гьамус узу, багьалу вуйи агъа-ханум, саб ккун апӀураза (му насигьят цӀийиб даршра, сифте бинайианмина ухьуз тувнайиб ву): гъач, сари-сар масанди дисурхьа!

⁶ Масанвал магьа гьаму ву: ухьу Аллагьдин табшуругъарихъди яшамиш духьну ккунду. Му табшуругъ учвуз сифте бинайиан деебхьнайиб ву, ва гьаддихъди яшамишра духьну ккунду.

Месигьдиз аьгьтлуди гъузай

⁷ Ихь арайиан дюнʼяйиз гизаф кучӀляхяр душна. Дурари Иса Месигь, инсан духьну, жилиина гъювал кьабул апӀурадар. Дицир адми кучӀлях ва Месигьдиз къаршур ву.

⁸ Лигай гьа, учву фу бадали гъилихнуш, гьадму ичв дубгруси дарибшри гьа, хъа ичв пешкеш гьубкӀну учвухьна рубкьруганси апӀинай.

⁹ Месигьдин аьгъювалар чӀюргъруриз ва дурар тамам дарапӀруриз Аллагь аьгъдар. Хъа Месигьдин аьгъювалар тамам апӀруриз Адашра, Байра аьгъя.

¹⁰ Гьамцдар аьгъювалар хьади дяргърур гьич зат кьабул мапӀанай, я ичв хулаз гъюз мигъитанай, я дугъаз салам мутуванай.

¹¹ Гьацир кьабул апӀрур дугъан чӀуру ляхнарик ктикьура.

¹² Узуз хъана гизафубдикан учвуз бикӀуб лазим вуйи, хъа узу кагъзииндина чернилиинди бикӀуб ужу вуди гьисаб апӀурадарза. Мидин ерина, учвухъди машна-машди улхбан бадали ва ихь шадвал гьубкӀуб хьпан бадали, багарихьди учву рякъюр пну, умуд кайиз.

¹³ Аллагьди кадагънайи яв чуччун веледари саламар хътаура.