Югьандин-1 4 - Гирами Китаб

Гьякьвалин ва кучӀлин рюгь

¹ Йиз ккунидар, фунуб рюгьнахъ вушра, яна адмийихъ мехъебехъанай. Хъа дурар Аллагьдихьан вуйин – дарин, гьарган ахтармиш апӀури йихьай, фицики дюнʼяйиз бегьем кучӀлин пайгъамбрар ачмиш духьна.

² Магьа фици Аллагьдихьан вуйи Рюгь аьгъю апӀуз шулуш: Иса Месигь Аллагьдихьан жилиина инсандин суратнаъди гъафну, кӀуру гьарсар рюгь Аллагьдихьан вуйир ву.

³ Хъа Иса кьабул дарапӀру рюгь – думу Аллагьдихьан вуйир дар. Мицдари Месигьдиз Къаршур рази ктаура. Къаршур гъиди, кӀури, учвуз деебхьнайчвуз ва магьа думу сарун му дюнʼяйиъ а.

⁴ Йиз веледар, учву Аллагьдиндар вучва, кучӀлин пайгъамбрариин гъалиб духьначва, гьаз гъапиш, учвуъ айи Аллагь му дюнʼяйин эйсивал апӀурайиртӀан кьудратлу ву.

⁵ Ари гьадрар – му дюнʼяйиндар ву. Гьаддиз дурари кӀурайибра гьаму дюнʼяйикан ву ва дюнʼяйиндар гьадрарихъ хъпехъурира ву.

⁶ Хъа ухьу Аллагьдиндар вухьа ва шлиз Аллагь аьгъяш, думу ухьухъ хъпехъуру. Хъа фуж Аллагьдинур дарш, ухьухъ хъпехъидар. Магьа гьамци ухьхьан гьякьвал хру Рюгь кучӀлин рюгьнахьан жара апӀуз шулу.

Аллагьдин масанвал

⁷ Багьалу вуйи дустар, гъачай чиб-чпи ккун апӀухьа, гьаз гъапиш масанвал Аллагьдихьан гъюрайиб ву. Масанвал айи гьарсар касди гьаци апӀуру, гьаз гъапиш думу Аллагьдин веледарикан сар гъахьну ва Аллагь дугъаз аьгъя.

⁸ Шлиъ ккунивал адарш, дугъаз Аллагь аьгъдар, фицики Аллагь Учв масанвал ву.

⁹ Магьа фици Аллагьди Чан масанвал ухьухьна улупнуш: Дугъу Чан айина-адру сар Бай, Гьадгъулантина ухьуз гьаргандин уьмур хьпан бадали, гьаму дюнʼяйиз гьаъну.

¹⁰ Дугъри вуйи ккунивал, ухьу Аллагь ккун гъапӀну кӀури, гьаддиъ адар, хъа Аллагьди Чав ухьу ккун гъапӀну ва Чан Бай ухьу гъапӀу гунгьарихъанди гъурбан хьуз гьаъну – магьа гьякь вуйи ккунивал.

¹¹ Йиз ккунидар, Аллагьдиз ухьу масанди вуйиган, ухьура чиб-чпи ккун дапӀну ккунду.

¹² Гьич саризра Аллагь зат гъяркъюр дар, хъа эгер ухьуз сар-сар ккундуш, Аллагь ухьуъ яшамиш шула, ва Дугъан масанвал ухьуъ гьубкӀну артмиш хьибди.

¹³ Ухьхьан, ухьу Дугъаъ ва Думу ухьуъ яшамиш шулайиб ухьухъди пай гъапӀу Гьадгъан Рюгьниинди аьгъю апӀуз шулу.

¹⁴ Му вари учуз гъябкъюнчуз ва Адашди Чан Бай дюнʼя уьбхюз гьаувалин шагьидар гъахьунча.

¹⁵ Эгер фуж Иса Аллагьдин Бай вуйивалихъ хъугъраш, гьадму касдиъ Аллагь яшамиш шула, ва учвра Аллагьдиъ гъузра.

¹⁶ Учуз Аллагьдин ухьухьна вуйи му масанвал аьгъю гъабхьунчуз, ва думу кьабул гъапӀунча. Аллагь – масанвал ву. Масанвали ацӀнайир Аллагьдиъ гъузра, ва Аллагьра гьадму касдиъ яшамиш шула.

¹⁷ Ухьуъ бегьем гъабхьи масанвалиинди, ухьхьан гъияматдин йигъ хъугъвал алди кьабул апӀуз шулу, гьаз гъапиш гьаму дюнʼяйиъ ухьу, Месигьди фици гъапӀнуш, гьаци апӀурахьа.

¹⁸ Масанвал гьич саб жюрейинра гучӀ айиб дар. ГьубкӀу масанвали гучӀ утӀубккуру. ГучӀ жазайихъди аьлакьа айиб ву, ва гучӀруриз бегьем гьубкӀу масанвал адар.

¹⁹ Аллагьди ухьу сифте ккун дапӀнайиган, ухьура Думу ккун апӀурахьа.

²⁰ «Узуз Аллагь ккундузуз» кӀуруриз чан гъардаш даккунди вуш, думу кучӀлях ву, гьаз гъапиш, улариз рякъюрайи чан гъардаш даккнирихьан, улариз дярякърайи Аллагь ккун апӀуз даршул!

²¹ Месигьди учуз гьамциб насигьят тувунчуз: Аллагь ккунири чан гъардашра ккун дапӀну ккунду.