Югьандин-1 3 - Гирами Китаб

¹ Ихь Адашди ухьуз Чан – Аллагьдин веледар пубʼинди фукьан зурба вуйи масанвал улупнуш, учву фикир апӀинай. Ухьу гьаци хьузра вухьа! Му дюнʼяйиндари ухьу кьабул апӀурадар, гьаз гъапиш дурари Думу кьабул гъапӀундар.

² Йиз ккунидар, гьаму ражари ухьу Аллагьдин веледар вухьа, хъа гъюру вахтари ухькан фужар шулуш, сабан мялум дар. Саб аьгъяхьуз, Иса Месигь хъана жилариина гъафиган, ухьу Гьадгъаз ухшар хьидихьа, фицики Думу Учв фицир вуш, гьацирди рякъидихьуз!

³ Ва шли чан миж Гьадгъак кивраш, дугъу, марцци Месигьдиз ухшар вуди, чан уьмурра марцц апӀура.

⁴ Шли гунагь апӀураш, дугъу законсузвал апӀура, фицики гунагь – законсузвал ву.

⁵ Учвуз аьгъюганси, Месигь инсанарин гунгьар Чаина гъадагъуз Гъафир ву. Дугъак гунагь ктар.

⁶ Дугъахъди яшамиш шлу гьич сарира гунагь апӀидар. Хъа гунагь апӀуб давам апӀурайириз Думу я гъяркъюндар, я аьгъю гъахьундар.

⁷ Багьалу вуйи веледар, лигайки, учву гьякь рякъхъан хътаърударин кучӀларихъ мехъебехъанай. Гьякьʼвали тӀалаб апӀурайиси апӀрур Месигьси гьякь кас ву.

⁸ Гунгьар апӀрур иблисдинур ву, фицики иблисдира, чан сифте бинайианмина гунгьар апӀуйи. Аллагьдин Бай жилариина магьа гьамциб метлеб ади гъафир ву: иблисдин тӀулар терг апӀуз.

⁹ Аллагьдин веледар гъахьидарикан гьич сарира гунгьар давам апӀдар, гьаз гъапиш дицир касдиъ Аллагьдин тум а. Гьаддиз дицирихьан гунагь тӀулар апӀури гъузуз шулдар, гьаз гъапиш думура Аллагьдин веледарикан сар духьна.

¹⁰ Фуж – Аллагьдин, хъа фуж иблисдин велед вуш, магьа гьамци аьгъю апӀуз шулвухьан: гьякьвалиинди дарапӀрур ва чан гъардаш даккнир Аллагьдихьан дар.

Сари-сар ккун апӀинай

¹¹ Магьа учвуз сифте бинайиан деебхьнайи гаф: сар-сарихьна масанди йихьай.

¹² Ухьу иблисдин тереф дибисну, чан чве йивну гъакӀи Каиндиз ухшар духьну ккундар. Дугъу думу гьаз гъакӀну? Гьаз гъапиш дугъан ляхнар писдар вуйи, хъа чан чвуччвун – ужудар.

¹³ Чвйир, мюгьтал махьанай, эгер учву му дюнʼяйиз ккундарш.

¹⁴ Ухьуз аьгъяхьуз ухьу аьжалнахьан гьаргандин уьмрихьна дуфнайиб, фицики ухьуз ихь гъардшар ккундухьуз. Хъа шлиз ккундарш, думу, чан дукӀнайир, дукӀну гъузди.

¹⁵ Гьарсар, чан гъардаш даккнир, адми йивну гъачӀир гьисаб ву, хъа учвуз аьгъячвуз, адми йивну гъакӀириз гьаргандин уьмур даршлуб.

¹⁶ Масанвал фу вуш, ухьуз, магьа, наънан аьгъяш: Месигьди ухьхъанди Чан уьмур тувну. Ухьура гьаци ихь гъардшарихъанди ихь уьмрар тувну ккунду.

¹⁷ Эгер шли, девлет ади, хъа чан гъардаш аьжузди яшамиш шулайиб рябкъюри, кюмек апӀдарш, дицириъ Аллагьдин масанвал фици шул?

¹⁸ Йиз веледар, ихь ккунивал садар гафарииндина улхбариинди дубхьну ккундар, хъа – ляхниинди, ва якьин вуйиб дубхьну ккунду.

^19-20 Ухьу гьякьвалин рякъюъ айиб гьамци аьгъю шулу: гьеле ихь намус сикинди даршра, ухьхьан Аллагьдин улихь архаинди хьуз шулухьхьан, фицики Аллагь ихь намустӀан артухъ ву ва Дугъаз вари аьгъя.

²¹ Йиз ккунидар, эгер ихь намус сикинди вуш, ухьхьан гучӀ адарди Аллагьдиз багахь хьуз шулухьхьан.

²² Гьаддиз Аллагьди, Чаз ккарагну Чакан фу тӀалаб гъапӀиш, гьадму тамам апӀурухьуз, фицики Дугъан табшуругъарихъди гъярахьа, ва Дугъаз ккуни ляхнар апӀурахьа.

²³ Магьа ухьуз Аллагьди фициб табшуругъ дебккнаш: ухьу Дугъан Бай – Иса Месигьдихъ хъугъну ккунду, ва Исайи ухьуз табшурмиш гъапӀиганси, ухьу сари-сар ккун дапӀну ккунду.

²⁴ Шли Аллагьдин табшуругъар тамам апӀураш, гьадму кас Аллагьдиъ яшамиш шула ва гьадму касдиъ Аллагь яшамиш шула. Наънан аьгъяхъа ухьуз, ухьуъ Аллагь яшамиш шулайиб? – Дугъу ухьуз багъиш гъапӀу Рюгьналанмина аьгъяхьуз.