Югьандин-1 1 - Гирами Китаб

Иса Месигь – уьмрин гаф

¹ Дюнʼя ккебгъхъанмина Айирикан, учуз Гъеебхьурикан, ич улариинди учуз Гъяркъюрикан, учу лигури Гъахьирикан, учу ич хилариинди кучри Гъахьирикан, яна уьмрин Гафнакан – Исайикан учу ктибтурача.

² Му вари – учуз гъябкъюнчуз, мидин шагьидар – учу вуча. Му – учуз гъяркъю уьмрин Гаф, Адаш Аллагьдихь хьайи. Дугъу Думу учуз улупну ва учу учвуз мидкан хабар дебккрача.

³ Учуз гъябкъюбдикан ва гъеебхьубдикан, гьамус учвура учук ктикьбан бадали, учвуз хабар дебккрача. Хъа учу Адаш Аллагьдик ва Дугъан Бай Иса Месигьдик кидикьнайидар вуча.

⁴ Учу му, учуз гьубкӀу шадвал хьпан бадали, бикӀурача.

Аквнаъди гъягъюб

⁵ Магьа учуз Аллагьдикан гьамциб хабар гъеебхьунчуз: «Аллагь – акв ву. Дугъаъ гьич саб жюрейин мучӀушин адар».

⁶ Эгер ухьу, Дугъак ктикьунхьа кӀураш, хъа мучӀувалиъди гъяраш, ухьу кучӀлар апӀурахьа ва гьякьвалиъди яшамиш шуладархьа.

⁷ Эгер, Аллагь аквнаъ айиси, ухьура аквнаъди яшамиш шулаш, ихь арайиъ аьлакьйирра хьиди, ва ихь гьарсаб гунагьнахьан Дугъан Балин – Исайин ифди марцц апӀура.

⁸ Эгер ухьу, гунагь ктарчук кӀураш, ухьу ухьуз кучӀлар апӀурахьа ва ухьуъ гьякьвал адар.

⁹ Эгер ухьу ачухъди ихь гунгьар кӀулʼин дисуруш, Дугъу, Гьякьлури, хъугъвал Алири, ихь гунгьарилан хил алдабгъиди ва ихь гьарсаб гьякьсузвалихьан ухьу марцц апӀиди.

¹⁰ Хъа эгер ухьу, гунгьар гъапӀундархьа кӀураш, ухьу Аллагь кучӀлях вуйирси дерккрахьа ва Дугъан Гаф кьабул апӀурадархьа.