Югьан 8 - Гирами Китаб

«Гунагь ктрури дугъʼина гъван гатӀабхьри»

¹ Хъа, Иса Елион дагъдиина гъягъюру.

² ГвачӀнин ухди Думу хъана Аллагьдин хулаъ ачмиш шулу. Дугъан багахь халкь уч хьуз хъюгъру ва Исайи, деъну, аьгъювалар улупуру.

³ Гьадму вахтна Къанундин мялимарина фарисйири Исайихьна, кьяппавал апӀури гъидису дишагьли хуру ва думу халкьдин улихь дерккну,

⁴ дурари Исайиз кӀуру: – Мялим! Гьаму дишагьли кьяппавал апӀурайи вахтна дидиснайир ву. Му чан жилирихъди дарди, жарарихъди хъайи.

⁵ Мусайи чан Къанундиъ мицисдариин гъван уьлюбх дупна. Хъа Уву фу кӀурава?

⁶ Му, Иса ахтармиш апӀбан ва Дугъак тахсир кипбан бадали, саб багьна абгуз ккунди гьерхрайиб вуйи. Амма Исайи, ис алахъну, дурариз саб фикирра тутрувди, тӀубʼинди жилиин фу-вуш бикӀури гъахьну.

⁷ Исайи Чахьан гьерхри хътадакрайиган, кӀул за дапӀну, дурариз кӀуру: – Учвкан шли затра гунагь гъапӀундарш, гъит гьадгъу сарпирди му дишагьлийиина гъван гатӀабхьри!

⁸ Ва хъана, Чан кӀул ис дапӀну, жилиин бикӀувал давам апӀуру.

⁹ Му гафар гъеерхьиган, аьхюдарилан хъюгъну, душвʼин алидар са-сарди гьудучӀвну гъягъюру ва аьхириъ Исана гьадму дишагьли гъузру.

¹⁰ КӀул за дапӀну, Исайи дугъхьан гьерхру: – Эй дишагьли, увук тахсир кипрайидар наши? Уву сарикьан тахсиркар гъапӀундарин?

¹¹ – Сарикьанра, йиз аьхю кас, – пну, жаваб туву дугъу. – Узура уву тахсир апӀурадарза; гъарах ва сану гунагь ляхнар мапӀан, – гъапи Исайи.

«Узу аьгъяйиш, Йиз Адашра аьгъю шуйчвуз»

¹² Кьандиси халкьдихъди Иса хъана улхуру: – Узу му дюнʼяйиз акв вуза. Фуж Узухъди гъахьиш, дицир мучӀушнаъ улдугну хьидар, дицирихъди уьмрин акв хьибди.

¹³ – Уву Яв Увкан шагьидвал апӀурава, – кӀуру фарисйири. – Яв шагьидвал гьякьюб дар.

¹⁴ Исайи жаваб тувру: – Эгена Узу Йиз Узкан шагьидвал апӀури удучӀвураш, Йиз гафарихъ хъугъуз хай шулу, фицики Узуз аьгъязуз Узу наънан гъафнуш ва наана гъягъюраш. Хъа учвуз, Узу наънан гъафнуш ва наана гъягъюраш, аьгъдарчвуз.

¹⁵ Учву сар-сарин, инсанарин уьлчмейиинди суд апӀурачва, хъа Узу саринра суд апӀурадарза.

¹⁶ Эгерки Узу ичв суд апӀуйишра, Йиз суд гьякьюб хьибдийи, фицики Узу сар дарза, Узухъди Узу гьау Адашра хъазухъ.

¹⁷ Хъа ичв Къанундиъра, кьюр касдин шагьидвалихъ хъугъуз хай шул, кӀури дибикӀнавучв.

¹⁸ Учу кьюр шагьид вуча: Узу ва Узу гьау Адаш.

¹⁹ – Хъа Яв Адаш наан аяв? – гьерху дурари. – Учвуз я Узу, я Йиз Адаш аьгъдарчвуз, – гъапи Исайи. – Эгер учвуз Узу аьгъяйиш, Йиз Адашра аьгъю шуйчвуз.

²⁰ Му гафариинди Исайи, Аллагьдин хулан гьяятдиъ, садакьйир иврушван гъвалахъ дийигъну, аьгъювалар улупури, гъапнийи. Гьаци вушра Думу сарира гъидисундайи, гьаз гъапиш Дугъан сяаьт сабан улубкьнадайи.

Жугьдар Исайин гъавриъ ахърадар

²¹ Ва хъана Исайи гъапнийи: – Багарихьди Узу гъягъюраза. Учву Узу агуз хъюгъдичва, аммаки ичв гунгьариъди йихидичву. Узу гъушушваз, учвхьан гъюз хьибдар.

²² – «Узу гъушушваз учвхьан гъюз хьибдар», – гъапиган, Мугъан фу кӀуру гаф вуйкӀан? – кӀурайи жугьдари чиб-чпигъ. – Дугъаз Учв йикӀуз ккундайкӀан дарш?

²³ Исайи гъапи: – Учву исккан вуйи дюнʼяйиан вучва, хъа Узу заълан вуза. Учву гьаму дюнʼяйиан вучва, хъа Узу му дюнʼяйиан дарза.

²⁴ Узу учвуз гъапунзачвуз: «Гунгьариъди йихидичву!» Узу Гьарганур Аллагь вуйибдихъ эгер учву хътругъиш, учву вари гунгьариъди йихидичву!

²⁵ – Гьаци вуйиган Уву Фуж вува? – гьерхру дурари. – Узу учвуз гьарган бинайиан кӀурайи Гьадмунур вуза, – жаваб туву Исайи. –

²⁶ Учвкан, Узхьан гизафдар пуз ва ичв суд апӀуз шуйзухьан. Амма Узу, гьаму дюнʼяйиз Узу Гьаурихьан фу гъеебхьнуш, анжагъ гьадму кӀураза, хъа Узу Гьаур гьякьлу ву.

²⁷ Дугъу Чан Адашдикан кӀурайибдин дурар гъавриъ ахъундайи.

²⁸ Исайи давам гъапӀу: – Учву Инсаниятдин Бай за гъапӀиган, гьадмуган аьгъю хьибдичвуз, Узу Гьарганур вуйиб, ва Узу Йиз Узлан фукӀара дарапӀруб: Узу анжагъ Адашди улупуб кӀураза.

²⁹ Хъа Узу Гьаур Узухьди хьа – Дугъу Узу сарди гъитнадар, фицики Узу гьарган Дугъаз ккуниб апӀураза.

³⁰ Гьаму гафарилантина Дугъахъ гизафдар хъугънийи.

Исайи гунгьариккан азад хьуваликан пуб

³¹ Хъасин Исайи Чахъ хъугънайи жугьдариз гъапи: – Эгер учву Йиз Гаф учвуъ гъюбхиш, гьякьикьи Йиз ученикар хьидичва,

³² гьадмуган учвуз гьякьвал аьгъю хьибдичвуз ва диди учву азад апӀиди.

³³ – Учу Ибрагьимдин наслар вуча ва саб вахтнара саризра лукӀар гъашидар дарча! – гъапнийи дурари. – «Азад хьидичва» кӀуруган, гьамдиинди Увуз фу пуз ккунди авуз?

³⁴ Исайи дурариз жаваб туву: – Гьякьлу вуйи гьякь кӀуразачвуз: гьарсар шли гунагь апӀураш, гунагьвалин лукӀ ву.

³⁵ ЛукӀ гьарган (девлетуйин) хизандиъ яшамиш шули гъузидар, хъа бай душваъ яшамиш гьарган хьиди.

³⁶ Фила учвуз Бали азадвал тувиш, анжагъ гьадмуган учву азад адмийир хьидичва.

³⁷ Учву Ибрагьимдин тум вуйиб Узуз аьгъязуз, гьаци вушра учвуз Узу йикӀуз ккундачвуз, фицики Йиз Гаф учвуъ убчӀвнадар.

³⁸ Учвуз Йиз Адашдихь гъябкъюбдикан кӀуразачвуз, хъа учву учвуз ичв адашдикан гъеебхьуб тамам апӀурачва.

³⁹ – Ич адаш – Ибрагьим! – жаваб туву дурари. Исайи дурариз кӀуру: – Эгена учву Ибрагьимдин чан гьякь баяр вуйиш, учву Ибрагьимдиси апӀрийчва.

⁴⁰ Хъа учвуз Узу йикӀуз ккундачвуз. Чаз Аллагьдикан деебхьнайи гьякьвал учвуз улупурайи Гьадму Адми йикӀуз ккундачвуз! Гьамци гъапӀнийинхъа Ибрагьимди?!

⁴¹ Ваъ, учву ичв адашдиси апӀурачва! – Учу Къанундиинди вуйи баяр вуча! – наразивалиъ ахъу дурар. – Ич сар адаш вуйич – Аллагь!

⁴² Исайи дурариз жаваб туву: – Эгер ичв адаш Аллагь вуйиш, учвуз Узу ккунди хьидийчвуз, фицики Узу Аллагьдихьан гъафир вуза ва Гьадгъахьна гъягъюраза. Узу Узхьан дуфнадарзаки – Гьадгъу Узу гьаъну.

⁴³ Учву Йиз Гаф кьабул апӀурадарчва?

⁴⁴ Ичв адаш иблис ву, ва учву ичв адашдин интӀи тӀулар тамам апӀуз шад вучва. Хъа думу гьарган адмийир пуч апӀрур ву, ва дугъаз гьякьвал душман ву, гьаз гъапиш дугъаъ гьякьвал адар. Дугъу кучӀал апӀурайиган, кучӀал дугъан багъри чӀал ву, гьаз гъапиш думу кучӀлях ву ва кучӀларин адаш ву.

⁴⁵ Хъа Узу учвуз гьякь кӀуруган, учву Узухъ хъугърадарчва.

⁴⁶ Учвкан шлихьан Узу, гунагьвал апӀурава, кӀури, дисуз шул? Ва эгер Узу учвуз гьякь кӀураш, гьаз учву Узухъ хъугърадарчва?

⁴⁷ Фуж Аллагьдинур вуш, гьадму Аллагьдин гафарихъ хъпехъура. Учву Аллагьдин даруган, гьаддиз учву Узухъ хъпехъурадарчва.

Исайи Чакан ва Ибрагьимдикан пуб

⁴⁸ – Дюзди кӀура учухь: Уву самариялужви вува ва амрихъан душнайир вува, – гъапи Дугъаз жугьдари.

⁴⁹ Исайи жаваб туву: – Узу амрихъан душнадарза: Узу Йиз Адашдин гьюрмат уьбхюраза, хъа учву Узу нянайиз хурачва.

⁵⁰ Узу Узуз аднахъ хъергнайир дарза, Жарар а – Гьадмунур ву хъергнайир ва суд АпӀрур.

⁵¹ Гьякьлу вуйи гьякь кӀуразачвуз: шли Йиз Гаф чаъ гъюбхиш, аьсрариъ гьацириз аьжал рябкъидар.

⁵² – Магьа учуз гьамус якьинтӀан аьгъю гъабхьунчуз, Уву амрихъан душнайир вуйиб, – жаваб туву дурари. – Ибрагьим гъакӀну, пайгъамбрарра гъийихну. Хъа Уву: «Шли Йиз Гаф чаъ гъюбхиш, аьсрариъ гьацириз аьжал рябкъидар!» кӀурава.

⁵³ Дугъриданна дукӀнайи ич аба ИбрагьимтӀан Уву артухъур вуна? Ясана – гъийиху пайгъамбрартӀан? Хъа Уву Фуж вуди гьисаб апӀурава?

⁵⁴ Исайи жаваб туву: – Эгер Узу Йиз ад апӀураш, Йиз ад фукӀара дар. Хъа Узу Йиз Адашди адлу апӀура – учву ичв Аллагь вуйич КӀурайири.

⁵⁵ Учвуз Думу гьич саб вахтнара аьгъюр дайчвуз, хъа Узуз Думу аьгъязуз. Эгер Узуз Думу аьгъюр дарзуз, гъапнийиш, Узура учвусир кучӀлях вуди гъахьнухьидийи. Хъа Узуз Думу аьгъязуз ва Узу Дугъан гафниин алза.

⁵⁶ Ичв аба Ибрагьим Узу дюнʼяйиз гъюру йигъ рябкъидиз пну, шадвали ацӀру. Дугъаз му йигъ гъябкъну ва шадра гъахьну.

⁵⁷ – Яв сабан хьуцӀур йискьан дубхьнадарив, хъа Увуз Ибрагьим гъяркъюнвуз?! – чӀигъар апӀуз хъюгъю жугьдари.

⁵⁸ Исайи жаваб туву: – Гьякьлу вуйи гьякь кӀуразачвуз: Ибрагьим хьайиз Узу Айир ва Вуйир вуза.

⁵⁹ Гьадмуган дурар, Исайиз йивуз, гъванарихъан хъчӀихуру. Саки Иса гьитӀикӀуру ва гьадрарин кьялгъянтина Аллагьдин хулʼан удучӀвуру.