Югьан 5 - Гирами Китаб

Вифезда гьямамназ ккилигурайир сагъ апӀуб

¹ Дидхъан саб цӀиб вахтналан жугьдарин машквар улубкьуру ва Иса Ерусалимдиз гъягъюру.

² Ерусалимдиъ Марччарин латар кӀурушвахь, жугьуд чӀалниинди «Вифезда» (Рягьимлувалин хал) кӀуру саб кахъру гьямам хьайи. Дидихьна элеркнайи гъвандин мурхьлар ккудукьнайи хьуб дегьлиз гъюрайи.

³ Гьадму хьубиб дегьлизарра ацӀну фалиж кайидар ва майифдар ади шуйи. Дурар, фила шид ккибикьуз хъюгъруш, гьаддиз ккилигури шуйи.

⁴ Фицики Аллагьдин малайикди бязи вахтари, гъюри, шид ккибикьуйи ва, шид ккибикьхъан сифте вуди фуж учӀвиш, гьадму, чак фициб уьзур кашра, сагъ шули гъахьну.

⁵ Мушваъ сумчӀурна миржид йисан иццурайи сар кас айи.

⁶ Исайиз думу дахънади дяркъну ва хайлин вахтна иццурайиб аьгъяди, дугъхьан гьерхру: – Сагъ хьуз ккундунуз?

⁷ – Йиз аьхюр, – жаваб туву иццурайири, – ккун даршулин. Аммаки, шид ккибикьубси, штук кучӀвуз узуз кюмек апӀру адми шуладар. Хъа узу кучӀвуз хъюгъиган, узутӀан ухди душвак жарар кучӀвнади шула.

⁸ – Гъудужвну, яв ахинра гъадабгъну, гъарах, – кӀуру дугъаз Исайи.

⁹ Ва думу дишлади сагъ духьну, чан ахинра гъадабгъну, гъягъюру. Думу султ йигъ вуйи.

¹⁰ Гьаддиз жугьдарин гьюкумдрари сагъ гъаши касдиз кӀуру: – Гъи султ йигъ ву, гьаддиз Къанундиинди ахин гъабхуз ихтияр адар!

¹¹ – Узу сагъ гъапӀури: «Ахин гъадабгъну гъарах», гъапунзуз, – гъапи дугъу.

¹² – Хъа фуж ву думу Адми, увуз: «Ахин гъадабгъну, гъарах», гъапир? – гьерхру дурари.

¹³ Сагъ духьнайириз, Думу фуж вуш, аьгъдайи, фицики гьадушваъ аьхючӀвеъ халкь ади, Иса гьадраригъ рякъюри имдайи.

¹⁴ Хъасин Исайи, гьадму кас Чаз Аллагьдин хулаъ алахъиган, дугъаз гъапи: – Магьа лиг, уву сагъ гъахьунва, сарун гунагь ляхнар мапӀан, даршиш митӀан артухъ пис гьял хьибдияв.

¹⁵ Му касди гьамус душну, учв сагъ гъапӀур Иса ву, кӀури, жугьдарин гьюкумдрариз хабар дебккру.

¹⁶ Жугьдарин гьюкумдрар, Исайи му ляхин султ йигъан гъапӀну кӀури, Дугъахъ хъергуз хъюгъру.

¹⁷ Хъа Исайи дурариз жаваб тувру: – Йиз Адаш гьарган лихури шулу, Узура лихураза.

¹⁸ Жугьдарин гьюкумдрари Иса, неинки Дугъу султ йигъандин къайда гъючӀюбгъну кӀури, хъа гьацира, Аллагьдин Бай вуза, кӀури, Учв Аллагьдихъди барабар апӀурайиган, айибтӀан артухъ Думу йивну йикӀуз чпин кьаст ижми апӀуру.

Балин кьудрат

¹⁹ Исайи дурариз кӀуруки: – Гьякьлу вуйи гьякь кӀуразачвуз: сабан Чан Адашди гьапӀраш дярябкъкьан гагьди, Балхьан Чан-Чаинди фукӀара апӀуз шулдар. Адашди гьапӀраш, Балира гьадму апӀура.

²⁰ Адашдиз Бай ккунду, ва Дугъу Чав апӀурайидар вари Бализ улупура. Дугъу Бализ бегьем артухъ улупиди ва учву мегьел мюгьтал хьуз ккимичва.

²¹ Адашди гъачӀидар чӀиви апӀруси ва дурариз уьмур тувруси, гьаци Балира Чаз ккунириз уьмур тувди.

²² Адашди саринра суд апӀурадар;

²³ варидари, фици Адашдин гьюрмат уьбхюраш, гьаци Балинна гьюрмат уьбхбан бадали Дугъу вари суд апӀру гьюкум Балихьна тувна. Шли Балин гьюрмат уьбхюрадарш, гьадгъу Думу гьау Адашдинра гьюрмат уьбхюрадар.

²⁴ Гьякьлу вуйи гьякь кӀуразачвуз: шлиз Йиз Гаф ебхьураш ва фуж Узу Гьаурихъ хъугъраш, гьацири зат ккудудубкӀру уьмур гъазанмиш дапӀна, дицир суддин улихь дийигъидар. Дицир гьамустӀанра, дукӀну хьувалихьан, гьаргандин уьмриъ учӀвна.

²⁵ Гьякьлу вуйи гьякь кӀуразачвуз: вахт улубкьура – сану улубкьнура ву! – дийихнайидариз Аллагьдин Балин дих ебхьиди, ва гъеебхьдар гьаргандин уьмрихьна чӀиви хьиди.

²⁶ Фици Адаш уьмрин булагъ вуш, гьаци Байра Дугъу уьмрин булагъ гъапӀну.

²⁷ Ва Дугъу Бализ суд апӀру гьюкумра тувна, фицики Думу Инсаниятдин Бай ву.

²⁸ Учву мидʼин мюгьтал махьанай, вари накьварик кайидариз Аллагьдин Балин сес ебхьру вахт улубкьура ва накьвариан удучӀвиди.

²⁹ Фужари ужʼвал гъапӀнуш, дурар яшайишдиз чӀиви духьну удучӀвиди; фужари писвал гъапӀнуш, дицдар чпин суд апӀбан бадали удучӀвиди.

³⁰ Узхьан Йиз хусуси гьюкмиинди фукӀа апӀуз шулдарзухьан. Узу кӀураза Узуз Аллагьдихьан ебхьурайиси ва Йиз суд дишуб ву, фицики Узу Узуз ккуниб апӀурадарза, хъа Узу Гьауриз ккуниб апӀураза.

Исайикан шагьидвал

³¹ Эгер Узу Узкан адмийириз ктибтури гъашиш, дурар Узухъ хътругъубра мумкин ву.

³² Аммаки Узкан ктибтру жара Шагьид а, ва Узуз аьгъязуз, Дугъу Узкан ктибтурайиб гьякь вуйивал.

³³ Учву Ягьʼяйихьна адмийир гьаунчва, ва дугъура вари гьамрар гьякь вуйиб тасдикь гъапӀну.

³⁴ Хъа Узу адмийирин шагьидвалилан асиллу дарза: Узу му вари, учву уьрхбан бадали кӀураза.

³⁵ Ягьʼя убгури акв туврайи чирагъсир вуйи, ва учву дугъан акв шадвалиинди цӀиб вахтназтӀан кьабул гъапӀундарчва.

³⁶ Амма Узуз, Йиз гьякьнаан Ягьʼяйи гъапивалтӀан хъанара мюгькам шагьидвал азуз, фицики, Адашди Узуз апӀин дупну, Узу апӀурайи ляхнари, Узу Адашди гьаур вуйиб тасдикь апӀура.

³⁷ Гьаци Узу гьау Адашдира Узкан шагьидвал апӀура. Хъа учвуз Дугъан дих затра гъеебхьундарчвуз, ва учвуз Думу затра гъяркъюндарчвуз.

³⁸ Ва учву ичв кӀваъ Дугъан Гаф уьбхюрадарчва, фицики Дугъу гьау Узухъ хъугърадарчва.

³⁹ Учву Гирами китабар дурхну ахтармиш апӀурачва, фицики дурариан гьаргандин уьмур гъазанмиш апӀуз шулу кӀури, фикир апӀурачва, хъа Гирами китабариъ Узкан дибикӀна.

⁴⁰ Гьаци вушра, зат ккудудубкӀру уьмур учвуз хьпан бадали, учвуз Узухьна гъюз ккунди адарчвуз.

⁴¹ Узуз инсанарин тярифар лазим дарзуз.

⁴² Хъа Узуз учву аьгъюдар вузуз ва учвуъ учвуз Аллагьдихьна вуйи масанвал адрувалра аьгъязуз.

⁴³ Узу Йиз Адашдин ччвур бадали учвухьна дуфназа, хъа учву Узу кьабул апӀурадарчва, хъа эгерки сар жара фуж-вуш, чан чаинди чан тярифар апӀури учвухьна гъафиш, кьабулра апӀурчва.

⁴⁴ Учву сар-сарин тярифар апӀури, сар Аллагьдихьан вуйи тярифарихъ хъергну даршлуган, учву Узу фици кьабул апӀидичва?

⁴⁵ Узу Адашдин улихь учву тахсир апӀур, кӀури, фикир мапӀанай. Учву тахсиркрар апӀрур Муса хьиди, фицики учву гьадгъуин умудлу вучва!

⁴⁶ Эгер учву дугъридан Мусайихъ хъугърайиш, Узухъра хъугърийчва, гьаз гъапиш дугъу Узкан дибикӀна.

⁴⁷ Хъа эгер учву дугъу гъидикӀдарихъ хъугъри адарш, Йиз гафарихъ фици хъугъдичвахъа?