Югьан 4 - Гирами Китаб

Иса ва Самарияйиан вуйи дишагьли

^1-3 Фарисйириз ЯгьʼяйизтӀан Исайиз артухъди ученикар ва штуан хьуз гъюрудар айибдикан аьгъю шулу. Гьякьикьатдиъ адмийир Исайи Чав ваъ, хъа Дугъан ученикари штуан апӀури гъахьну. Мидкан аьгъю гъабшиган, Ягьудия уьлке гъибтну, Агъа хъана Галилей уьлкейиз гъягъюру.

⁴ Дугъан рякъ Самария юрднаантина вуйи.

⁵ Ва магьа Иса Самарияйиъ айи Сихар кӀуру шагьриз гъюру. Думу шагьур Якьубди чан Юсуф кӀуру бализ бахиш гъапӀу хутӀлин багахь хьайи.

⁶ Душваъ Якьубдин гъуйи айи. Рякъюъ эргу Иса гьадму гъуйдихъ деъру. Вахт лисухьна вуйи.

⁷ Дина штуз Самарияйиан сар дишагьли гъюру. – Узуз убхъруб чава, – кӀуру дугъаз Исайи.

⁸ Дугъан ученикар шагьриз ипӀруб гъадабгъуз душнайи.

⁹ – Уву, жугьудри узхьан, Самарияйиан вуйирихьан, убхъуз ужуб фици ча кӀурава? – гьерху Дугъхьан жаваб вуди дишагьлийи. Фицики жугьдар самариялуйирихъди албагну адайи.

¹⁰ Исайи жаваб туву: – Эгер увуз, Аллагьди адмийириз фу тувруш, аьгъяйиш ва, «Узуз убхъруб чава» КӀурайир Фуж вуш, аьгъяйиш, уву Узхьан шид ккун апӀидийва ва Узу увуз чӀиви шид тувдийза.

¹¹ – Я аьхю кас! – кӀуру Дугъаз дишагьлийи, – Увухь гьич бедрекьан хьадарвухь, хъа гъуйи деринуб ву. Хъа Уву дициб шид наънан гъадабгъидийва?

¹² Уву учуз му гъуйи туву ва дидʼан чавра, чан баярина мал-къарайира шид убхъури гъаши ич аба ЯкьубтӀан заанур вунахъа?

¹³ Исайи жаваб тувру: – Му шид убхъру гьарсар касдиз цӀиб арайилан хъанара убхъуз ккун хьибди.

¹⁴ Хъа узу шид тувну гъубхъур сану гьич зат харгидар. Гьаз гъапиш Узу дугъаз туву шид зат ккудудубкӀру уьмур тувру яшайишдин булагъдиз илтӀибкӀиди.

¹⁵ – Я аьхю кас! – кӀуру Дугъаз дишагьлийи, – Узуз сарун затра шид ккун даршлуганси ва мина дидиз дяргъруганси гьадму шид чава!

¹⁶ Душну яв жилирра гьамина хъади гъач, – кӀуру Исайи.

¹⁷ – Узухъ жилир хътарзухъ, – гъапи дишагьлийи. – Уву, жилир хътарзухъ кӀури, дюзди гъапива, – кӀуру Исайи дугъаз. –

¹⁸ Фицики уву хьуб ражари швувахь гъахьунва, хъа гьамусяаьтди увухъ хъайир яв жилир дар. Уву дюз гъапунва.

¹⁹ – Я аьхю кас! – кӀуру Дугъаз дишагьлийи, – Уву пайгъамбар вуди рякъюразуз.

²⁰ Ич абйир гьатму дагъдиина икрамназ гъюри гъахьну, хъа учву, жугьдари, кӀурачва, икрам апӀуз анжагъ ЕрусалимдизтӀан душну ккундар.

²¹ Исайи дугъаз кӀуру: – Хъугъ Узухъ, дишагьли, гьамус учву я му дагъдиин, я Ерусалимдиъ ихь Адашдиз икрам апӀидарчва – гьациб вахт улубкьура.

²² Учвуз, самариялуйириз, учву фтиз икрам апӀурашра, аьгъдарчвуз. Хъа учуз, жугьдариз, учу фтиз икрам апӀураш, аьгъячуз, фицики уьрхювал жугьдарихьанмина гъибди.

²³ Хъа гьациб вахт улубкьидики, ва думу улубкьузра улубкьна, халис икрам апӀрудари Адашдиз рюгьнииндина гьякьвалиинди икрам апӀиди. Ихь Адашди, иллагьки, гьамцдар икрам апӀрудар агура.

²⁴ Аллагь Рюгь ву ва гьаддиз Дугъаз икрам апӀрудари рюгьнииндина гьякьвалиинди Дугъаз икрам дапӀну ккунду.

²⁵ – Месигь дуфну ккуниваликан узуз аьгъязуз, – гъапи дишагьлийи. – Думу гъафиган, Дугъу учуз варибдикан ктибтиди.

²⁶ – Гьадму уву кӀурайи Адми увухъди улхура. Узу вуза Месигь, – кӀуру Исайи.

²⁷ Гьадму арайиъ Исайин ученикар гъюру ва, Дугъу дишагьлийихъди гафар апӀури дябкъну, дурар мюгьтал шулу. Амма сарира Дугъхьан, фу ккунди аш, вая дугъахъди гафар гьаз апӀураш, гьерхундайи.

²⁸ Дишагьлийи чан шид айи гвар гъибтну, шагьриз хъадакну, адмийириз кӀуру:

²⁹ – Узухъди гъачай ва узу йиз уьмриъ гъапӀу вари ляхнарикан ктиту Касдиз лигай. Мумкин ву Думу Месигь хьузра?

³⁰ Дурар шагьриан удучӀвну, Гьадгъахьна гъягъюру.

³¹ Хъа му вахтна ученикари Исайикан: – Я Мялим, фукӀа ипӀина, – кӀури, тӀалаб апӀурайи.

³² – Узухь гьациб хураг хьазухьки! Дидкан учвуз аьгъю хьузра аьгъдарчвуз, – гъапи Дугъу.

³³ Гьадмуган ученикари чиб-чпихьан гьерхру: «Белки Дугъаз ипӀруб шликӀа гъабхнушул-гьа?»

³⁴ Исайи дурариз кӀуру: – Йиз хураг Узу Гьаурин ният тамам апӀуб ва Дугъан ляхин ккудубкӀуб вуйиз.

³⁵ ХутӀил убзури, учву кӀури шулчва: «Юкьуб вазсана – ва иганра хъубкьди». Хъа магьа Узу учвуз кӀураза: улар арццай ва хутӀлариз лигай – дурар ургуз хъуркьна.

³⁶ Убгурайири гьамустӀанра чан гьякъи гъадабгъура ва зат ккудудубкӀру уьмриз бегьер уч апӀура, гъубзурра ва гъубгурра – кьюридра сабси шад хьпан бадали.

³⁷ «Сари убзуру, тмунури ккадабцӀуру» кӀуру мисал гьамци вуйиган гьякь ву.

³⁸ Узу гьаъразачву, учву убгбан бадали, учву зегьмет дизригушваз. Жарадари зегьмет гъизигну, хъа учву дурарин зегьметнан бегьер уч апӀурачва.

³⁹ Му шагьриан вуйи самариялуйирикан гизафдар Исайихъ хъугъру, фицики му дишагьлийи Дугъкан дурариз дупнайи: «Дугъу йиз уьмриъ узу гъапӀу вари ляхнарикан ктибтунзуз».

⁴⁰ Самариялуйири, Исайихьна дуфну, Думу чпихь гъузуб тӀалаб апӀуру. Ва Думу дурарихъди кьюд йигъан гъузру.

⁴¹ Исайи дурариз гъапӀу ктитбариинди Дугъахъ хъанара гизафдар хъугънийи.

⁴² Дурари думу дишагьлийиз кӀуру: «Сифте учу Исайихъ яв гафариз дилигну хъугъунча. Хъа гьамус Дугъахъ учу ич-учʼинди хъебехъну хъугърача, ва аьгъячуз: Думу дугъриданра дюнʼя уьрхру Месигь ву».

Зурба гъуллугъчийин бай сагъ апӀуб

⁴³ Кьюд йигълан Иса, дилин удучӀвну, Галилей уьлкейиз гъягъюру,

⁴⁴ фицики Дугъу Чав мидиз улихьна гъапнийи: «чан ватандиъ пайгъамбрин гьюрмат даршул».

⁴⁵ Галилейиз гъафиган, душван агьлари Иса хушʼвалиинди кьабул апӀуру, гьаз гъапиш Ерусалимдиз Пасхайин машквраз гъушиган, дурариз Дугъу гъапӀкьандар вари дяркънайи, фицики дурарра гьадму машквраъ айи.

⁴⁶ Иса хъана Чав шид чяхриз илтӀибкӀу Кана кӀуру Галилей уьлкейин шагьриз гъягъюру. Гьадму вахтна Кафернагьум шагьриъ паччагьдин гьякимдрарикан сар яшамиш шулайи ва дугъан бай яманди иццурайи.

⁴⁷ Иса Ягьудия уьлкейиан Галилейиз дуфнайибдикан деебхьну, думу Дугъахьна гъюру ва, чан йикӀру гьялнаъ айи бай сагъ апӀуз Кафернагьумдиз гъач, кӀури, Исайиз миннатар апӀуру.

⁴⁸ – Учвкан саркьан, аьламатар ва аьжайиб лишнар дярякъкьан гагьди, хъугъуз ккайидар дарчва! – гъапи дугъаз Исайи.

⁴⁹ – Я аьхю кас! Йиз бай йикӀайиз гъача! – кӀури, паччагьдин гьякимдар Дугъаз хъана ккарагуру.

⁵⁰ – Хулаз гъарах, яв бай яшамиш шули гъузди, – кӀуру Исайира. Ва му адми Исайин гафарихъ хъугъру ва рякъюъ учӀвру.

⁵¹ Рякъюъ дугъаз чан гъуллугъчйир алахьуру ва дурари дугъаз: «Яв бай сагъ гъахьну», кӀуру.

⁵² Дугъу дурарихьан: «Бализ филаси рягьят гъабхьну?» – пну, гьерхру. «Накь лисхъан дугълан убцрушин алдабхьну», – гъапи дурари.

⁵³ Мушвʼин балин адашдиз, чан бай Исайи: «Яв бай яшамиш шули гъузди», гъапи вахтна сагъ гъашиб аьгъю шулу, ва дугъан вари хуландар Исайихъ хъугънийи.

⁵⁴ Му Ягьудияйиан Галилейиз гъафихъан Исайи улупу кьюбпи аьламат вуйи.