Югьан 18 - Гирами Китаб

Иса дисуб

¹ Гьамци ккарагбалан кьяляхъ, Иса, Чан ученикарра хъади, Кедрон кӀуру дерейиантина багъдиъ айи йишваз гъягъюру. Дурар сатӀиди багъдиъ учӀву.

² Иса масу тувуз ккуни Ягьудайиз му йишв аьгъюб вуйи – Исана ученикар дина кми-кмиди уч шуйи.

³ Ва магьа, римлуйирин эскрарин десте ва гьацира жугьдарин маллйирин аьхюдарина фарисйири гьау Аллагьдин хулан гъаравларра хъади, Ягьуда мина гъюру. Дурар вари яракъламиш духьнайи: дурарихь цӀа кайи гакӀвларна фанисар хьайи.

⁴ Исайи, Чаин улубкьруб аьгъяди, дурарин улихьна удучӀвну гьерхру: – Учву фуж агурачва?

⁵ – Назаретдиан вуйи Иса, – жаваб туву дурари. – Гьадму Узу вуза, – кӀуру Дугъу. Масу туврайи Ягьудара гьадрарихъди хъайи.

⁶ Исайи: «Гьадму Узу вуза» гъапибси, дурар кьяляхъ шулу ва жилʼина ахьру.

⁷ – Учву фуж агурачва? – хъанара гьерхру дурарихьан Исайи. – Назаретдиан вуйи Иса, – кӀуру дурари.

⁸ – Узу учвуз гъапунзачвузки: Гьадму Узу вуза, – гъапи Исайи. – Эгер учвуз Узу лазим вуш, гьаму адмийир деетай.

⁹ Исайи гьаци гъапнийи, гьаз гъапиш Чав дупнайи гьаму гафар: «Уву Узуз тувдарикан, Узу фужкӀара пуч гъапӀундарза», кӀурудар тамам духьну ккундийи.

¹⁰ Гьадмуган ханжал хьайи Петри, думу уьчӀюбгъну, маллйирин аьхюрин гъаравшиз йивну, дугъан иб ктабтӀуру. Гъаравшиз Малх кӀуйи.

¹¹ – Ханжал чан халариъ ив! – гъапи Исайи Петриз. – Му аьзабарин зах Узуз Адашди тувунзуз. Мегер Узхьан думу дурубхъди гъибтуз шулин?

¹² Гьадмуган Аллагьдин хулан гъаравлари Иса дисуру ва йитӀуру.

¹³ Сифте Думу гьадму йисан маллйирин аьхюр вуйи Каяфайин язна Гьаннайихьна хуру.

¹⁴ Эгер вари халкьдин ерина сар адми гъачӀиш ужу шул, дупну, жугьдариз насигьят тувур гьадму Каяфа вуйи.

Петри Исайиз «Аьгъюр дарзуз» пуб

¹⁵ Симон Петрна сарсан ученик Исайин кьяляхъди гъушнийи. Му ученик, маллйирин аьхюрихъди танишур вуйи ва думу Исайихъди кавхайин гьяятдиъ учӀвнийи.

¹⁶ Хъа Петр урарин чӀатинди гъузру. Хъасин гьадму кавхайиз таниш ученик удучӀвну, урарихъ хъайи гъараваш шурахъди дулхну, Петрра гьяятдизди аъру.

¹⁷ Ва гьамшвахь му шуру Петриз кӀуру: – Хъа уву, гъаписи даршул, гьатму адмийин ученик дарна? – Ваъ, – пну жаваб туву Петри.

¹⁸ Аьхъюди вуйи. Гъаравшари ва гъараваш дишагьлийири, алапӀрушвахь цӀа алапӀну, мани апӀуз хъюгъю. Петрра дурарин багахь дугъужвнайи ва мани апӀурайи.

Исайихьан силис гъадабгъуб

¹⁹ Кавхйири Исайихьан Дугъан ученикарикан ва Дугъу улупурайи аьгъюваларикан гьерхрайи.

²⁰ – Узу варидарин улихь ачухъди гъапунза, – жаваб туву Исайи. – Вари жугьдар гъюру мистаъ Узу гьарган аьгъювалар улупури гъахьунза. Узу фукӀара гьитӀибкӀну, жиниди улупундарза.

²¹ Гьаци вуйиган, Узхьан гьаз гьерхрачва? Узу фтикан гъапнуш, ебхьурайидарихьан гьерхай. Дурариз аьгъя, Узу фу гъапнуш.

²² Дугъу гьамци гъапиган, багахь дийигънайи гъаравларикан сари Исайин машнягъян йивуру ва кӀуру: – Фици гафар апӀурава кавхайихъди?!

²³ – Эгер Узу фу-вуш жараси гъапнуш, йип Узу фтин дюз дарш, – гъапи Исайи. – Хъа эгер гьякь кӀураш, гьаз Узуз йивурава?

²⁴ Гьадмуган Гьаннайи, Иса йитӀну имиди, маллйирин аьхюр вуйи Каяфайихьна гьаъру.

Петри Иса кьюбпи ражарира «Аьгъюр дарзуз» пуб

²⁵ Хъа Симон Петр чаз мани апӀури дугъужвнамийи. – Ич хиялиан, увура Дугъан ученикарикан вуйва? – гьерхру дугъхьан. – Ваъ, – жаваб туву Петри.

²⁶ – Уву дайнахъа узуз багъдиъ Дугъахъди гъяркъюр? – гьерхру Петри иб кдабтӀу гъуллугъчийин багахьлуйи.

²⁷ Петри хъана дарза кӀуру, ва гьадму сяаьт даттли уьъйир апӀуру.

Пилатдин силис

²⁸ Гьирин ухди Иса, Каяфайин хулʼан адаъну, Римдин гьюкумдарин дараматариз хуру. Жугьдар, чпи чиркин духьну, Пасхайин машквар апӀуз хьибдар кӀури, дараматдиъ учӀвундайи.

²⁹ Гьаддиз гьякимдар Пилат учв дурарихьна удучӀвуру. – Учву узухьна духнайи му Кас фтин тахсир апӀурачва? – гьерху дугъу.

³⁰ – Эгер Думу тахсиркар дайиш, учу Думу Увухьна суд апӀуз дархрийча, – жаваб туву дурари.

³¹ – Думу учвухьна гъадагъай ва ичв закондиинди суд апӀинай, – гъапи Пилатди. – Учуз фужкӀара аьжализ тувуз ихтияр адарчуз, – гъапи дурари.

³² Гьамци гъабхьнийи, гьаз гъапиш Исайи, Чав улихьмиди Учв фициб аьжалиинди йикӀуруш, гъапи гафар тамам духьну ккундийи.

³³ Пилат дараматдиз хътакуру ва, Исайизра дих дапӀну, гьерхру: – Уву «жугьдарин Паччагь» вуна?

³⁴ – Гьаци уву кӀурана, даршиш думу увуз Узкан жарадари гъапиб вуйин? – гьерху Исайи.

³⁵ – Узу жугьуд вуйинхъа? – хътӀурччву Пилат. – Гьаму Яв ватанагьлийири ва кавхйири Уву узухьна тувну. Уву гьациб фу гъапунва?

³⁶ – Йиз Паччагьлувал му дюнʼяйиан дар. Эгер Йиз Паччагьлувал гьаму дюнʼяйиан вуйиш, Йиз гъуллугъчйири, Узу жугьдарин хилиъ адрахъбан бадали, чпихьан шлуб апӀидийи. Ваъ, Йиз Паччагьлувал мушвʼан дариз, – гъапи Исайи.

³⁷ – Гьаци вуйиган, фици-вушра Уву Паччагь вуна? – гьерху гьадмуган Пилатди. – Узу паччагь ву, уву кӀурава. Узу гьаддиз бабкан гъахьунза ва гьаддиз дюнʼяйиз гъафунза: гьякьвал улупбан бадали. Шлиз ккундуш гьякьвал, гьарсариз Йиз дих ебхьура, – гъапи Исайи.

³⁸ – Хъа гьякьвал фу ву? – гьерху Пилатди. Ва гьамци дупну, думу хъана жугьдарихьна удучӀву. – Узуз му Касдик гьич саб тахсирра бихъурадарзуз, – гъапи дугъу.

³⁹ – Учвуз гьациб аьдат ачвуз: Пасхайин машквраз дидиснайидарикан сар деетуб. Узу учвуз дидиснайидарикан сар Пасхайиз деетурза. «Жугьдарин Паччагь» деетурза, ккундунучвуз?

⁴⁰ – Думу ваъ! Варава деет! – хъана дурари чӀигъар апӀуз хъюгъю. Варава гъачагъ вуйи.