Югьан 16 - Гирами Китаб

«Дурариз я Узу, я Йиз Адаш аьгъдар»

¹ Учву хъугъвалихъан хътадахъбан бадали, Узу учвуз гьамрар гъапунзачвуз.

² Учву мистариан утӀурккури хьиди. Гьациб вахт гъибдики, учву йикӀрудари, чпи гьаци апӀбиинди, Аллагьдин гъуллугънаъ ача кӀури, фикир апӀиди.

³ Дурари дици гьаддиз апӀидики, гьаз гъапиш дурариз я Узу, я Йиз Адаш аьгъдар.

⁴ Хъа Узу учвуз гьамрар, вахт улубкьиган, Узу дурарикан ктитуб ичв кӀваина гъюбан бадали, гъапунзачвуз. Сифте ражари дидкан учвуз гъапундайза, гьаз гъапиш учвухъди хъайза.

«Узу дурушиш, Хъюгърур гъидар»

⁵ Хъа гьамус Узу Гьаурихьна гъяраза. Учвкан сарикьан: «Уву наана гъягъюрава?» – пну гьерхрадарчва,

⁶ гьаз гъапиш Узу учвуз вари ктибтиган, ичв юкӀвар пашман духьнайичв.

⁷ Хъа Узу гьякь кӀуразачвуз: учвуз ужʼвал бадали гъяраза. Эгер Узу дурушиш, Хъюгърур учвухьна гъидар. Хъа Узу гъушиш, Думу учвухьна гьаъдиза.

⁸ Дугъу, гъафиган, дюнʼяйин агьлариз дурар гунагьвалин, дугъривалин ва Аллагьдин суддин дюзди гъавриъ адрувал улупиди.

⁹ Узухъ хътругъруган, дурар гунагьвалин дюзди гъавриъ адар.

¹⁰ Узухьинди даруган, дурар дугъривалин дюзди гъавриъ адар, гьаци вуйиган, Узу Адашдихьна гъяраза, ва учвуз Узу сарун рякъидарчвуз.

¹¹ Гьаму дюнʼяйин гьюкумдариин гьамустӀанра гъалиб духьнашра, дурар Аллагьдин суддин дюзди гъавриъ адар.

¹² Узхьан учвуз хъана гизафдарикан пуз шуйзухьан, аммаки учвхьан дурарин гьаму ражари сабан гъавриъ ахъуз хьибдарчвухьан.

¹³ Учвухьна Гьякьвалин Рюгь гъафиган, Дугъу учву дюз рякъди гъахиди, рюгьнан метлеб – гьубкӀну вуйи гьякьвал ву, фицики Дугъу кӀурайиб Чахьан дар. Дугъу анжагъ Чаз гъеебхьубдикан пиди, Дугъу учвуз гъюз ккимбубдикан хабар дебккди.

¹⁴ Дугъу Узу адлу апӀиди, гьаз гъапиш Дугъу, Узхьан гъадабгъну, думу учвуз ачухъ апӀиди.

¹⁵ Вари Адашдиз айиб Йизуб ву. Магьа гьаддиз Узу: „Дугъу, Узхьан гъадабгъну, учвуз тувди“, гъапунза.

Пашманвалин ерина шадвал гъибди

¹⁶ Багарихьди Узу сарун рякъидарчвуз, цӀиб вахтналан хъана рякъидичвуз.

¹⁷ Ученикарикан сакьюдари чиб-чпигъ кӀури гъахьну: – Мугъан фикирнаъ фу ади мици кӀурайкӀан? Мугъу кӀура: «Багарихьди Узу учвуз сарун рякъидарчвуз, хъа сацӀиб вахтналан хъана рякъидичвуз». Ва гьамцира кӀура: «Гьаз гъапиш Узу Адашдихьна гъяраза».

¹⁸ Хъа мидин фици гъавриъ ахъди – «багарихьди?» Му фтикан улхураш, ухьу гъавриъ адархьа.

¹⁹ Исайиз аьгъяйи, дурариз Чахьан фтикан гьерхуз ккунди айиш ва гьаддиз Чав кӀуру: – Учву чиб-чпихьан гьерхрачва, Узу Йиз хиялнаъ фу ади мици: «багарихьди» ва «учвуз Узу сарун рякъидарчвуз, хъа цӀиб вахтналан хъана рякъидичвуз» – кӀурайкӀан кӀури?

²⁰ Гьякьлу вуйи гьякь кӀуразачвуз: ишидичва ва дердер зигидичва, хъа миди вуйи дюнʼя шад хьибди. Учву пашман хьидичва, амма ичв пашманвал шадвализ хьибди.

²¹ БицӀир апӀурайи дишагьли аьзабнакк шулу, фицики дугъан сяаьт улубкьна, хъа бицӀир гъапӀуриз аьзабар гьархру – дюнʼяйиз цӀийи инсан хьубʼин думу шад шулу.

²² Гьаци учвура гьамус пашман вучва, саки учву Узуз хъанара рякъиди ва гьадмуган ичв юкӀвар шадвали ацӀди, му ичв шадвал сарихьанра дадабгъуз хьибдар.

²³ Ва гьадму йигъан учву Узʼхьан сабдиканра гьерхидарчва. Гьякьлу вуйи гьякь кӀуразачвуз: Йиз ччвур дибисну, учву Йиз Адашдихьан фу тӀалаб гъапӀишра, Дугъу тувдичвуз.

²⁴ Учву мегьел фукӀара Йиз ччвурнахъан тӀалаб гъапӀундарчва. Гьамус тӀалаб апӀинай – хьибдичвуз, ва учву шадвалихьди ацӀдичву!

Дюнʼяйин зиин гъалибвал

²⁵ Мугагьназ Узу учвуз тахалусариинди кӀури гъахьунза, хъа гьамус Узу учвуз, тахалусариинди дарди, Адашдикан ачухъди дупну ккуни вахт улубкьура.

²⁶ Гьадму йигъан учву, Йиз ччвур дибисну, Дугъкан тӀалабар апӀидичва. Узу кӀуразачвуз, учвхъанди Адашдиз ккарагидиза, дупну.

²⁷ Ичв Узухьна вуйи ккунивализ дилигну ва Узу Аллагьдихьан дуфна кӀури ичв хъугънайивализ дилигну, Адашдиз Чаз учву ккунду.

²⁸ Узу му дюнʼяйиз Адашдихьан гъафунза ва гьамус, дюнʼя дипну, Дугъахьна хътакураза.

²⁹ – Ари гьамус Уву, тахалусариинди дарди, ачухъди кӀурава, – гъапи Дугъаз ученикари. –

³⁰ Увуз вари аьгъюбдин учу гьамус гъавриъ ахъунча. Увхьан гьерхайизра кмиди Уву жавабар туврава. Магьа гьаддиз Уву Аллагьдихьан дуфнайибдихъ хъугърача.

³¹ – Аьхирки хъугъунчва? – гъапи жаваб вуди дурариз Исайи. –

³² Хъебехъай, Узу сарди гъитну, учву вари хулариз гьергру сяаьт улубкьура. Амма Узу сар дарза, гьаз гъапиш Узухъ Йиз Адаш хъазухъ.

³³ Узу му гафар, Узуъ учву мясляаьт абгри пну, гъапидар вуйиз. Му дюнʼяйиъ учвуз дердер алахьидичвуз, аммаки миж макадабтӀанай: Узу му дюнʼяйиин гъалиб гъахьунза.