Югьан 15 - Гирами Китаб

Иса тӀумтӀин шириз ухшар ву

¹ Узу халис тӀумтӀин шир вуза, хъа Йиз Адаш тӀумутӀчи ву.

² Узʼин али бегьер дархру гьарсаб кюл Дугъу ктабтӀуру, хъа бегьер хруб, диди хъанара артухъди бегьер хпан бадали, марцц апӀуру.

³ Узу учвуз улупу Гафналантина учву сарун марццидар вучва.

⁴ Узу учвуъ шлуганси, учву Узуъ йихьай. Кюлихьан чав-чаланди бегьер хуз шулдар, думу ширнан пай вуди ккунду. Гьаци учвура Узуъ духьну ккунду.

⁵ Узу – шир, хъа учву – кюлер. Анжагъ гьадмунури, Узу чаъ айиганси, фуж Узуъ аш, бегьем бегьер хури шулу. Узу хътарш, учвхьан фукӀа апӀуз шулдар.

⁶ Хъа фуж Узуъ адарш, дурар, багъдиан гатӀахьну, ерццурайи кюлерси ву; дурар уч апӀиди, цӀигъна гатӀахьиди ва ургиди.

⁷ Хъа эгер Узу учвуъ ва Йиз гафар учвуъ аш, учвуз фу ккундуш, гьадму тӀалаб апӀинай, учвуз вари тувди!

⁸ Йиз Адашдин ад бадали аьхю бегьер хибдичва ва Йиз ученикар хьидичвкан.

⁹ Узу Адашди фици ккун гъапӀнуш, гьаци Узура учву ккун гъапӀунза. Йиз масанвалиинди яшамиш йихьай!

¹⁰ Эгер Узу учвуз табшурмиш гъапӀуб учву тамам апӀури гъашиш, Йиз масанвалиъ яшамиш хьидичва. Гьаци Узура гъапӀунза: Узуз Йиз Адашди табшурмиш гъапӀуб Узу тамам гъапӀунза ва Адашдин масанвалиъди яшамиш шулаза.

¹¹ Узу учвуз му гьаддиз гъапунза: Йиз шадвал ичвуб хьпан бадали, учву кьикьнягъди ацӀну шлуси.

¹² Магьа Йиз учвуз вуйи табшуругъ: Узу учву ккун гъапӀиганси, сари-сар ккун апӀинай.

¹³ Дустарихъанди уьмур тувубтӀан артухъ масанвал дюнʼяйиъ адар.

¹⁴ Эгер Узу учвуз табшурмиш гъапӀуб учву тамам апӀуруш, учву Узуз дустар вучва.

¹⁵ Сарун Узу учвуз Йиз гъуллугъчйир пну дих дарапӀарза – гъуллугъчийиз чан аьхюри гьапӀраш аьгъдар аьхир. Узу учвуз Йиз дустар пну дих апӀураза. Йиз Адашдихьан аьгъю гъапӀуб, Узу учвуз вари ктибтунза.

¹⁶ Узу ктагъур учву дарчва, гьаму Узу вуза учву ктагъур, гьаму Узу вуза учву дюнʼяйиз улупнайир, ва бегьер туврудар (учву вучва) – варитӀан ужуб бегьер. Ва гьадмуган Йиз Адашди учвуз, учву ккун гъапӀуб, вари тувди.

¹⁷ Магьа Узу учвуз табшурмиш апӀурайиб: сари-сар ккун апӀинай.

Исайи Чан ученикариз улихьмиди хатӀаваликан пуб

¹⁸ Эгер учву дюнʼяйиз даккунди вуш, учвутӀан Узу ухди даккун гъашиб аьгъю йибхьай.

¹⁹ Учву му дюнʼяйиндар вуди ккундийи, диди учву чандарси ккун апӀидийи. Хъа учву му дюнʼяйиндар даруган, гьаддиз учву дюнʼяйиз даккунди ву (яна, Узу учву кадагъну му дюнʼяйихьан жара гъапӀунзачву).

²⁰ КӀваин апӀинай, Узу учвуз гъапундайин: «гъуллугъчи чан аьхюртӀан артухъ дар?» Эгер Узу утӀуккуйиш, учвура утӀурккури хьиди. Эгер Йиз гафар тамам апӀуйиш, ичвра тамам апӀури хьиди.

²¹ Амма гьамрар вари учву Йиздар вуйиган апӀиди, гьаз гъапиш дурариз Узу Гьаур аьгъдар.

²² Эгер Узу дюнʼяйиз гъафундайиш ва дурарихъди гъулхундайиш, дурар тахсиркрар хьидайи. Хъа гьамус дурарин чпи гьякь вуча кӀурайивализ бин имдар.

²³ Шлиз Узу даккунди вуш, гьацириз Йиз Адашра ккундар.

²⁴ Эгер сарихьанра апӀуз даршлу ляхнар Узу гъапӀундайиш, гьадмуган дурар тахсиркрар хьидайи. Хъа гьамус дурариз Узу гъапӀдар вари гъяркъну, ва гьаци вушра дурариз Узура, Йиз Адашра даккунди ву.

²⁵ Саки гьаци дубхьну ккундийи, дурарихь хьайи Къанундиъ дибикӀнайи «Саб багьнара адарди Узу даккунди ву» кӀуруб тамам хьпан бадали.

²⁶ Саки учвухьна Хъюгърур гъафиган, яна Адашдихьан гъюрайи Гьякьнан Рюгь, Узу учвухьна Адашдихьан гьаъдиза – ва Думу Йиз шагьид хьиди.

²⁷ Ва учвура Йиз шагьидар вучва, фицики садпи йигъланмина Узухъди хъачва.