Югьан 14 - Гирами Китаб

Исайи Чан ученикар ккарцуб

¹ Исайи варидариз кади кӀуру: – Гъит ичв юкӀвариан шаклувалар удучӀври! Учву Аллагьдихъ хъугърачва, гьаци Узухъра хъугъай!

² Йиз Адашдин ужагъдиъ гизаф хулар а. Эгер гьаци дайиш, Узу учвуз мидкан пидайза. Узу учвуз душваъ йишв гьязур апӀуз гъягъюраза.

³ Узу гъушиган, учвуз йишв гьязур апӀидиза. Узу наан шулуш, учвура гьадушваъ хьпан бадали, Узу хътакидиза ва учву Узухьна гъахидиза.

⁴ Хъа Узу наана гъягъюраш, дина рякъ учвуз аьгъячвуз.

⁵ – Агъа, Уву наана гъягъюраш, учуз аьгъдарчуз, – кӀурайи Фомайи. – Гьаддиз учуз дина рякъ наънан аьгъю шул?

⁶ Исайи жаваб туву: – Узу вуза Рякъ, Узу вуза Гьякь ва Уьмур. Анжагъ УзхьанминатӀан Адашдихьна гъягъюз шулдар.

⁷ Эгер учвуз Узу аьгъяш, Адашра аьгъячвуз. Гьамусдихъантина учвуз Думу аьгъячвуз ва гъяркънура вучвуз!

⁸ – Я Агъа! – кӀуру Филипди. – Учуз Адаш улуп ва сарун учуз фукӀара лазим дарчуз.

⁹ – Узу учвухъди гьамкьан вахтна хъади, увуз Узу гьамусра аьгъю гъахьундарнуз, Филип? – жаваб туву Исайи. – Шлиз Узу гъяркънуш, гьадгъаз Адашра гъяркъну. Уву фици: «учуз Адаш улуп», кӀурава?

¹⁰ – Узу Адашдиъ, Адаш Узуъ айибдихъ уву хъугърадарна? Узу учвуз кӀурайи гафар Узхьан кӀурайидар дариз, хъа дурар кӀурайир Узуъ айи Адаш ву, Чан ляхнар апӀурайи.

¹¹ Узухъ хъугъай: Узу – Адашдиъ, ва Йиз Адаш Узуъ а. Узухъ хъугъдарш, Узу апӀурайи ляхнарихъкьана хъугъай.

¹² Гьякьлу вуйи гьякь кӀуразачвуз: фуж Узухъ хъугъраш, гьацири Узу апӀурайи ляхнар апӀиди ва УзутӀан артухъдира кади апӀиди, фицики Узу Адашдихьна гъягъюраза.

¹³ Йиз ччвур дибисну учву ккун гъапӀуб вари Узу тамам апӀидиза, ва Адашди Чан ад Чан Балʼантина улупиди.

¹⁴ Эгер учву Йиз ччвурназ дих гъапӀиш ва фу ккун гъапӀишра, Узу тамам апӀидиза.

Гьякьвалин Рюгь гьауб

¹⁵ Эгер учвуз Узу ккундуш, Узу учвуз фу табшурмиш гъапӀнуш, гьадму тамам апӀинай.

¹⁶ Узу Адашдикан ккун апӀидиза ва Дугъу учвухьна жарар – Хъюгърур гьаъди. Думу аьсрариз учвухъди гъузди.

¹⁷ Думу Хъюгърур – Гьякьвалин Рюгь ву. Му дюнʼяйихьан Думу кьабул апӀуз хьидар, гьаз гъапиш Думу рякърур дар ва аьгъюр дар. Анжагъ учвуз аьгъячвуз Думу, Думу учвухъди хъа ва учвуъ а.

¹⁸ Узу учву йитимарди гъитидарзачву, хъана учвухьна хътакидиза.

¹⁹ СацӀиб вахтналан дюнʼяйиз Узу сарун рякъидар, хъа учвуз Узу рякъюри хьидичвуз: гьаз гъапиш Узу яшамиш шулаза ва учвура яшамиш хьидичва.

²⁰ Ва гьадму йигъан учвуз аьгъю хьибдичвуз, Узу Йиз Адашдиъ шулайиб, учву – Узуъ, хъа Узу – учвуъ.

²¹ Шли Узхьан вуйи табшуругъар тамам апӀураш, гьадму ву Узу ккунир. Шлиз Узу ккундуш, Йиз Адашра гьадгъу ккун апӀиди. Гьацир Узузра ккун хьидизуз ва гьацирин улихь ачмиш шули хьидиза.

²² – Я Агъа! – кӀуру Искариотдиан дару Ягьудайи, – Уву, имбуну дюнʼяйиз ктарди, учуз фици ачмиш хьидива?

²³ Исайи жаваб туву: – Шлиз Узу ккундуш, гьадгъу Йиз Гаф уьбхиди. Ва гьадмуган дицир Йиз Адашдизра ккун хьиди, гьадмуган Узуна Думу сатӀиди гьацирихьна гъидича ва гьадгъаъ яшамиш хьидича.

²⁴ Шлиз Узу ккундарш, Йиз гафар уьрхидар. Учвуз ебхьурайи Гаф Йизуб дариз аьхир, хъа Узу гьау Адашдинуб ву.

²⁵ Узу учвуз му гьеле учвухъди хъамидитӀан гъапунза.

²⁶ Узу бадали Адашди учвуз гьаърайи Хъюгърури – Гирами Рюгьну учвуз вариб улупиди ва Узу учвуз гъапиб вари кӀваин апӀидичвуз.

²⁷ «Мясляаьт ибшри!» – Узу кӀуразачвуз гъярайири. Узу учвуз Йиз мясляаьт тувразачвуз. Узу учвуз, инсанари туврубсиб мясляаьт туврадарзачвуз. Ичв кӀваан дердер адаай! ГучӀ мапӀанай!

²⁸ Узу учвуз «гъягъюраза» гъапиб учвуз гъеебхьунчвуз, ва: «Узу учвухьна хътакидиза», гъапнура вуза. Эгер учвуз Узу ккундийиш, Узу Адашдихьна гъярайибдиин учву шад хьидийчва, фицики Йиз Адаш УзутӀан артухъ ву.

²⁹ Узу гьамус гьаму вари улубкьайиз улихьна вари гъапунза, ва гьадмуган, гьаму улубкьиган, учву Узухъ хъугъдичва!

³⁰ Сарун Узхьан учвухъди артухъ гафар апӀуз хьибдарзухьан: сарун му дюнʼяйин гьякимдар багахь духьна. Йиз зиин дугъаз гьюкум адар.

³¹ Аммаки му дюнʼяйиз аьгъю дубхьну ккунду: Узуз Йиз Адаш ккундайиб. Магьа гьаддиз Дугъу Узуз гъапиб вари тамам апӀураза. Гъудужвай, гъягъюрхьа гьамушвʼан!