Югьан 12 - Гирами Китаб

Иса Чан дустарихъди Вифанияйиъ хьуб

¹ Пасхайин машквар ккебгъуз йирхьуд йигъ ккимиди, Иса Чав чӀиви гъапӀу Лазар яшамиш шулайи Вифанияйиз гъюру.

² Дурари Дугъан сагълугънаан хураг гьязур апӀуру. Марфа суфрайихъ Исайин гъайгъушнаъ айи. Суфрайихъ хъайидарихъди Исайин багахь Лазарра деънайи.

³ Марʼямди, нард гьарин гизаф багьа вуйи марцци ягъ дубхну, Исайин ликарикан ктатуру ва Дугъан ликар чан кушарихьди кжикуру. Вари хал аьтринсиб ицци ниърахьди абцӀру.

⁴ Исайин ученикарикан сари, хъасин Агъа масу туврури, Искариотдиан вуйи Симондин бай Ягьудайи кӀуру:

⁵ – Гьаму ягъ, шубудварж арсран пулихъ масу тувну, пул касибариз пай апӀуз гьаз шулдайихъа?

⁶ Дугъу мици, касибарин гъаннаъ ади ваъ, хъа учв тӀафал вуди хьпаз лигну гъапиб вуйи, гьаз гъапиш дугъахь уртахъ вуйи пулин мажник хьайи ва саспиган, чан тямягьяр гьуркӀуз, гьадму пуликан харж апӀуйи.

⁷ Гьадмуган Исайи кӀуру: – Думу сикинди гъитай! Дугъу му ягъ Узу накьвдик кивру йигъаз гьязур дапӀнайиб ву.

⁸ Касибар гьарган учвухъди хьиди, хъа Узу учвухъди гьарган хьидарза.

⁹ Жугьдарикан гизафдариз Иса душваъ айиб аьгъю дубхьну, Дугъу чӀиви гъапӀу Лазаризра лигуз кади, дурар Исайихьна гъюру.

¹⁰ Гьадмуган маллйирин аьхюдари Лазарра йикӀбан къарар адабгънайи,

¹¹ гьаз гъапиш гьадгъулантина, кавхйирна маллйир гъитну, гизаф жугьдар Исайихъ хъугънийи.

Ерусалимдиз гъюрайи Иса тебрик апӀуб

¹² Хъайигъан машквраз гъафи халкь, Иса Ерусалимдиз гъюруб деебхьну,

¹³ хурмайин гьарин кюлерра хьади, Исайин улихьна, гьамцдар чӀигъар апӀури, удубчӀвуру: Агъайин ччвурнахъ гъюрайи Израилин Паччагьдиз ужʼвал ибшри!

¹⁴ Иса, саб гъудугъ дибихъну, гьаддиин элеуру, фицики Гирами китабариъ дибикӀна:

¹⁵ «ГучӀ мапӀан, Сиондин риш! Лиг, яв Паччагь увухьна жигьил даждиинди гъиди».

¹⁶ Исайин ученикар сифте мидин гъавриъ ахъундайи, хъа кьанди Иса Аллагьдин аднаъ гъашиган, Иса гьамци гъюваликан Гирами китабариъ дибикӀнайиб дурарин кӀваина гъафнийи, ва гьаци дурари Думу къаршуламишра гъапӀнийи.

Адмийири Исайикан ктибтуб

¹⁷ Лазар чӀиви апӀруган, Исайихъди хъайидари дидин гьякьнаан варидариз ктибтури гъахьну,

¹⁸ гьаддиз халкьди Иса гьамци тебрик апӀури къаршуламиш гъапӀнийи, гьаз гъапиш варидариз гьадму аьламат улупур Думу вуйибдикан деебхьнайи.

¹⁹ Хъа фарисйири чиб-чпиз кӀуйи: – Рябкъюранчвуз, фукӀа-мукӀа апӀуз ухьу кьувватсуз ву. Вари Гьадгъахъди гъягъюра!

²⁰ Аллагьдиз икрам апӀуз машквраз гъафидарин арайиъ грекарра айи.

²¹ Дурари, Галилей уьлкейиъ айи Вифсайдайиан вуйи Филип кӀуру касдихьна дуфну, гьамци кӀури саб тӀалаб апӀуру: – Я ич аьхюр, учуз Иса рякъюз ккунди ачуз.

²² Филипди душну Андрейиз, хъа дурар кьюридра Исайихьна душну, Дугъаз мидкан ктибтуру.

²³ Исайи гъапи: – Аллагьдин аднаъ шлу Инсаниятдин Балин сяаьт улубкьну!

²⁴ Гьякьлу вуйи гьякь кӀуразачвуз: сабан дяхнин удар жилʼина абхъну дарчӀиш, думу гьаци сабди гъубзди, хъа гъабчӀиш, диди бегьем мягьсул хибди.

²⁵ Шлиз чан уьмур багьади вуш, гьацири думу пуч апӀура, хъа шлиз гьаму дюнʼяйиин чан уьмур даккунди вуш, гьацири думу ккудудубкӀру уьмриз уьбхюра.

²⁶ Фуж Йиз гъуллугънаъ аш, гъит гьацир Йиз шилнаъди гъюри! Ва Узу наан аш, гьадушваъ Йиз гъуллугъчира хьиди. Фуж Йиз гъуллугънаъ аш, гьацир Йиз Адашди за апӀиди.

Исайи Чан аьжаликан пуб

²⁷ Гьамус Йиз юкӀв гъалабну абцӀна! Фу пну ккунду Узу? ПидикӀан: «Я Адаш! Узу гьаму гьялнаккан уьрх!» Саки Узу му дюнʼяйиз гьаддиз дуфназа – гьаму гьял бадали! Адлу апӀин Яв ччвур, Адаш!

²⁸ Гьадму арайиъ завариан дих атӀабгуру: – Адлу гъапӀунза ва хъана адлу апӀидиза!

²⁹ Гьадушвахъ дугъужнайи халкь думу дихнахъ хъпехъурайи. Садари, завар гъарахну кӀурайи; тмундари, Дугъахъди малайик гъулхну, кӀуйи.

³⁰ Исайи дурариз жаваб вуди кӀуру: – Му дих Узуз вуйиб дайи, хъа думу халкь бадали вуйи!

³¹ Му дюнʼяйин суд апӀру вахт, магьа, хъубкьнура ву. Гьамус му дюнʼяйин гьякимдар (иблис) тина утӀуккну хьиди!

³² Хъа Узу жилилан за гъахьиган, Узу варидарихьди Узухьинди иб тувуз гъитдиза.

³³ Гьаму гафариинди Дугъу дурариз, Учв фициб аьжалиинди йикӀуруш, улупнийи.

³⁴ – Учуз Гирами китабариан Месигь гьарган учухъди шлуваликан аьгъячуз, – гъапи халкьди. – Увхьан фици пуз шулвухьан, Инсаниятдин Бай завариз зигиди, кӀури? Ва фуж ву, Думу Инсаниятдин Бай?

³⁵ Исайи дурариз кӀуру: – СацӀиб вахтнаътӀан акв учвухъди гъубзидар. Гьаци вуйиган, Учву мучӀушну ккадраъбан бадали, сабан акуди имиди, гъарахай. Фицики фуж мучӀушнаъди гъяраш, гьацириз учв наанди илтӀикӀнашра, аьгъдар.

³⁶ Хъа сабан учвуз аку апӀурамиди, аку аквнахъ хъугъай ва аквнан веледар хьидичва! Гьаму гафар дупну, Иса гъягъюру ва дурарихьан жин шулу.

³⁷ Дугъу дурарин улихь гьамкьан аьламатар гъапӀнушра, аммаки дурар, дидизра дилигди, Дугъахъ хъугъдайи.

³⁸ Гьамци Ишая пайгъамбри дупнайи гафар тамам духьну ккундийи. Дугъу гъапнийи: «Учхьан гъеебхьубдихъ фуж хъугъну, Агъа? Шлиз ачухъ гъабхьнухъа Агъайин кьудрат?»

³⁹ Ва гьаддиз дурар хъугъуз удукьрудар дайи, хъана Ишаяйи кӀуруганси:

⁴⁰ «Аллагьди дурарин улар кур гъапӀнийи, дурарин фикир хъунти гъапӀнийи, гьаци вуйиган, улар ади дярябкърудар ва фикирниинди гъавриъ адрахърудар. Гьаци ккундарш, Узухьинди илтӀикӀрийи, ва Узу дурар сагъ апӀидийза».

⁴¹ Ишаяйи му гафар, чаз улихьмиди Исайин адлувал гъябкъиган, гъапидар вуйи.

⁴² Агъсакъларин арайиъра кмиди Исайихъ хъугънайидар цӀиб адайи, хъа дурари дидкан, фарисйири чпи мистариан утӀруккбан бадали, ачухъди кӀурдайи.

⁴³ Адмийирин тярифар дурариз Аллагьдин адлувалтӀан зина вуйи.

Месигьди туву аьгъювалариинди ичв суд хьибди

⁴⁴ Исайи аьхю дихниинди гъапи: – Фуж Узухъ хъугъраш, гьацир Узухъ хъугърадар, хъа Узу Гьаурихъ хъугъра.

⁴⁵ Шлиз Узу рякъюраш, гьацириз Узу Гьаур рякъюра.

⁴⁶ Узу акв вуза ва Узухъ хъугъру гьарсар мучӀушнаъ гъудрузбан бадали дюнʼяйиз дуфназа.

⁴⁷ Эгер шлиз Йиз гафар деерхьну, дурар тамам дарапӀиш, Узу гьацирин суд апӀидиза, гьаз гъапиш Узу дюнʼяйиз суд апӀуз ваъ, хъа думу уьбхюз дуфнайир вуза.

⁴⁸ Узу шли нигь апӀураш ва Йиз Гаф кьабул апӀуз даккнириз, гьамустӀанра судья а: Узу дупнайи Гаф – магьа судья, гъиямат йигъан суд апӀрур!

⁴⁹ Фицики Узу Йиз Узхьан гъапиб дариз – му Узу гьау Адашдин, Узуз вуйи амур ву, фу кӀуруш ва фици кӀуруш.

⁵⁰ Узуз аьгъязуз: Дугъан амур – му зат ккудудубкӀру уьмур ву. Узу анжагъ Узуз Адашди йип гъапиб кӀураза.