Югьан 10 - Гирами Китаб

Габан ва дугъан марччар

¹ – Гьякьлу вуйи гьякь кӀуразачвуз: фуж марччаринишваъ урчӀариан дарди, фици-вуш жараси учӀвруш, думу тӀафал ва тӀарашчи ву.

² Хъа фуж урчӀарианди учӀврур, гьадму марччарин лижан габан ву.

³ Гъаравли дугъаз урар арццру. Марччар дугъан дихнахъ хъпехъуру. Дугъу чан марччариз ччвурариинди кӀуру ва чӀатинди адауру.

⁴ Дугъу чандар вари адаъган, думу дурарин улихьди гъягъюру, хъа марччар дугъан кьяляхъди гъюру, гьаз гъапиш дурариз дугъан дих аьгъя.

⁵ Жарадарихъди дурар гъягъидар, дурар дугъхьан гьергди, гьаз гъапиш дурариз жарарин дих таниш дар.

⁶ Исайи дурариз гьаму тахалус ктибтуру, хъа Дугъу чпиз фтикан гъапнуш, фарисйир гъавриъ ахъундайи.

⁷ Исайи давам апӀуру: – Гьякьлу вуйи гьякь кӀуразачвуз: марччариз урчӀар – Узу вуза.

⁸ Вари Узу гъяйиз гъафидар тӀафлар ва тӀарашчйир вуйи. Саки марччар дурарихъ хъпехъундар.

⁹ УрчӀар – Узу вуза. Фуж Узʼантина учӀвиш, дюрхну хьиди. Гьацир УрчӀаризди учӀвди ва дилинтина удучӀвиди, гьацириз чаз ипӀруб алишв бихъиди.

¹⁰ Хъа тӀафал саб апӀуз гъюри шулу: гьитӀибкӀбан бадали, йибкӀбан ва пуч апӀбан бадали. Узу гъафунза гьацдариз уьмур хьади, варибдиъ – абцӀу уьмур.

¹¹ Узу гъяни Габан вуза. Дицир ужур габни марччар бадали чан уьмур тувру.

¹² Хъа гъирагъдилан дуфнайир – думу габан дар, дицириз марччар жарадар ву – жанавар лижахьна багахь шулайиб гъябкъюбси, марччара гатӀахьуру ва гьергрира ву. Жанаври дурар дисуру ва чӀяргъюру.

¹³ Дицир габан дар, хъа гъирагъдилан, гьякъи тувну, хъитнайир ву; дицир марччарин гъайгъушнаъ шулдар.

¹⁴ Узу ужур Габан вуза: Узуз Йиз марччар аьгъязуз ва Узура Йиз марччариз аьгъя.

¹⁵ Адашдиз Узу фици аьгъяш, гьаци Узуз Адашра аьгъязуз. Узу Йиз уьмур марччарихъанди тувдиза.

¹⁶ Узуз жара марччарра азуз, гьаму марччаринишвʼан дарудар. Узу гьадрара хъади дуфну ккунду, Йиз дихнахъ дурар хъпехъиди, гьадмуган саб лиж хьибди ва сар Габан хьиди!

¹⁷ Узу Адашдиз гьаддиз ккундуки, Узу уьмур туврайиган, тазакӀултӀан думу гъадабгъуз.

¹⁸ Йиз уьмур сарира дадабгъидар, Узу Йиз хушниинди думу тувраза. Думу тувуб Йиз ихтиярнаъ, думу, кьяляхъ гъадабгъубра Йиз ихтияриаъ айиз. Думу гьаци Узуз Йиз Адашди улупунзуз.

¹⁹ Хъана гьаму гафари жугьдарин арайиъ гьюжатар ирчру.

²⁰ Дурарикан гизафдари кӀуйи: – Думу амрихъан душна ва гьарзади улхура. Дугъахъ гьаз хъпехъурачва?

²¹ – Му улхбар жинар кайириндар дар, – кӀури, къаршу удучӀвуйи тмундар. – Жинар кайирихьан кур вуйириз рябкъювал тувуз шулинхъа?

Исайиз жугьдар къаршу хьуб

²² Кьюрд улубкьуру. Ерусалимдиъ Аллагьдин хал таза апӀбан машквар вуйи.

²³ Иса Аллагьдин хулан гьяятдиъ Сулейман пайгъамбрин айвандихъ лицурайи.

²⁴ Жугьдари, Дугълан илтӀикӀну, Дугъхьан гьерхру: – Уву фукьан вахтназ ич сабур ахтармиш апӀури гъузуз ккава? Йип учуз дюзди, Уву Месигь вуна?

²⁵ – Узу учвуз гъапунзачвуз, хъа учву Узухъ хъугърадарчва. Узу Йиз Адашдин ччвурнахъан апӀурайи ляхнар – магьа Узкан шагьидвал апӀурайидар.

²⁶ Амма учву Узухъ хъугърадарчва, фицики учву Йиз марччарикан дарчва.

²⁷ Йиз марччариз Йиз дих ебхьуру ва Узуз дурар аьгъязуз, дурар Узухъди гъюру.

²⁸ Узу тувдиза дурариз гьаргандин уьмур, дурар аьсрариъра йихдар, дурар Узхьан сарира гьитӀикӀдар.

²⁹ Йиз Адаш варидартӀан зурба ву. Гьаддиз дурар Йиз Адашдихьан сарихьанра дадагъуз хьибдар,

³⁰ хъа Узуна Йиз Адаш сар вуча.

³¹ Жугьдар хъана Исайиз йивуз гъванарихъан хъчӀихуру.

³² – Йиз Адашдихьан Узу учвуз гизаф ужудар ляхнар улупунзачвуз, – гъапи Исайи. – Гьадрарикан фунубдин гьякьнаан Узуз йивуз ккунди ачвуз?

³³ – Учуз, Уву ужудар ляхнар гъапӀну кӀури, йивуз ккунди адарчуз, хъа Аллагьдикан рихшанд апӀурайиган. Уву вуйир адми, хъа Увкан Аллагь апӀурава.

³⁴ Исайи жаваб туву: – Ичв Къанундиъ дибикӀнадаринхъа: «Узу гъапунза: учву аллагьар вучва?» кӀури. Хъа гьякь дибикӀна.

³⁵ Эгер Аллагьди Чан Гаф шлихьна гьапӀнаш, Дугъу дурариз аллгьар кӀура.

³⁶ «Узу Аллагьдин Бай вуза», гъапну кӀури, фици учвхьан Узуз пуз шулчвухьан: «уву рихшанд апӀурава», кӀури. Шлиз кӀурачва гьаци? Узуз? Адашди гирами дапӀну, гьаму дюнʼяйиз гьаънайириз?!

³⁷ Эгер Узу Йиз Адашди апӀурайи ляхнар апӀурадарш, гьадмуган Узухъ мухъугъанай!

³⁸ Хъа эгер Узу дурар апӀураш, учвхьан Узухъ хътругъуз шулчвухьан, саки Йиз ляхнарихъкьан хъугъай! Гьадмуган, учвуз аьгъю хьибдичвуз ва: Узуъ – Йиз Адаш, хъа Узу – Дугъаъ айибдин гъавриъ хьидичва.

³⁹ Гьадмуган дурариз Иса хъана дисуз ккун шулу, амма Думу дурарин хиларигъян гъютӀурччвуру.

⁴⁰ Хъасин Иса, Ярдан нирихъ Ягьʼяйи улихьди штуан апӀури гъаши йишвариз гъягъюру ва душваъ саб кьадар вахтна гъузру.

⁴¹ Дугъахьна гизаф адмийир гъюйи. «Ягьʼяйи саб аьламатра улупундайи, – кӀуйи дурари, – хъа Исайикан гъапидар вари гьякь ву».

⁴² Ва гьадушваъ гизафдар Дугъахъ хъугънийи.