Якьубдин 4 - Гирами Китаб

Аллагьдиз бахш йихьай

¹ ГьапӀрудар ву ичв гъярхьбарна гьюжатар? Ичв жанариъ урхьурайи тямягьярилан гъюрайидар даринхъа?

² Учвуз фу-вуш ккундучвуз, хъа думу шуладарчвуз, гьаддиз чиб-чпигъ гъярхьну йихурачва. Учву гужназ хъюгърачва, хъа фукӀара шуладарчвухьан, ва гьаддиз, гьюжатар апӀурачва ва гъярхьрачва. Учвуз ккуниб шуладарчвуз, гьаз гъапиш Аллагьдикан ккун апӀурадарчва.

³ Учву ккун апӀурашра, ккун апӀурайиб тамам шуладаричв, гьаз гъапиш учву ужудар ниятариз ккун апӀурадарчва, хъа – ичв тямягьяр гьуркӀбахъди.

⁴ Дюз дарудар, учвуз аьгъдарди айчвуз, гьаму файдасуз дюнʼяйихъди хьувал – Аллагьдихъди апӀурайи дяви вуйиваликан? Шлиз гьаму файда ктру дюнʼяйихъди дуст духьну ккундуш, думу Аллагьдиз душманди удучӀвура.

⁵ Гирами бикӀбариъ гьавайиди гьамци дибикӀна кӀуранчва? «Ухьуъ учӀвнайи Рюгьназ ухьу анжагъ ЧазтӀан духьну ккундар».

⁶ Хъа Дугъу ухьуз мутӀан артухъ ужʼвал улупну. Магьа гьаддиз, Гирами бикӀбариъ дупна: «Аллагь фурсачйириз къаршуди удучӀвуру, хъа кьисматниин рази вуйидар ккун апӀуру».

⁷ Гьаддиз, Аллагьдиз мютӀюгъ йихьай! Иблисдиз къаршу удучӀвай – думу учвхьан гьебгди.

⁸ Аллагьдихьна багахь йихьай – Аллагьра учвухьна багахь хьиди. Хилар жикӀай, гунагькрар, юкӀвар марцц апӀинай, кью-кьюб юкӀв айи адмийир!

⁹ Дердер апӀинай, гьарай ипай, ишай! Ичв аьлхъбар ишбариз илтӀибкӀрийичв, шадвал – пашманвализ.

¹⁰ Агъайин улихь учву исди дисай, ва Дугъу учву за апӀиди.

¹¹ Сар-сариз чӀуру гафар мапӀанай, гъардшар. Шли чан гъардшиз чӀуру гафар апӀуруш ва тахсир кипруш, дугъу Къанундиз къаршуди кӀура ва Къанун тахсир апӀура. Хъа уву гьамци Къанундик тахсир кипраш, уву Къанундиъ улупнайиб тамам апӀрур дарва, хъа – судьявал апӀурава.

¹² Аммаки, Къанун Туврур ва судьявал АпӀрур сартӀан адар, уьрхюз Шлур, ясана терг АпӀрур. Хъа уву гьацир фуж вува, яв багахь хьайирин суд апӀуз?

¹³ Гьамус учву узухъ хъебехъай, гьамци кӀурудар: «Гъи-закур саб фунуб-вуш шагьриз сад йисазди, ариш-вериш апӀури, гизаф пул гъазанмиш апӀуз гъягъидихьа».

¹⁴ Учвуз, гьеле закур учвкан фу шулушра, аьгъдарчвуз! Ичв уьмур фу вухъа? Учву, сацӀиб ачмиш духьну, дургру дифарси вучва.

¹⁵ Учву, мидин ерина, гьарган гьамци дупну ккунду: «Эгер Агъайиз ккун дубхьну, ухьу сагъди гъузиш, гьамци-гьамци апӀидихьа».

¹⁶ Хъа учву, учвʼин элеъначва ва ултӀурччвру гафар апӀурачва. Гьарсаб гьамциб фурс чӀуруб ву.

¹⁷ Ва гьаддиз, учвуз дюзвал фу-вуш аьгъядишра, гьаци дарапӀрур гунгьин тахсиркар ву.