Якьубдин 2 - Гирами Китаб

Ичв багахь хьайидар ккун апӀинай

¹ Йиз гъардшар, ихь адлу вуйи Агъа Иса Месигьдихъ хъугъри, адмийир ккунидаризна даккнидариз жара мапӀанай.

² Мисалназ, учву уч духьнайишваз багьа палат али ва гъизилин тӀублан хъайи адми гъюру, гьацира – йирси палат али касибра.

³ Учву багьа палат алириз, артухъ гьюрмат апӀури, гьамци кӀурачва: «Уву гьаму ужударсдар йишварикан гьамунубдиин деъ». Хъа касибдиз кӀурачва: «Гьатушвахьинди гьудучӀв», ясана, «Йиз ликарихъинди деъ».

⁴ Учву гьапӀрачва? Учву сарин улихь сар заан апӀурачва ва ичв дюз дару хияларихьди, фунур артухъур вуш, гьял апӀурачва.

⁵ Хъебехъай, йиз масан вуйи гъардшар! Аллагьди гьаму дюнʼяйин улихь касиб вуйидар кадагънадаринхъа, чпин хъугъувалиъ мюгькам ва, Учв ккунидариз гаф тувнайиси, Чан Паччагьлугъдин ирс рубкьрудар хьпан бадали?

⁶ Хъа учву касибар гьясбикк апӀурадарчва! Девлетлуйир даринхъа учвлан гъидикь алдабхъурайидар. Учву судариз хъчӀюхюрайидар гьадрар даринхъа?

⁷ Гьадрар даринхъа, учву Чазди кадагънайи Месигьдин ччвур беябур апӀурайидар?!

⁸ Эгер учву дугъриданра, Гирами китабариъ улупнайи: «Багахь хьайир жвуваз жвувси ккун апӀин» кӀуру паччагьвалин закондиъ айиси апӀураш, учву дюзди апӀурачва.

⁹ Хъа эгер учву сартӀан сар артухъди дисураш, гунагьариъ ахърачва, ва учвуз, закон гъючӀюбгъдаризси, жаза гьадабтӀиди.

¹⁰ Гьаз гъапиш, шли, Къанундиъ улупнайиб вари тамам апӀури, хъа душвʼан саб фукӀа-мукӀа тамам дарапӀди гъибтиш, дицир кас вари Къанун чӀюбгъбаъ тахсиркар ву.

¹¹ Фицики «кьяппавал мапӀан» гъапи Аллагьди «миликӀан» гъапундаринхъа? Ва гьаддиз, эгер уву кьяппавал апӀурадарш, хъа йивну йикӀураш, Къанун чӀюбгъюрава.

¹² Азадвал тувру Къанундиинди суд апӀурайи адмийинсдар гафар ва ляхнар апӀин.

¹³ Фицики Аллагьдин судди жарариз ужʼвал дарапӀрурин язухъ апӀидар. Ужʼвал судтӀан зиина ву!

Хъугъувал ва ужувлан ляхнар

¹⁴ Йиз гъардшар, фу тӀяаьм ахъа, эгер шли, хъугъраза, кӀураш, хъа ужувлан ляхнар апӀдарш? Мициб хъугъували думу уьрхидар, гьаци дарин?

¹⁵ Эгер чвуччвуз, ясана чуччуз алабхьуз палат, ясана ипӀуз уьл адарш,

¹⁶ хъа учвкан сари: «Гъарах мясляаьтниинди. Яшамиш йихь манишнаъ ва тухъди!» – дупну, фукӀа-мукӀа дугъаз адрубдикан тутрувиш, мушваъ фу шул?

¹⁷ Ари гьамци, эгер хъугъувал лайикь вуйи ляхнариинди улупдарш, хъугъувал дубкӀнайи гьисаб ву.

¹⁸ Сари пуз мумкин ву: «Увуз хъугъувал авуз, хъа узуз – ляхнар! Ляхнар дарди яв хъугъувал гьан, улуп узуз! Хъа узу увуз йиз ляхнариъ рябкъюрайи йиз хъугъувал улупидизавуз».

¹⁹ Уву Аллагь сар вуйивалихъ хъугърана? Ужуйи апӀурава! Гьеле жинарра хъугъра ва гукӀунди йихура.

²⁰ Эй ичӀи инсан! Увуз ляхнариинди дару хъугъувал файдасуз вуйивал аьгъю дубхьну ккундийвуз?

²¹ Хъа ихь абйирин аба Ибрагьим, чан бай Исакь, гъурбан апӀрушвʼина гъахиган, чан ляхнариинди гьякь гъапӀундайинхъа?

²² Рябкъюрайвуз, дугъан хъугъувал ляхнариинди шуйи ва ляхнарин кюмекниинди дугъан хъугъувал гьубкӀуб гъабхьну.

²³ Ва гьамци, Гирами бикӀбариъ дибикӀнайиб тамам гъабхьну: «Ибрагьим Аллагьдихъ хъугънийи ва, чан хъугъувализ дилигну, думу гьякь гъапӀнийи» ва гьаддиз, дугъаз Аллагьдин дуст гъапнура вуйи.

²⁴ Рябкъюрайчвуз, Аллагьдин улихь адми, неинки саб хъугъвалиинди, хъа чан ляхнариинди гьякь апӀура.

²⁵ Гьаци гъабхьну качʼвал кайи Раавдихъдира. Дугъу, чпин шагьур ахтармиш апӀури гъафидар, кьабул дапӀну, жара рякъди гьаиган, думу чан ляхнариз дилигну, гьякь гъапӀундайинхъа?!

²⁶ Ари гьамци, рюгь адру беден фици дубкӀну шулуш, хъугъувалра, ляхнар даруган, дубкӀна.