Якьубдин 1 - Гирами Китаб

Хъугъвал ва аькьюл

¹ Аллагьдин ва Агъа Иса Месигьдин лукӀ Якьубдихьан вари дюнʼя вуйибси дарагънайи Израилин йицӀикьюб тухмин Аллагьдин адмийириз – саламар!

² Йиз гъардшар, учвʼин гьар жюре читинвалар алахьруган, учву лап бахтлу касарси гьисаб апӀинай,

³ фицики, ичв хъугъувал читинвалариантина удубчӀвруган, сабурлувал арайиз гъюруб аьгъячвуз.

⁴ Ва гьамциб сабурлували чан ляхин кӀулиз адабгъну ккунду, гьамдиинди учву гьуркӀдар ва тамамдар шулачва, учвуъ камивал хьибдар.

⁵ Эгер учвкан шлиз аькьюл гьубкӀрадарш, дугъу, гьяйиф ктарди багъиш апӀру ва камивалар дарагру Аллагьдикан тӀалаб апӀри ва Аллагьди дугъаз тувди.

⁶ Хъа учву хъугъвал ади тӀалаб дапӀну ккунду, саб шак адарди, фицики, шаклу шлур, микӀру гьипнайи ва ибикьурайи гьюлин лепейиз ухшар ву.

⁷ Мицир касди, Агъайихьан фукӀа-мукӀа шулиз кӀури, фикир дарапӀри.

⁸ Шаклу вуйири кьюбдикан фикир апӀури шулу, думу чан ляхнариъ ижмир шулдар.

Гьякь девлетнакан

⁹ Касибвалиъ айи гъардаш Аллагьдин улихь учв заан вуйивалиин фурслуди ккунду.

¹⁰ Хъа девлетлур чан мютӀюгъвалиин фурслуди ккунду, гьаз гъапиш, думу, чӀурдин кюкюси, жвартӀ хьиди.

¹¹ Ригъ гьудубчӀвуру ва убцрушин абхъру. Убцрушнаан укӀ чубхуру, дидин кюкю алдабхьуру ва дидин уччвувал йибкӀуру. Гьамдиз ухшарди девлетлуйирра, чпин вари ляхнарра хъади, терг хьиди.

¹² Читинвалариъ ахърур хушбахтавар ву. Читинвалариан Аллагь ккунди удучӀвуриз, Аллагьдихьан, Чав Гаф тувнайиси, гьаргандин уьмрин таж рубкьиди.

¹³ Читинвалариъ ахъру сарира «Му читинвалар Аллагьди гьаънайидар ву» дупну ккундар, фицики Аллагьдин писваларихъди вуйиб гьич фукӀара адар ва саризра читинвалар гьаъдар.

¹⁴ Хъа гьарсар кас чан тямягьяри зигура, хъа ккаъра ва дючӀюркьну гъитра.

¹⁵ Тямягьну, дишагьлийикси, гунагь кибшру ва апӀуру, хъа гунгьи, ликриин гъабшиган, аьжал хуру.

¹⁶ Йиз масан гъардшар, учву учвуз кучӀлар апӀрубси мапӀанай.

¹⁷ Гьарсаб ужувлаз апӀурайи ляхин ва гьубкӀну вуйи хъуркьвал заълан, Аллагьдихьан, аьршарин акв арайиз гъабхи Адашдихьан вуйиб ву. Аллагь гьаммишан сабсир ву ва гьюдюхрур дар.

¹⁸ Дугъу Чан гьякь вуйи Гафналантина, Чав халкь гъапӀубдик варибдик варитӀан заан вуйидар хьпан бадали, ухькан Чаз веледар ктаъну. Хъпехъуз ва кӀул ккивуз аьгъю йибхьай.

¹⁹ Йиз масан гъардшар, гьаммишан гафар апӀузтӀан – кӀурубдихъ хъпехъуз гьяракатнаъ йихьай ва хъял кубчӀвуз гьялак махьанай,

²⁰ даршиш, инсандик хъял кайивали Аллагьдиз ккуни дугъривал хурдар.

²¹ Гьаци вуйиган, учву апӀурайи ляхнариъ писваларихьанна гьякьсузваларихьан ярхла йихьай ва ичв кӀваъ урзурайи Аллагьдин аьгъювалар мютӀюгълуди кьабул апӀинай, фицики гьаму аьгъювалари ичв рюгьяр уьрхиди.

²² Аллагьдин гаф тамам апӀинай, хъа эгер учву думу деебхьнутӀан гъибтдарш, учву учвуз кучӀлар апӀурачва.

²³ Эгер шли, Аллагьдин аьгъювалариъ кӀурайидар дарапӀри, деерхьнутӀан гъитрадарш, думу гюзгдиан чан маш рябкъюрайириз ухшар ву.

²⁴ Думу чаз дилигну гьудучӀвиди ва гьадму гагьди, учв фицир вуш, кӀваълан гьархди.

²⁵ Хъа, азадвал хру варитӀан заан вуйи Аллагьдин закон кӀваантӀан аьгъю апӀрур ва кӀваълан гьадрапӀри гьаддихъди чан ляхнар кӀулиз адагърур, чан ляхнариъ бахтлу хьиди.

²⁶ Эгер шли учв дугъри вуза кӀури фикир апӀураш, хъа чан мелзнан эйсивал апӀуз аьгъдарш, дугъу чав чаз кучӀлар апӀура ва дугъан дугъривал файдасуз ву.

²⁷ Аллагьдизна Аьршарин Адашдиз ккуни чиркин дару марцци дугъривал – касибвалиъ айи ачӀни хпаризна йитимариз кюмек апӀувал ва жвув гьаму дюнʼяйин чиркинвалариккан уьрхювал ву.