Тимофейиз-2 3 - Гирами Китаб

Аьхиримжи йигъар

¹ Ва сабсана аьгъю йибхь, аьхиримжи вахтари гъагъи йигъар улуркьиди.

² Адмийириз, чпина пултӀан ккунди гъубзидар, чпин тярифар апӀрудар хьиди, хъюхъ дазабгну лицрудар хьиди, ушвниин чӀуру гафар алидар хьиди; абйир-бабарихьна гьюрмат гъубзидар, чухсагъул кӀурудар хьидар, инсанарин юкӀвариъ гирамивал гъубзидар.

³ Адмийир юкӀв адрудар, мясляаьтнахъна дяргърудар, футнакрар, сабур адрудар, инсафсузар, ужувлан душмнар,

⁴ масу туврудар, фикирсузди гьяракат кайидар, ацӀу гафар кайидар хьиди, дурариз АллагьтӀан кьукьар апӀуб артухъ ккун хьибди.

⁵ Зиълан чпи Аллагьдихъ хъайиганси улупиди, хъа айтӀан дурар Аллагьдин кьувватну дигиш апӀидар. Гьацдарихьан ярхлади гъуз.

⁶ Дурарин арайиъ гьацдар адмийир аки, чпиина хъугъʼвал дубхну, жара хизанариъ учӀврудар, дурари гъавриъ адру, гунгьари ккачӀакӀнайи дишагьлийир алдатмиш апӀиди, хъа дишагьлийири гьадрарин гьубкьу жюрейин тямягьар гьуркӀри хьиди.

⁷ Думу дишагьлийирихьан, дурарин дарсар гьаммишан урхури шулушра, гьич фицикӀа гьякь абгуз хьибдар.

⁸ Мусайиз къаршу удучӀву Янесна Янбресси, гьаму адмийирра маар адрудар, кучӀлин хъугъувал айидар, гьякьʼвалихъди гьюжатариз гъудужврудар ву.

⁹ Хъа дурар чпин метлебарихъ хъуркьидар: дурар вари (Мусайихъди гьюжатнаъ гъахьидарси), ахмакьар вуйивал ачухъ хьибди!

Аьхиримжи насигьятар

^10-11 Гьамус уву гьам урхбаъ, гьам уьмриъ, гьам метлебар кӀулиз адагъбаъ, гьам хъугъувалиъ, гьам аьгь апӀбаъ, гьам масанвалиъ, гьам ижмивалиъ, узʼин Антиохияйиъ, Иконияйиъ ва Листрайиъ алахьу хъергувалариъ ва аьзабариъ узу кӀуруб апӀури гъахьунва. Гьаму вари хъергувалар узу аьгь гъапӀунза, ва варибдиккан Агъайи узу ккадаъну!

¹² Месигь Исайихъди гирамиди яшамиш хьуз ккуни гьарсариз гьацдар хъергувалар ккилигура.

¹³ Хъа пис адмийирна алдатмиш апӀрудар исина-исина кучӀлин кьарнаъ арсди, дурари чпихъди имбударра алдатмиш апӀиди.

¹⁴ Уву гьарган яв хъугъувал алибдихъди ва увуз улупубдихъди гъуз. Увуз аьгъявуз му вари увуз Шли улупнуш.

¹⁵ Гьеле бицӀидимиди увуз Гирами китабар аьгъявуз, ва гьадму Китабари Месигь Исайихъ хъугъувалилантина уьрхювалихьна гъахру аькьюл тувунвуз.

^16-17 Гьарсаб Гирами китаб Аллагьдин Рюгьниинди вуйиб вуйиган, думу хайирназ ву: Китабари, Аллагьдин адми ужувлан гьарсаб ляхниз гьуркӀну гьязур хьпан бадали, аьгъювалар гъадагъуз, жиниди айи писвалар ачухъ апӀуз, гъалатӀар ктагъуз, дюз рякъюхъ хъауз кюмек апӀура.