Тимофейиз-2 2 - Гирами Китаб

Хъугъувал али Месигь Исайин адми

¹ Гьаци, йиз бай, Аллагьдин ужувлаан кьувват адабцӀ, думу ухьуз, Месигь Исайиъ сатӀи вуйиган, туврайиб ву.

² Увуз узкан гъеебхьуб гизаф адмийирин улихь жарадаризра гьаци улупуз удубкьру хъугъвал али касарин арайиъ кидибт.

³ Месигь Исайин дугъри эскерси, яв пай аьзаб гъадабгъуз гьязурди гъуз.

⁴ Гьич сар эскерра хулан ляхнарихъ шулдар – дугъан вазифа, чан аьхюри гъапиб апӀуб ву.

⁵ Я гьич сар талитчийиз, талитнан къайдйир гъючӀюргъиш, пешкеш тувидар.

⁶ Гьаци нежберра ву: амкӀ ккудубзури гъилиху дугъаз чан пай мягьсул сифте ражну дурубкьну ккунду.

⁷ Узу гъапибдикан фикир апӀин – Агъайи варибдин гъавриъ ахъуз кюмек апӀидивуз.

⁸ Давуддин тухмиан удучӀву, дукӀну чӀиви гъахьи Иса Месигь кӀваин апӀин. Узу рабгъурайи Хабарнан мяна гьаддиъ а.

⁹ Гьадму Ужувлан хабар бадали узу балайикк ккахъназа, тахсиркарси, зунжрариъ аза. Хъа Аллагьдин Хабар зунжрариъ дибтӀуз шлуб дар!

¹⁰ Гьаддиз узу, кадагънайидар бадали, Месигь Исайихъди сатӀи вуйидариз, гьаммишандин адлувалра хъади, чпиз уьрхювал рубкьбан бадали вари аьгь апӀураза.

¹¹ Гьаму гафар гьякь ву: эгер ухьу Дугъахъди гъийихнуш, Гьадгъахъди яшамишра хьидихьа.

¹² Эгер аьгь апӀураш, Дугъахъди паччагьвалра апӀидихьа. Эгер ухьу Дугъхьан гьудучӀвиш, Думура ухьхьан гьудучӀвиди.

¹³ Эгер ухьу дугъриди гъудрузиш, Думу дугъриди гъузди, фицики Думу Учв Чахьан гьудучӀвидар!

Аллагьди кадагънайи гъуллугъчи

¹⁴ Гьаму вариб адмийириз кӀваин апӀбаъ яваш ва инжик махьан. Аллагьдин улихь дурарикан гьюжаткарвал дебккуб ккун апӀин. Дурарихъ хъпехърудариз, аьжалихъна хувалтӀан, хайир адар.

¹⁵ Аллагь увкан разиди гъитруси, диш рякъди гъярайи касси, гьич сабдихьанра нач даршлу гьякьвалин гаф деебтури, яв хилʼан удубкьруб вари апӀин.

¹⁶ Хъа ичӀи ва аллагьсуз лягълягъярихьан гьудучӀв. Фицики дурари адмийир Аллагьдихьан ярхла апӀура. Чпин хътругърувалариъ дурарин хъуркьувалар артухъ хьиди.

¹⁷ Дурарин каламарра, кубчӀвру аьзарси, даргъиди. Дицдарин арайиъ Филетна Гименейра ахьна.

¹⁸ Дурар гьякь рякълан улдугна. Дурари, гъийихдар чӀиви духьна, кӀура. Гьамци кӀури, дурари сакьюдарин хъугъувал чӀюбгъюра.

¹⁹ Хъа Аллагьди ккивнайи бин мюгькамди дийибгъна, ижмиб ву. Дидʼин гьамци кӀури, лишан алабсна: «Аллагьдиз Чандар аьгъя». Ва хъана: «Гьарсари, Агъайин ччвур бисрури, гьич чӀуруб дарапӀри!»

²⁰ Аьхю хулаъ, гъизилинна арсранси, гакӀвлинна ругдин гъабарра а. Гьюрматлуди ишлетмиш апӀру багьа гъабарра а, аьдатнан гьяжатназ – ужуз гъабарра.

²¹ Вари чӀурубдихьан марцц гъахьир гьюрматлу гъаб хьиди: дицир кас гирами дапӀна; Эйсийи гьадму ишлетмиш апӀиди, думу гьаммишан гьарсаб ужувлан ляхниз гьязурди гъубзди.

²² Жигьилвализ хас вуйи тямягьярихьан ярхла йихь ва, Агъайихьна марцци юкӀвариинди илтӀикӀрударихъди сабси, дюзвалихьна, хъугъувалихьна, масанвалихьна, мясляаьтнахьна варидарихъди гьачӀаркк.

²³ Ахмакъ ва абдал гьюжатарихьан ярхла йихь, увуз аьгъявуз: дицдар гьюжатар элегбариинди ккудукӀуру.

²⁴ Агъайин гъуллугъчийиз гьюжатаригъ гъючӀвуб лайикь дар. Думу варидариз гъюдлир ва ужур, аьгъювалар улупуз аьгъюр духьну ккунду. ЧӀурувал кӀваъ гъибтну ккундар,

²⁵ жвуваз къаршу удучӀврур гъюдалди дюз алаъ. Белки Аллагьди дурариз гьякьʼвал аьгъю хьпан бадали чпи гъапӀубдиин швумал хьуз хъана мумкинвал тувур,

²⁶ дурарра хъиргди, ва, чан ниятназ мютӀюгъ дапӀну, иблисди йисирвализ гъадагънайи гьарсар азад хьиди.