Тимофейиз-1 5 - Гирами Китаб

Вазифйир, яни жвуву гьапӀну ккундуш

¹ Яшлу адмийириз хъжагъру саягъниинди макӀан, яв адашси, гъавриъ тӀаъ. Жигьил адмийирихъди, яв гъардшарихъдиси, гафар апӀури йихь.

² Аьхю дишагьлийир – дадйирси; жигьилдар чйирси дис, дурарихъди вуйи яв аьлакьйир лап марццидар шлуси гъуз.

³ Гьич саб терефнаанкьан кюмек имдру ачӀни дишагьлийирин гъайгъу зиг.

⁴ Эгер ачӀни дишагьлийиз баяр-шубар, ясана хтулар аш, дурари чпин хъугъувал ляхниъ улупри, чпин хизандинна абайир-бабарин гъайгъу зигури. Му Аллагьдиз кбалгру ляхин ву.

⁵ Хъа гьякь ачӀни дишагьли, яни фужкӀа хътрур сар Аллагьдихъ йирфар хъирчнайир ва, йигъ-йишв ккарагури, Дугъкан кюмек ккун апӀурайир ву.

⁶ Хъа кефер апӀурайи ачӀни дишагьли чӀивидимиди дукӀнайи гьисаб ву.

⁷ Гьич саб жюрейин тягьнийир дархьбан бадали, хъугърудариъ тӀапӀ.

⁸ Жвуван багахьлуйирин, сифтена-сифте жвуван хизандин гъайгъу ктрур, хъугъувалихьан гьудучӀвнайир ву ва хътругъруртӀан ужуз ву.

⁹ ЙирхьцӀур йислан зиина яш дубхьнайи ва саб ражаритӀан швувахь дархьи ачӀни дишагьлийиртӀан хъугърударин гъайгъушнаъ махьан.

¹⁰ Думу дишагьлийин ужудар ляхнар аьгъю ишри: бицӀидар вердиш гъапӀу ва хялар кьабул гъапӀу, хъугъру гъардшарин ликар гъижикӀу, читинвал алабхъдариз кюмекнаъ ва гьарсаб ужудар ляхнариз бахш гъашир.

¹¹ Жигьил ачӀни дишагьлийир думу гьисабнак макаан, гьаз гъапиш чпин юкӀв хъипнайивал Месигьдихьан ярхла шлурихъ дурариз швуваз гъягъюз ккун хьибди,

¹² ва, чпи сифте Аллагьдин улихь туву гаф чӀюбгъюри, дурари чпин суд апӀура.

¹³ Мидихъди сабси, лихурира адруган дурар гагь-гагьнак давди вахт адапӀуз вердиш шула, хулариан-хулариз ккажагъуз хъюгъра, футна либхура, жарадарин ляхнаригъ гъючӀвра, лазим дарубдикан улхури шулу.

¹⁴ Гьаци вуйиган, узу жигьил ачӀни дишагьлийирикан швуваз гъягъюб, бицӀидар апӀуб, чан хулахъ зегьмет зигуб ва душмнар чпикан чӀуруди дулухруси апӀуб ккун апӀураза.

¹⁵ Гьаз гъапиш гьацдарикан сакьюдар, жвуван хъугъувал дипну, иблисихъди гъушну.

¹⁶ Эгер ачӀни дишагьлийириз хъугъру багахьлуйир аш, хъугърудариз артухъ гъагъ дархьуз, дурарин гъайгъу багахьлуйири зигри. Гьадмуган дугъридан кюмек адру ачӀни дишагьлийириз хъугърударихьан кюмек апӀуз хьибди.

¹⁷ Ужуди аьхювал апӀру касариз хъугърударин артухъ гьюрмат ади ккунду, иллагьки Ужувлан хабар рабгърудариз вая аьгъювалар улупрудариз.

¹⁸ Гьаз гъапиш Гирами китабари кӀура: «Гад апӀури, раццʼин али йицран ушв миилибтӀан» ва «Лихрур кьиматназ лайикь ву».

¹⁹ Хъугърударин аьхюрилан аьрз апӀуради гъабшиш, кьюр вая шубур шагьид хътарди, кьабул мапӀан.

²⁰ Хъа гунгьар апӀрур, имбударизра дарс хьузди, варидарин улихьна адагъ.

²¹ Аллагьдин, Иса Месигьдин ва кадагънайи малайикарин улихь увкан ижмиди ккун апӀураза: гьаму узу гъапидар кьабул дапӀну, саризра майил мапӀан; сарин тереф дибисну, тмунуриз миилзиган.

²² Жарадарин гунгьарин иштиракчи махьан. Хъугърударин аьхюдарин жергйириз гьялакди фужкӀара макадагъан. Марцциди гъуз.

²³ Саб шидтӀан дурубхъди мугъузан, яв фунин уьзриз ва кми-кмиди шлу иццрушнариз цӀибди чяхирра ишлетмиш апӀури йихь.

²⁴ ГьацӀарин гунгьар, суддин Йигъ гъяйиз гьамустӀанра рякъюра, хъа гьацӀарин – кьяляхъна ачмиш хьиди.

²⁵ Гьаци ужудар ляхнарра ву: гьацӀар гьамустӀанра рякъюра, хъа дярякърайидар кьанди арайиз удучӀвиди.