Тимофейиз-1 4 - Гирами Китаб

Тимофейиз насигьятар

¹ Аллагьдин Рюгьну ачухъди кӀура, аьхиримжи вахтари, хъугъувал дипну, гьацӀар гьудучӀвиди, дурари кучӀлин рюгьярин ва жинарин каламарин тереф бисиди.

² Дицдар каламар, намус дудубгнайи, кью-кьюбди машар гъивнайи кучӀляхяриланмина гъиди.

³ Дурари швушвар хуз гъадагъа апӀура. Дурар, гьякьвал агъюдарина хъугърудари баркаллагь кӀури, ипӀбан бадали Аллагьди халкь дапӀнайи саб жюре итӀрудар митӀанай, кӀури, хъюгъна.

⁴ Аллагьди арайиз дубхнайиб вари ужу ву. Баркаллагь кӀураш, вари кьабул апӀуз шулу.

⁵ Гьаз гъапиш думу вари Аллагьдин гафну ва ккарагбу гирами апӀура.

⁶ Эгер уву, Тимофей, гъардшариз гьацдар кӀури гъабшиш, уву хъахънайи сагъ аьгъюваларин ва хъугъувалин гафари ацӀрайи Иса Месигьдин ужур гъуллугъчи хьидивукан.

⁷ Кьаби хпариз лайикь вуйи махъварихъди вахт давди маадапӀан, хъа гьарган хъугъувалин тӀалабарихъ йихь.

⁸ Бедендиз вуйи гьяракатарикан сацӀиб мянфяаьт а, хъа хъугъувалин тӀалабарихъ хьуб варибдиъ мянфяаьтлу ву, фицики диди, гьамусси, гъюру вахтариъра уьмур тувди.

⁹ Му гаф дюз апӀуб ва кьабул апӀуб лайикь ву.

¹⁰ Гьаддин бадали ухьу лихурира ахьа, гьаддихьна гьачӀарккурира ахьа, гьаз гъапиш умуд чӀиви Аллагьдик кайихь, хъа Думу вари адмийир Уьрхрур ву, иллагьки – Чаин хъугъвал алидар.

¹¹ Адмийириз магьа гьамдихьна дих апӀин ва гьамдикан аьгъювалар улуп.

¹² Увухьинди, уву жигьил ву кӀури, гьясппикк ккадру саягъниинди, фужкӀара лигуз мигъитан. Хъугънайидариз уву гьам гафариъ, уьмриъ, масанвалиъ, хъугъувалиъ ва гьам марццишнаъ чешнеди гъуз.

¹³ Узу гъяйиз хъугърударин улихь Гирами китабар ерхьури урх, Ужувлан хабар ктибтури апӀин, аьгъювалар улупру мялим йихь.

¹⁴ Хъугърударин аьхюдари увʼин хилар иливуйрайиган увуз гъапи пайгъамбарвалин гафариланмина гъабхьи багъиш увхьан ярхла мапӀан.

¹⁵ Яв гъуллугъ юкӀв хъади апӀин, дидиз гьуркӀну бахш йихь, ва гьадмуган варидариз яв хъуркьувалар рякъиди.

¹⁶ Яв увʼин ва уву улупурайибдиин ул алди гъуз. Гьаму аьгъюваларихъан ижмиди хъичӀих, фицики гьамци апӀури, увура ва увухъ хъпехъурайидарра уьрхидиву.