Тимофейиз-1 3 - Гирами Китаб

Хъугърударин аьхюдар

¹ Дишди кӀура: шлиз хъугърударин аьхюр хьуз ккундуш – баркаллагь чаз!

² Аммаки аьхюр кипуз саб тягьна ктру уьмрин адми духьну ккунду: саб ражаритӀан швушв дархир, сабурлур, аькьюллур, намус кайир, хялар ккунир, аьгъювалар улупуз удукьрур,

³ дурубхърур, элелегрур, хъа гаф-чӀалнаъ гъюдлир, хъюхъ дазрабгрур, пулиъ ул адрур.

⁴ Дугъу чан хал-хизан ужуйи гьюле гъабхури ккунду, хъпехъру ва чан гьюрмат уьбхру баяр-шубар ади ккунду.

⁵ Хъа чан хулан эйвал апӀузкьан даршлурихьан Аллагьдин хъугърударин гъайгъу зигуз шулин?

⁶ Тазади хъугъну имбударикан аьхюр ктагъну ккундар: дицир адмийик фурс кубчӀвди ва, иблисдинси, дугъанра суд апӀиди.

⁷ Хътругърудар дицир касдикан, кьяляхъ тягьнийир дархьуз ва иблисди ккиву чулиъ адрахъуз, ужуйи улхури ккунду.

⁸ Гьаму дурарин кюмекчйиризра кайиб ву. Дурар гьюрмат айи, кьюб маш гъядру, чяхрихъ юкӀв хъадру ва пулиъ ул адру касар духьну ккунду.

⁹ Дурари, марцци намус ади, хъугъувалин сирар дидисну ккунду.

¹⁰ Сифте дурарра ахтармиш дапӀну ккунду, ва, эгер дурарихъ «рижв» хътрибшиш, гъит кюмекчивалин гъуллугънаъ гъузри.

¹¹ Аьхюдарин кюмекчйирин хпарра гьюрматназ лайикьдар духьну ккунду, футнийир дарагърудар, тямягьяриъ адрахърудар, варибдиин хъугъвал алидар.

¹² Аьхюрин кюмекчира саб ражаритӀан швушв духну адрур ва чан хал-хизан ужуди кӀули гъабхрур духьну ккунду.

¹³ Гьаз гъапиш чан гъуллугъ ужуди тамам апӀрури гьюрматра гъазанмиш апӀуру, ва Иса Месигьдикан вуйи чан хъугъуваликан дугъхьан, саб гучӀ адарди, ктибтузра шулу.

¹⁴ Багарихьди увухьна гъюз кказа, хъа му узу увуз,

¹⁵ нагагь узу кьан апӀруси гъабшиш, Аллагьдин хизандиъ жвув фици духьну ккундуш, увуз аьгъю хьпан бадали бикӀураза. Думу хизан – чӀиви Аллагьдихъ хъугъру гирами халкь ву. Думу халкь – мюгькам бин ва дебккрайи гьякьвал ву.

¹⁶ Саб гаф адарди ихь хъугъувалин сир зурба ву: Думу бедендиъди гъафну, Рюгьну гьякь гъапӀну, Думу малайикариз гъяркъну, Дугъкан халкьариз ктибтну, Думу дюнʼяйиъ хъугъувалиинди кьабул гъапӀну, Думу адлуди завариз за гъахьну.