Тимофейиз-1 1 - Гирами Китаб

КучӀлин аьгъюваларикан

¹ Ухьу уьрхру Аллагьдин ва ихь умуд кайи Месигь Исайин амриинди кадагънайи Иса Месигьдин вакил Павелихьан

² хъугъувалиъ йиз гьякь бай Тимофейиз – ужʼвал, рягьим ва мясляаьт увуз Адаш Аллагьдихьан ва Иса Месигь ихь Агъайихьан!

³ Македонияйиз гъярайири, увкан Эфесдиъ гъузуз ижмиди ккун гъапӀнийза. Уву душваъ кучӀлин аьгъювалар рагъурайи сакьюдар касар дерккну ккундийзуз.

⁴ Чпин вахт дурари гьубкьу жюрейин махъварихъди ва ккудудукӀру архйир агури гьадрапӀри. Миди арайиз хрудар гьюжатартӀан дар, хъа хъугъували арайиз хурайи Аллагьдин ляхин улихь гъабхурадар.

⁵ Гьаму йиз тӀалабнан метлеб – марцци кӀваан, гъяни намуснаан ва дугъри хъугъувалиан удубчӀвурайи масанвал вуйиз.

⁶ Сакьюдар, гьаму вари дипну, файдасуз гьюжатариъ ахъна.

⁷ Дурариз Къанун кивру мялимар хьуз ккунди а, аммаки дурар я чпи кӀурайибдин, я чпи гьадмукьан ижмиди ктибтурайибдин гъавриъ ахънадар.

⁸ Къанун ухьуз агъяхьуз: думу ужуб ву, эгер дюзди ишлетмиш апӀури гъашиш.

⁹ Ухьуз гьацира аьгъяхьуз: Къанун дугъридариз ваъ, хъа – гьадму законар чӀюргърудариз ва мютӀюгъ даршлудариз, аллагьсузариз ва гунагькрариз, фукӀара гирамиб адрудариз ва хътругърудариз, адашдин вая дадайин уьмриин хил иливрудариз, йивну йикӀрудариз,

¹⁰ кьяппавалиъ айидариз, жилир жилирихъ хъайидариз, адмийир лукӀʼвализ масу туврудариз, кучӀляхяриз, кучӀалди шагьидвал апӀрудариз ва дюз аьгъювалариз къаршуди удучӀврудариз ву.

¹¹ Му аьгъювалар гьарсаб тярифназ лайикь вуйи Аллагьди узʼин илипнайи Ужувлан хабарнахъди сабси гъюру.

Аллагьдин ужувлаз баркаллагь

¹² Узуз кьувват туву ихь Агъайиз, Месигь Исайиз чухсагъул кӀураза. Дугъу узʼин ихтибар дапӀну, гъуллугъ илипунзуин.

¹³ Мугагьназ Агъайиз люкьнар апӀуйза, хъугърударихъ хъергуйза, вягьшисир вуйза. Аллагьди узлан хил алдабгъну, гьаз гъапиш, узу йиз аьгъдрувалиан ва хътругърувалиан гьаци апӀури гъахьунза.

¹⁴ Хъа, Иса Месигьдик ктикьхъан, рябкъру масанвална хъугъвал хъайи ихь Агъайин ужʼвал Аллагьди узʼин бегьем улубзну.

¹⁵ Дюз ва гьякь ву гьаму гафар: гунагькрар уьрхбан бадали, Месигь Иса дюнʼяйиз гъафну, хъа дурарикан вартӀан аьхю гунагькар узу вуйза.

¹⁶ Аммаки Иса Месигьди гьамциб ужʼвал узуз, сарпирди, Чан сабурлувал фукьан зурба вуш дябкъну, имбударра хъугъуз ва дурариз гьаргандин уьмур рубкьуз, улупну.

¹⁷ Гьаци вуйиган, гъит гьаргандин Паччагьдиз, аьжал Хътруриз, Дярякъруриз ва Сар вуйи Аллагьдиз аьсрариан аьсрариз гьюрмат ва ад ибшри! Амин.

¹⁸ Тимофей, йиз бай, увкан дупнайи пайгъамбарвалин гафар кӀваин алди, магьа гьамцдар насигьятар дикӀуразавуз; гьадрарихъди гъяри гьякьвал бадали

¹⁹ жвуван хъугъувал ва марцци намус уьбхюри, уву хай кайи дяви дубхну ккундузуз. Сакьюдар намуснахьан гьидицну, ва ахириъ дурарин хъугъувалин гими ккабхъну.

²⁰ Гьацдарин арайиъ Гименейна Эскендер а; узу дурар, Аллагь беябур дарапӀди яшайиш дубгъуз, иблисин хилиъ ивунза.