Рим агьларихьна вуйи кагъаз 9 - Гирами Китаб

Аллагь ва жугьдар

¹ Месигьдин гьякьнииндира гьякь кӀураза. Узу кучӀлар апӀурадарза, Гирами Рюгьну абцӀнайи йиз намус узуз шагьид ибшри:

² йиз кӀваъ зурба дерд ва кудудубкӀру иццрушин айиз.

³ Йиз гъардшар, йиз миллет уьрхбан бадали, Узу Месигьдихьан гьудучӀвузра гьязур вуза.

⁴ Йиз миллет Израил халкь ву. Дурариз Аллагьди Чан веледар кӀура. Аллагьдин ад, Аллагьдихъди гъийитӀу йикьрар, Мусайин Къанун, Аллагьдиз гъуллугъ апӀувал ва Аллагьдин Гаф гьаму халкьдиз тувнийи.

⁵ Гьамрар ву ихь зурба абйирин наслар. Гьамрар ву варибдин зиин Аллагь вуйи, аьсрариан аьсрариз ужувлакк ккайи Месигьдин жилин хизан. Амин!

⁶ Хъа му, Аллагьди Чав тувнайи гаф тамам гъапӀундар, кӀуру гаф дар. Дарди хьуз, Израиликан гъахьидар гьякь вуйи израил халкь ву, хъа вари ваъ.

⁷ Гьеле дурар Ибрагьимдин наслар вушра, сабан, мици хьувалиинди, дурар вари Ибрагьимдин гьякь наслар дар. Фицики, Аллагьди гъапиганси, «Яв гьякь наслар ИсакьдикантӀан хьидар».

⁸ Му гьаци кӀуру гаф вуки: Ибрагьимдилан бабкан гъахьи вари наслар Аллагьдин гьякь веледар дар, хъа анжагъ Ибрагьимдиз туву Аллагьдин гафналантина гъахьи веледар гьякь веледар ву.

⁹ Туву гафнаъ магьа фу кӀураш: «Улупнайи вахтна Узу гъидиза ва Сарайиз бай хьиди».

¹⁰ Хъа му сабан вариб дар. Гьацира Ревекайиз баяр айи ва дурарин сар адашра вуйи – ихь аба, Исакь.

^11-12 Ва кьюрид баяр бабкан хьайиз, дурари фукӀа-мукӀа ужуб, я харжиб апӀайиз улихьна, Аллагьди Ревекайиз гъапну: «Аьхюну бай бицӀирнурин гъуллугънаъ хьиди». Аллагьди мици дурар бабкан хьайиз улихьна гъапнийи, гьаз гъапиш, Аллагьди кадагънайи бай, Чав ният дапӀнайиганси кадагънайир хьпан бадали, хъа бали чав гъапӀубдиинди кадагъну дархьбан бадали.

¹³ Гирами китабариъ дупнайиси: «Узуз Якьуб ккун гъахьунзуз, хъа Исаф – даккун».

¹⁴ Гьамус фу пухьа? Аллагь дюз дарур шлуб дарки, гьаци дарин? ИкибаштӀан, шлуб дар!

¹⁵ Фицики, Дугъу Мусайиз гъапну: «Узу Узуз ккунириз ужʼвал дебккдиза ва Узу Узуз ккунирин язухъ зигидиза».

¹⁶ Гьаддиз, адмийирикан шлиз, чан тӀалабариз вая гъапӀу ляхнариз дилигди, ужʼвал апӀуруш, Аллагьди Чав гьял апӀуру.

¹⁷ Гирами китабариъ дупнайиси, Аллагьди Египетдин паччагьдиз гъапну: «Увлантина варидариз Йиз кьувват улупбан ва Йиз ччвур вари дюнʼя вуйибси рабгъбан бадали, увкан паччагь ктаур Узу вуза».

¹⁸ Магьа гьамци Аллагьди, Чаз ккуниси, сариз ужʼвал апӀуру, сарик хъял капӀру.

¹⁹ Мумкин ву, учву узуз гьамци пубра: «Эгер Аллагьди ихь ляхнариин аьхювал апӀураш, гьаз Дугъу ухьу тахсиркрар апӀура? Аллагьдин ниятариз фуж къаршу удучӀвидихъа?»

²⁰ Уву фуж вувахъа, инсан, Аллагьдихъди гьюжатар апӀуз? Мутмуйи учв гъапӀурихьан гьерхдар, аьхир, узу гьамциб уву гьаз гъапӀунва, кӀури?

²¹ БатӀур гъабар апӀрурин хилиъ адаринхъа? Дугъу чаз ккун гъабшиш, гьадму гъурдсиб батӀрикан багьайин гъаб, ясана ужуз гажин апӀуру.

²² Аллагьдиз Чан хъял улупуз ва Чан кьувват улупуз ккун гъабхьну, аммаки хъял капӀру, тӀанкь апӀуз гьязур вуйи ляхнар Дугъу сабурлуди аьгь гъапӀну.

²³ Дугъу мици Чан ккудудубкӀру ад, рягьимлувализ лайикь вуйи ва адлувал кьабул апӀуз гьязур дапӀнайи касариз улупуз гъапӀундайкӀан, яраб?

²⁴ Гьадму касар ухьу вухьа. Дугъу ухьу неинки жугьдаригъян, хъа миди вуйи халкьаригъян, дих дапӀну, гъядягъну.

²⁵ Гирами китабарикан Осийин китабдиъ дупна: «Йиз халкь дарудариз Узу Йиз халкь пидиза, ва Узуз даккнириз Йиз ккунир пидиза».

²⁶ «Аллагьди: „Учву Йиз халкь дарчва“ гъапи гьадму йишвʼин дурариз чӀиви Аллагьдин веледар пиди».

²⁷ Ишаяйира Израилин халкьдихъанди гьарай апӀура: «Гьеле Израилин веледарин кьадар гьюлин кӀанаъ айи гъумкьан вушра, дурарикан цӀиб кьадартӀан уьрхидар,

²⁸ фицики Аллагьди Чан ахиримжи суд адмийирин зиин ухди апӀиди».

²⁹ Ва Ишаяйи улихьмиди гъапиганси: «Эгер Вариудукьру Агъайи ухьуз наслар гъитундайиш, ухьуз шлубра Содом ва Гомор шагьрариз гъабхьиб хьибдийи».

³⁰ Гьамус фу кӀуру? Гьякьвал дарабграйи жара миллетариз чпин хъугъувалилантина гьякьвал гъабхьну.

³¹ Хъа Къанун тамам апӀури гьякьвал абгурайи Израилин халкьдиз гьякьвал гъабхьундар.

³² Гьаз? Гьаз гъапиш дурариз гьякьвал ляхнарилантина абгуз ккун гъабхьну, хъа хъугъувалилантина ваъ. Дурар ликарикк ккабхъру гъвандихъ хъарсну,

³³ Гирами китабариъ дупнайиси: «Лиг гьа, Узу Сион дагъдиин ликарикк ккабхъру Гъван дивдиза, Гъван, гунагькрар хъарсру Гъван, аммаки фуж Гьадгъахъ хъугъиш, думу швумал хьидар».