Рим агьларихьна вуйи кагъаз 5 - Гирами Китаб

Аллагьдин улихь гьякьвал

¹ Ихь Агъа Иса Месигьдихъ хъугъну, ухьу гьякь духьнайиган, Аллагьдихъди Иса Месигьдилантина ихь аьлакьйир дерккунхьа.

² Ихь хъугъувалиинди ухьу ахънайи рягьимлувал Гьадгъулантина улупнахьуз, ва, Аллагьдин аднакан ухьуз рубкьруб аьгъяди, гьамус лап шад вухьа.

³ Мидланра гъайри, аьзаб-дерднаъра ухьу шад вухьа, фицики аьзаб-дердериъ ухьу сабурлу шулайиб аьгъяхьуз.

⁴ Сабурлувалиъ хасият мюгькам апӀура, хъа мюгькам гъабхьи хасиятналан умуд арайиз гъюра.

⁵ Умудну ухьуз кучӀлар апӀидар, фицики Аллагьдин масанвал, Аллагьдихьан багъишди дуфнайи Гирами Рюгьналанмина ихь юкӀвариъ убзна.

⁶ Ухьу зяифди айиган, Месигь ухьхъанди гъакӀну. Ухьу Аллагь гьясбикк ккадарди яшамиш шули гъахьунхьа, гьаци вушра Месигь улупнайи вахтна ухьхъанди гъакӀну.

⁷ Дугъри касдихъанди йикӀуз шлиз ккун шул? Саризра. Мумкин ву, ужур касдихъанди йикӀуз сар фуж-вуш дихъубра.

⁸ Хъа Месигь, гьеле ухьу гунагькрар вушра, ухьхъанди гъакӀну, ва гьамдиинди Аллагьди, ухьухьна вуйи Чан масанвал фукьан аьхюб вуш, улупну.

⁹ Гьамус, Месигьдин аьжалилантина Аллагьдин улихь ухьу гьякь духьнайиган, мидлан артухъ, Гьадгъу Аллагьдин хъялнахьан уьрхидихьу.

¹⁰ Фицики, гьеле ухьу Аллагьдин душмнарди имиди, Дугъу ухьу Чан Балин аьжалниинди албагнуш, хъа гьамус албагну айиган, хъана ужуйи Чан Балин уьмриланмина Дугъу ухьу уьрхиди.

¹¹ Ухьу неинки дюрхну хьиди, хъа гъира, Гьадгъуланмина Аллагьдихъди албагнайидар, Аллагьди ихь Агъа Иса Месигьдиланмина лап шад апӀурахьу.

Адам ва Месигь

¹² Гьаци вуйиган, дюнʼяйиз гунагь сар адмийиланмина – Адамдиланмина фици гъафнуш, хъа гьадму гунгьихъди – аьжал, гьаци аьжалра вари инсанариз гъурубкьу пай гъабхьну, фицики дурари варидари гунагь апӀуйи.

¹³ Гунагь, дюнʼяйиз Къанун гъяйиз айиб ву, хъа Къанун адрушваъ, гунагь гьич саризра тахсир вуди гьугъубжвурадар.

¹⁴ Хъа аьжал, Адамдин вахтариланмина тап Мусайин вахтаризкьан тахтниин дебънади гъабхьну. Думу гьеле Адамдиси гунагь дарапӀдариинра агъавал апӀури гъабхьну. Адам хъасин гъюз Ккайириз ухшарди гъахьну.

¹⁵ Хъа Аллагьдин ужувлан багъиш Адамдин гунгьиз барабар дар. Эгер гизафдар сар касдин гунгьилан гъийихнуш, мидлан артухъ Аллагьдин ужʼвал ва сар Адмийин, Месигь Исайин ужувлан багъиш гизафдариз абцӀну рубкьиди.

¹⁶ Му багъиш гунагь гъапӀу сарин суд дар. Фицики судди тахсир кипру, хъа му ужувлан багъишну гизаф гунгьарин кьяляхъ адмийир Аллагьдин улихь гьякь гъапӀну.

¹⁷ Эгер анжагъ сар адмийин гунгьиланмина аьжали агъавал апӀуз хъюбгънуш, мидлан артухъ, абцӀну Аллагьдин ужʼвал ва гьякьвалин багъиш кьабул гъапӀдари гьадму сар Касдилан, Иса Месигьдиланмина уьмриъ паччагьвал апӀиди.

¹⁸ Гьаци вуйиган, сарин гунгьилантина вари адмийирик тахсир кипнуш, гьаму жюрейиинди, Сарин гьякьвалилан Аллагьдин улихь вари адмийириз гьякьвал рубкьиди ва дурариз уьмур хьибди.

¹⁹ Гьаци вуйиган, сарин мютӀюгъ дарували гизафдар гунагькрар гъапӀубси, Сарин мютӀюгъвали гизафдар гьякь апӀиди.

²⁰ Къанун гунгьар артухъ хьуз гъафну, хъа гунагь артухъ шлубкьан, Аллагьдин ужʼвал хъана артухъ шуйи,

²¹ ва гунагь апӀували фици чахьди аьжал хури, агъавал апӀуз хъюбгънуш, гьаци Аллагьдин ужʼвалира ихь Агъа Иса Месигьдиланмина, ухьуз гьаргандин уьмур тувбан бадали, гьякьлуди агъавал апӀуз хъюбгъди.