Рим агьларихьна вуйи кагъаз 3 - Гирами Китаб

Вари адмийир тахсиркрар ву

¹ Гьаци вуйиган, жугьдар фтин артухъ ву, суннат апӀбан мяна фу ву?

² Дурарин артухъвал гизаф аьхюб ву, думура гизафубдиъ, саб гъапиб, Аллагьди Чан гаф гьадрариз тувнийи.

³ Дурарикан сакьюдар Аллагьдиз вафалу дарш, дурарин вафалу дарували Аллагьдин вафалувал чӀур апӀуз шулин?

⁴ ИкибаштӀан, даршул! Юкьуб аьтраф вари кучӀлари ацӀнашра, Аллагь аьгьтлуди гъузди, Гирами бикӀбариъ дибикӀнайиси: «Уву Яв улхбариъ гьякьди гъуздива ва Уву Яв суд апӀруган, гъалиб хьидива».

⁵ Эгер ихь дюз дарувалари Аллагьдин гьякьвал ачухъди артухъ апӀураш, Аллагьди ухькан хъял апӀруган, Думу дюз дар, пуз хай шулин? (Узу гьамци йиз адмивалин фагьмиинди кӀураза.)

⁶ ИкибаштӀан, даршул! Аллагьди ухькан хъял апӀдайиш, Дугъхьан вари дюнʼяйин суд апӀузра хьибдайи.

⁷ Увхьан пузра шулвухьан: «Хъа эгер йиз дугъри дарували Аллагьдин дугъривал артухъ апӀураш ва гьаци Дугъан ад артухъ шулаш, гунагькринси йиз суд гьаз апӀура?»

⁸ Му, гьамци пуб гьисаб ву: «Ужувлар хьпан бадали, ухьу пис ляхнар дапӀну ккунду». Ари, гьамцдар аьгъювалар улупура, кӀури, гизафдари учуз тягьнийирра йивури шулу. Мици кӀуру адмийир жазайиз лайикь ву.

⁹ Мидиз фу пухьа? Имбу миллетартӀан ухьу, жугьдар, фтин артухъ ву? Гьич сабдинра! Гьаддиз узу зиихъ дупназа: жугьдарра ва имбударра сабси гунагьвалин гьюкмиъ а,

¹⁰ Гирами китабариъ кӀурайиси: «Дюз вуйир гьич фужкӀа адар, фужкӀа!

¹¹ Гьич фужкӀа гъавриъ ахърадар. Гьич сарира Аллагь агурадар.

¹² Гьякьвалихьан вари ярхла гъахьну; гьич фужкӀа сабдизра хай вуйир дар. Гьич сарира ужʼвал апӀдар – гьич сарира, сар касдикьан!»

¹³ «Дурарин ушвар арццнайи накьвариз ухшар ву. Мелз дурари кучӀал рабгъузтӀан ишлетмиш апӀдар». «БитӀран агъу ву дурарин кӀвантариин алиб».

¹⁴ «Люкьнарина агъуди ацӀна дурарин ушвар».

¹⁵ «Дурариз йивну йикӀувал гьич фукӀа дарубси ву.

¹⁶ Наанди гъушишра, дурар чпихьди гъабхруб пуч апӀувална гъам-дерд ву,

¹⁷ ва дурариз, ислягьвалин рякъярикан аьгъдар».

¹⁸ «Дурариз Аллагьдихьан гучӀ ктар».

¹⁹ Ухьуз аьгъяхьуз, гьич сарира, учв гьякь вуза, дарпбан бадали, ва вари дюнʼяйи Аллагьдин улихь жаваб тувбан бадали, гьаму Къанундиъ дупнайиб вари Къанундиз мютӀюгъ вуйдариз дупнайиб ву.

²⁰ Саб Къанундиъ айиб тамам апӀури гьич сарихьанра Аллагьдин улихь гьякь хьуз хьибдар, гьаз гъапиш, Къанундиан удубчӀвурайиб вари инсан гунагькар вуйиб улупурайиб ву.

Аллагь ву адмийир гьякь апӀурайир

²¹ Аллагьди, Чан улихь адмийир фици гьякь апӀуруш, улупнахьуз. Му мици, Къанундира ва пайгъамбрарира гьаддикан кӀурашра, Къанундилан асиллу дарди шула.

²² Аллагьди адмийир Чан улихь гьякь апӀура Иса Месигьдихъ хъугъбиинди. Му хъугърудариз варидариз кайиб ву, гьаз гъапиш дурарин арайиъ гьич саб фаркьвалра адар,

²³ фицики, вари гунагькрар ву, ва гьаддиз дурар Аллагьдин адлувалин багахьна деетнадар.

²⁴ Хъа Аллагьдин рягьимлувалилантина адмийирин гунгьар Чаина гъадагъу Иса Месигьдилантина вари халкьар, гьич саб кьимат тутрувди, Аллагьдин улихь гьякь гъахьну.

²⁵ Аллагьди Думу гъурбан гъапӀну. Дугъан ифди Дугъахъ хъугърударин гунгьар марцц гъапӀну. Адмийирин ухди гъапӀу гунгьарилан хил алдабгъну, Аллагьди Чан гьякьвал улупну.

²⁶ Дугъу адмийирин гунгьар аьгь дапӀну, Учв гьаму сяаьтдира гьякь вуйивал, ва Учв гьаммишандиз гьякьди гъузрувал ва дидихъди сабси Месигьдихъ хъугъру гьарсар кас гьякь апӀувал улупну.

²⁷ Гьамус ухьу фтиинди фурсар апӀухьа? Сабдииндира! Гьаз? Ляхнар тӀалаб апӀурайи Къанундин бинайиин алди? Ваъ! Хъа хъугъвал тӀалаб апӀурайи Къанундин бинайиин алди.

²⁸ Фицики, учу кӀурача, адми сарун, Къанундин тӀалабариз учв мютӀюгъ шулашра-шуладаршра, чан хъугъувализ дилигну, гьякь гъапӀну.

²⁹ Аллагь, анжагъ, жугьдаризтӀан дарин? Гьацира имбударизра Вуйир даринхъа? Ав, Думу гьацира имбу халкьаринра ву.

³⁰ Аллагь сар вуйивализ дилигну, Дугъу вари хъугърудар сабси гьякь апӀура – суннат гъапӀдарра дарапӀдарра.

³¹ Ухьуз хъугъвал а кӀури гьамус Къанун тина апӀухьахъа? ИкибаштӀан, ваъ! Ухьу ихь хъугъувалиинди Къанун мюгькам апӀурахьа.