Рим агьларихьна вуйи кагъаз 16 - Гирами Китаб

Таниш вуйидариз саламар

¹ Узуз учвуз Фибия кӀуру ихь чи аьгъяди ккундузуз. Думу Кенхрийиъ айи хъугърударин жямяаьтдин гъулугъчи ву.

² Ккун апӀураза учвкан, Агъайин гьюрматназ дилигну, думу Аллагьдин адмийириз лайикь вуйиси кьабул апӀинай, дугъаз гьудрубкӀру варибдиъ кюмек апӀинай, фицики дугъу чав, гьеле узузра кмиди, гизафдариз кюмекар гъапӀну.

³ Узухъди сатӀиди Иса Месигьдин гъуллугънаъ гъахьи ва шулайи Прискилайиз ва Акилайиз узхьан саламар йипай.

⁴ Дурари узу бадали чпин жанар гьяйиф гъапӀундайи. Неинки сар узу, хъа гьацира жара миллетарин хъугъру жямяаьтарира дурариз чухсагъул кӀура.

⁵ Дурарин хулаз уч шлу хъугърударизра саламар йипай. Узуз масанди вуйи, Азияйиъ сарпирди Месигьдихъ хъугъу Эпенетдиз саламар йипай.

⁶ Учву бадали гизаф гъилиху Марʼямдизра саламар йипай.

⁷ Йиз багахьлуйир вуйи, узухъди дустагъдиъ гъахьи ва марцци вакиларин арайиъ ад айи Андроникдизна Юнийиз – саламар. Дурар узутӀан ухди Месигьдихъ хъугъну.

⁸ Агъайихъ хъугънайи йиз ккуни дуст Амплиатдиз – саламар.

⁹ Саламар йипай Месигьдиз гъуллугънаъ иштирак гъаши ихь гъардаш Урбандиз ва йиз ккуни дуст Стахисдиз.

¹⁰ Месигьдихъ хъугъвалиъ ижмивал улупу Апелесдиз – саламар. Ариставулин хуландариз варидариз саламар йипай.

¹¹ Йиз багахьлу Иродиандиз – саламар. Агъайин терефкар вуйи Наркиссайин хуландариз варидариз саламар йипай.

¹² Агъайин ад бадали юкӀв хъипну лихурайи чйир Трифенайизна Трифосайиз – саламар. Агъа бадали гизаф жафа гъизигу йиз ккуни чи Персидайиз саламар йипай.

¹³ Саламар йипай Агъа бадали кадагънайи чве Руфдиз ва узузра дада гъахьи дугъан дадайиз.

¹⁴ Анискритдиз, Гермасдиз ва дурарихъди хъайи гъардшариз – саламар.

¹⁵ Саламар йипай Филологдиз, Юлияйиз, Нерейдизна дугъан чуччуз, Олимпасдиз ва дурарихъди хъайи вари Аллагьдин адмийириз.

¹⁶ Гирами мак дапӀну, чиб-чпиз салам туври гъузай. Месигьдин вари жямяаьтари учвуз саламар хътаура.

¹⁷ Учвкан миннат апӀураза, гъардшар, учвуз улупу аьгъювалариз къаршу удучӀвури, гьюжатар апӀрударихьан ва машат апӀрударихьан ярхлади гъузай.

¹⁸ Гьаци апӀру касар ихь Агъа Месигьдин гъуллугънаъ айидар дар, хъа чпин тямягьяр гьуркӀбахъ хъайидар ву. Дурари чпин уччву улхбарииндина тярифариинди бицӀи юкӀвар айи касар алдатмиш апӀура.

¹⁹ Ичв мютӀюгъваликан варидариз деебхьна. Узу учвʼин гизаф шад вуза. Учвуз ужуб аьгъяди ва гьарсаб чӀурувалихьан учву ярхлади ккундузуз.

²⁰ Мясляаьт туврайи Аллагьди багарихьди иблис дармадагъин апӀиди ва думу ичв ликариккинди гатӀабхьиди. Гъит, учвуз Агъа Исайин ужʼвал ибшри.

²¹ Узухъди лихурайи Тимофейи учвуз саламар хътаура, хъа дугъахъди – Луцийи, Ясонди ва Сосипатри, йиз багахьлуйири.

²² Узура, Павелин гьаму кагъаз бикӀурайи Тертийира, вари Агъайихъ хъугърайидариз саламар хътаураза.

²³ Чан хулаъ узу ва вари хъугънайи жямяаьт кьабул дапӀнайи Гай кӀуру касдира учвуз саламар хътаура. Гьацира шагьрин пул хлиъ айи Ераст кӀурури ва ихь гъардаш Квартди саламар хътаура. [

²⁴ ]

²⁵ Узу учвуз дебкку Ужувлан хабарнаъ ичв хъугъувал мюгькам апӀру Аллагьдин ад ибшри! Гизаф аьсрариъ дюбхнайи

²⁶ сир, гьамус гьаммишандин Аллагьдин амриинди пайгъамбрарин китабариланмина, халкьар Дугъахъ хъугъбан ва хъпехъбан бадали, дурариз ачмиш гъапӀну.

²⁷ Аьсрариан аьсрариз Иса Месигьдилантина Аькьюл хурайи сар вуйи Аллагьдин ад ибшри! Амин.