Рим агьларихьна вуйи кагъаз 15 - Гирами Китаб

Ижми хъугъувал айидар

¹ Ухьу, ижми рюгь айидари, зяиф рюгь айидарин гъалатӀар сабурлуди аьгь дапӀну ккунду, хъа жвуваз ккуниб дапӀну ккундар.

² Ухькан гьарсари багахь хьайириз, дугъан рюгь мюгькам шлуб, дугъаз хайир кайиб дапӀну ккунду.

³ Гьеле Месигьдира Чан хайирназ фукӀа гъапӀундар. Хъа Гирами китабариъ дупна: «Уву беябур апӀрударин люкьнар Узʼин алахьнийи».

⁴ Гирами китабариъ дибикӀнайиб вари, диди туврайи сабурлувалин ва ккарцрувалин кюмекниинди ихь умуд ктадабтӀбан бадали, ухьуз насигьят вуди, дибикӀнайиб ву.

^5-6 Гъит сабурлувал ва ккарцрувал туврайи Аллагьди, Иса Месигь мисал вуди Гьадгъахъди гъяри, ухьу сатӀиди, саб гьарайниинди Аллагьдин, ихь Агъа Иса Месигьдин Адашдин тяриф апӀруси, ичв мясляаьтнаъ яшайиш туври.

⁷ Гьаци вуйиган, Месигьди учву фици кьабул гъапӀнуш, учвура, Аллагьдин ад бадали, гьаци сари-сар кьабул апӀинай.

⁸ Месигь суннат гъапӀдарин гъуллугънаъ Аллагьдин гьякьвал дурариз улупуз, Аллагьди дурарин абйирин абйириз тувнайи гаф гьякь вуйивал улупуз ади гъахьну.

⁹ Гьадмуган жара халкьарира Аллагьди чпиз гъапӀу ужувлантина Дугъан ад апӀиди. Гирами китабариъ дупнайиси: «Гьаци вуйиган, узу Уву Аллагь аьгъдру халкьарин арайиъ адлу апӀидизаву ва Яв ччвурназ тярифнан мяълийир апӀидиза».

¹⁰ Ва хъана: «Аллагьдин халкьдихъди сабси Шадвалин гьарай ипай, Аллагь аьгъдру халкьар!»

¹¹ Гьамцира дупна: «Агъа адлу апӀинай, Аллагь аьгъдру вари халкьар! Гъит вари миллетари мяълийириинди Дугъан тярифар апӀри!»

¹² Ишаяйира кӀура: «Ессей тухмиан таза кюл ачмиш хьибди. Дугъу миллетариин гьюкум гъабхиди, ва Аллагь аьгъдру халкьари Гьадгъак чпин миж кивди».

¹³ Гъит, умуд тувру Аллагьди учву ичв хъугъувалилантина, Гирами Рюгьнан кьувватниинди ичв умуд артухъ хьпан бадали, шадвали ва мясляаьтну ацӀричву.

Павелин кагъзикан ва ляхнарикан

¹⁴ Йиз гъардшар, учву ужувлу ацӀнайиб, учвуз гизафубдикан аьгъю гъабхьиб ва сар-сариз учвхьан насигьятар тувуз шлуб якьинди аьгъязуз.

¹⁵ Хъа Аллагьди узуз багъиш тувнайиган, узу учвуз лап кӀубанвал кади, сакьюдар ляхнарикан учвуз кӀваин алауз ккунди гъибикӀунзачвуз.

¹⁶ Йиз вакилвалин бурж вуди, Аллагьди жара миллетариз, Иса Месигьдин гаф ва Ужувлан хабар рабгъру багъиш тувназуз. Гьамци дурар Дугъаз, Гирами Рюгьниинди марцц духьну, Аллагьдиз ккуниси гъурбан хьиди.

¹⁷ Иса Месигьдихъ хъади, узура йиз Аллагь бадали апӀурайи ляхнариин фурслу вуза.

^18-19 Узлантина Аллагь аьгъдру халкьар гафнииндина ляхниинди Аллагьдиз мютӀюгъ апӀбан бадали, аьжайиб лишнарииндина аьламатариинди ва Аллагьдин Рюгьнан кьудратниинди Месигьди гъапӀубдикантӀан пидарза. Магьа гьамци, Ерусалим ва дидин гъирагъарихъан тап Иллирик уьлкейихънакьан Месигьдикан Ужувлан хабар деебтунза.

²⁰ Узу Месигьдин ччвур аьгъдру йишвариъ, жарари шибритӀ ккиву йишвʼин хал дидривди, Ужувлан хабар рабгъуз чалишмиш гъахьунза.

²¹ Гирами китабариъ дупна: «Дугъкан дупнадрудариз Думу рякъиди, хъа деебхьнадрудар гъавриъ ахъди».

Павелиз Римдиз гъягъюз ккунди а

²² Узу учвухьна гъюз гизаф ражари гьязур гъахьунза, хъа гьамцдар алахьиган гъюз гъабхьундарзухьан.

²³ УхдитӀан узуз учвухьна гъюз ккунди айзуз. Хъа гьамус узу му вари юрдариъ дилихну ккудубкӀунза.

²⁴ Испанияйиз гъягърур, учвʼин улукьидиза. Улукьиган, учвухъди, юкӀв хъади, цӀибди сюгьбатар апӀбалан кьяляхъ, учву узу дина гьаърувалик миж кайиз.

²⁵ Гьамус узу Ерусалимдиз душваъ айи Аллагьдин адмийирин гъуллугънаъ хьуз гъягъюраза.

²⁶ Фицики Македония ва Ахая уьлкйирин хъугърудари Ерусалимдиъ касибди айи Аллагьдин адмийириз, пул уч дапӀну, кюмек апӀуз кьаст гъапӀнийи.

²⁷ Дурари дици апӀуб ужу гъапӀну, хъа Ерусалимдиъ айидариз дурар буржлу вуйи. Жугьдарихъди сабси дураризра рюгьнан ужувлар гъахьну. Дурари жугьдариз бедендин ужувларикан пай гъяпӀну ккунду.

²⁸ Узу гьаму месэла гьял гъапӀиган ва чпиз хътапӀу вари пул дурарихьна гъурубкьиган, Испанияйиз рякъюъ учӀвдиза ва рякъюъ учвʼинра улуркьидиза.

²⁹ Узуз аьгъязуз, узу учвухьна гъафиган, Месигьди туву ужувлар гьуркӀну хидизачвуз.

³⁰ Учвкан, ихь Агъа Иса Месигь бадали, Гирами Рюгьнан масанвал бадали, миннат апӀураза, гъардшар, узу бадали Аллагьдиз узухъди учвура юкӀв абцӀну ккарагай.

³¹ Ягьудия юрднаъ хътругърударин хиларигъ узу гъядряхъбан бадали, Ерусалимдиъ Аллагьдин адмийири узʼин илипнайи ляхин кьабул апӀбан бадали,

³² эгер Аллагьдин ният гъабшиш, учвухьна шадвалиинди гъюбан бадали ва учвухъди рягьятвал гъадабгъбан бадали, ккарагай.

³³ Гъит, ислягьвалин булагъ – Аллагь учвухъди варидарихъди ишри. Амин.