Рим агьларихьна вуйи кагъаз 14 - Гирами Китаб

Жарадар тахсир мапӀанай

¹ ЦӀибди хъугъувал айир ичв арайиз кьабул апӀинай. Дугъанна ичв фикрар сабсдар дар кӀури, дугъахъди гьюжатар мапӀанай.

² Сариз фунуб вушра хураг ипӀуз ихтияр хъугъували тувру, хъа тмунури, хъугъувал цӀиб айири, бистнин мейвйиртӀан итӀурдар.

³ Вари ипӀрур, мейвйиртӀан диритӀрурихьинди фурс кади милиган. Ва мейвйиртӀан диритӀрурира вари ипӀурайир тахсирнакк ккаъну ккундар, фицики Аллагьди думу кьабул апӀура.

⁴ Уву фуж вува, жарарин лукӀрак тахсир кипуз?! Анжагъ чан эйсийин улихьтӀан лукӀ гьякь, ясана нягьякь шлуб дар. Агъайин лукӀ гьякь хьиди, фицики Агъайиз думу гьякь апӀуз гьюкум а.

⁵ Сари, саб йигътӀан, тму йигъ важиблу ву кӀура, хъа жарари, вари йигъар сабстар ву кӀура. Гьарсари, гъит, чав фици гьисаб апӀураш, гьаци апӀри.

⁶ Сари йигъарикан сад йигъ, имбу йигъартӀан багьа ву кӀураш, дугъу гьаци Агъайин гьюрматназ апӀура, ва фунуб-вуш саб хураг ипӀрурира Агъа бадали гьаци апӀура, гьаз гъапиш, Аллагьдиз чухсагъул кӀура. Ва фунуб-вуш саб хураг дирипӀрурира Агъайин гьюрматназ гьаци апӀура, гьаци дугъура Агъайиз чухсагъул кӀура.

⁷ Гьаз гъапиш ухькан саркьан чав-чаинди яшамиш шуладар, ва чав-чаинди йикӀурадар.

⁸ Гьаци вуйиган, эгер ухьу яшамиш шулаш, Агъа бадали яшамиш шулахьа, эгер йихураш, гьацира Агъа бадали йихурахьу, ва аьхириъ, яшамиш шулайидар вушра, дийихнайидар вушра, Агъайиндар вухьа.

⁹ Гьамдин бадали Месигь гъакӀну ва чӀиви гъахьну – Дугъкан чӀивидаринра, гъачӀидаринра Агъа гъахьну.

¹⁰ Хъа уву гьаз яв гъардаш тахсир апӀурава? Яв гъардаштӀан, уву фитʼинди артухъ вуза, кӀурава? Ухьу вари Аллагьдин суддин улихь дугъужвидихьа.

¹¹ Гирами китабариъ дибикӀна: «Гьарсари Йиз улихь кӀул ис апӀиди, ва гьарсари, Узу Аллагь ву, пиди. Узу яшамиш шулайивал фици гьякь вуш, гьаму вари тамам шлубра гьякь ву – кӀура Агъайи».

¹² Ва гьаддиз ухькан гьарсари Аллагьдин улихь, чав гъапӀу ляхнариз дилигну, жаваб тувди.

Жарадарихьди гунагь апӀрубси мапӀанай

¹³ Чиб-чпик тахсрар кирчувал дипурхьа, жвуван гъардшиз гъалатӀариъ ва гунгьариъ ахъуз ухьу багьна тутрувиш, ужу хьибди.

¹⁴ Узуз аьгъязуз, ва дугъридан саб шак адарди Иса Месигьдин гьюкмиинди кӀураза: марцциб даруб фукӀара адар. Анжагъ марцциб дар кӀуруриз думу марцциб дар.

¹⁵ Хъа эгер уву ипӀруб яв гъардшиз кьабул шуладарш, яв ляхнариъ масанвал адар. Яв хураг бадали гъардаш пуч мапӀан, Месигь гьадгъухъандира гъакӀну.

¹⁶ Уву ужуб вуди гьисаб апӀурайиб имбудари, писуб ву, пуз багьна мутуван.

¹⁷ Фицики Аллагьдин Паччагьлугъ ипӀруб, я убхъруб дар, думу Гирами Рюгьну багъиш апӀурайи дугъривал, ислягьвал ва шадвал ву.

¹⁸ Месигьдиз гьамци гъуллугъ апӀурайири Аллагьдиз ккуниб апӀура, ва адмийиризра кьабул шула.

¹⁹ Гъачай, мясляаьт шлу ва чиб-чпиз кюмек шлу гьарсабдихьна илтӀикӀурхьа.

²⁰ Аллагьдин ляхнар ипӀрубдин кӀуллан чӀур мапӀан. Гьарсаб хураг ипӀуз шул. Хъа яв гъардаш гунагьнахъна хру хураг ипӀуб дюз дар.

²¹ Йикк дирипӀуб ва чяхир дурухуб ва фукӀа гьациб дарапӀуб ужу ву, эгер дурари яв гъардаш гунгьарихъна гъахуруш.

²² Уву хъугънайи яв ляхнар жвувахьди гъит; гъит, дурарикан анжагъ АллагьдизтӀан аьгъяди дарибшри. Чав гьякь вуйиз кӀуруб апӀурайиган, учв тахсиркарди гьидригъру кас бахтавар ву.

²³ Хъа шли, фукӀа-мукӀа ипӀуз ужуб вая писуб кӀури, шаклуди, ипӀури гъашиш, дицир Аллагьди тахсиркар апӀиди. Хъа хъугъвал адарди апӀурайиб вари гунагь ву.