Рим агьларихьна вуйи кагъаз 13 - Гирами Китаб

Месигьдин терефкрар гьюкмихъ хъябяхъну ккунду

¹ Гьарсар заан гьюкмиз мютӀюгъ духьну ккунду, фицики Аллагьдихьан дару гьюкум адар; гьаму ражари айи гьюкумра Аллагьди дебккнайиб ву.

² Гьаддиз, фуж гьюкмиз къаршуди гъудужвураш, гьадму Аллагьди дебккнайибдиз къаршу гъедергурайи гьисаб ву. Гьаци апӀрудари чпиина тахсир хура.

³ Ужʼвал апӀрудариз гьюкумдрарихьан гучӀ адар, хъа – писвал апӀрудариз. Эгер гьюкумдрарихьан увуз гучӀ апӀуз ккундарш, ужʼвал апӀури гъуз ва дурарин терефнаан яв тяриф ебхьидивуз.

⁴ Гьюкумдар увуз ужʼвал хьпан бадали лихурайи Аллагьдин лукӀ ву. Хъа эгер уву писвал апӀуруш, гучӀ апӀин, фицики увуз жаза гьадабтӀуб гьадгъан гьюкмиъ гьавайиди айиб адар. Писвал апӀруриз жаза адабтӀури, Аллагьдин хъял алдабгъури, дугъу Аллагьдиз гъуллугъ апӀура.

⁵ Гьаци вуйиган, дугъаз мютӀюгъ духьну ккунду, неинки хъпебехъиш, жаза адабтӀур кӀури, хъа – жвуван намус бадалира.

⁶ Гьаци вуйивализ дилигну, учву налогарра тувай; гьюкумдрари, Аллагьдин гъуллугъчйири, чпин вари вахт гьюкум гъабхбиинди гьапӀра.

⁷ Гьардиз лайикь вуйиб тувай: шлиз – налогар, шлиз – харжар, шлиз – гучӀ, шлиз – гьюрмат.

⁸ Саризра буржлуди мугъузанай; гъит, учвук анжагъ саб буржтӀан дарибшри, думура – чиб-чпихьна улупру масанвалин бурж, фицики, шли чан багахь хьайир ккун гъапӀиш, гьадгъу Къанун тамам апӀура.

⁹ Табшуругъариз лигай: «кьяппавал мапӀан», «миликӀан», «мигьитӀибкӀан», «жараринуб ккун мапӀан», ва жара табшуругъариъра улупурайиб саб ву: «Багахь хьайир, жвуваз жвувси, ккун апӀин».

¹⁰ Масанвали багахь хьайириз писвал хурдар. Гьаддиз масанвал Къанун тамам гъапӀу гьисаб ву.

¹¹ Гьаму вахт фициб вуш, аьгъяди, гьаци апӀури гъузай. Сарун учву нивкӀʼан хъиргру вахт дуфна, фицики ухьу уьрхру вахт, ихь сифте хъугъу йигъак гъилигган, гьамус багахь дубхьна.

¹² Йишв ккудубкӀура. Йигъ сарун багахь хьа. Мици вуйиган, вари мучӀу ляхнарихьан ярхла хьидихьа, ва аквназ лайикь вуйибдихъди яракьламиш хьидихьа.

¹³ Гъачай, йигъандин аквназ барабар вуйиси, намуслуди яшамиш шулхьа. Пиянискаваларикк ва сатӀи кьяппаваларикк кӀул ккивдархьа. Аьйиб апӀруб ва гьяясузуб апӀидархьа, гьюжатар апӀидархьа ва сар-сариин бахил хьидархьа.

¹⁴ Ихь Агъа Иса Месигьди учву уьрхричву, ичв бедендин гъайгъушин тямягьяриз миилтӀибкӀанай.