Рим агьларихьна вуйи кагъаз 12 - Гирами Китаб

Ичв уьмрар Аллагьдиз бахш апӀинай

¹ Гьаддиз учвуз ккарагураза, гъардшар, Аллагьдин ужʼвал бадали ичв жанар, Гьадгъаз хуш шлу марцци, чӀиви гъурбнарси, дерккай. Му Аллагьдиз фагьумлу вуйи гъуллугъ хьибди.

² Гъит, му дюнʼяйин гьюкмари учвʼин агъавал дарапӀри. Аллагьдин ужуб, рази ктаъру ва гьубкӀу ният фу вуш, аьгъю хьпан бадали, ичв фагьум цӀийи алапӀури, дигиш йихьай.

³ Аллагьди узуз вакилвал багъиш дапӀнайиган, узу учвуз варидариз кӀураза: учву ичв вуйидартӀан артухъ заанди мидисанай, учвуз гьарсариз Аллагьди туву хъугъувализ дилигну, фурс ктарди гъузай.

⁴ Ихь беден гизаф паярикан вушра, вари паяри саб ляхин апӀурадар.

⁵ Гьаци ухьура вари Месигьдихъди саб беден вуди, дидин паяр вухьа.

⁶ Аллагьди Чан ужувлантина гьарсариз чан хусуси багъиш гъурубкьунхьуз. Шлиз пайгъамбарвалин багъиш аш, гъит дугъу думу, чан хъугъувализ дилигну, ишлетмиш апӀри.

⁷ Шлиз жарадарин гъуллугънаъ шлу багъиш аш, гъит учв гьадму гъуллугъназ бахш ишри. Шлиз мялимвалин багъиш аш, гъит учв мялимвализ бахш ишри.

⁸ Шлиз ккарцуз шлу багъиш аш, гъит дугъу жарадар ккарцри. Шлиз жумартвалиинди пай апӀуз шлу багъиш аш, гъит дугъу гьаци, кӀвакк ккадарди, пай апӀри. Шлиз жарадарин зиин аьхювал апӀуз шлу багъиш аш, гъит аьхювал апӀри вари юкӀв хъипну ва намуслуди. Шлиз ужʼвал апӀуз шлу багъиш аш, гъит думу шадвалиинди апӀри.

⁹ Гъит, ичв масанвал кӀваантӀан вуйиб ибшри. Писвал ккун мапӀанай, ужувлахъ хъачӀарккай.

¹⁰ Чвйирси чиб-чпи ккун апӀинай. Гьарсари жвувазтӀан чиб-чпиз артухъ гьюрмат апӀинай.

¹¹ ТӀагъру дарди, юкӀв хъади лихури, рюгь гьевеслуди Агъайин гъуллугънаъ йихьай.

¹² Умудвалиъ шадди, бедбахтвалариъ сабурлуди, ккарагбариъ мюгькамди гъузай.

¹³ Аллагьдин адмийириз читинвалариъ кюмек апӀинай. Хялар кьабул апӀури гъузай.

¹⁴ Учвухъ хъергнайидариз ужувлар ккун апӀинай. Ужувлар ккун апӀинай, люкьнар – ваъ.

¹⁵ Шадлударихъди шад йихьай. Ишурайидарихъди ишай.

¹⁶ Чиб-чпихъди албагну яшамиш йихьай. Фурс мукубчӀванай. Аьжузарихъди дуствал апӀуз нач мапӀанай. Жвувкан заанди фикир мапӀанай.

¹⁷ Писвализ писвалиинди жаваб мутуванай. Варидариз ужʼвал апӀури гъузай.

¹⁸ Учвхьан шлубкьан варидарихъди мясляаьтниинди яшамиш йихьай.

¹⁹ Аьзиз дустар, хъял алдабгъбахъ махьанай, хъял алдабгъуб Аллагьдин ихтиярнаъ гъибтай. Фицики Гирами китабариъ дибикӀна: «Хъял алдабгъувал Йиз ляхин ву. Узу жаза тувдиза» – кӀура Агъайи.

²⁰ Гьамдин ерина, «эгер яв душмандиз гашди аш, уьл тув дугъаз. Эгер думу дахаргну аш, шид тув. Эгер уву гьамци апӀури гъашиш, думу начʼвалиан йикӀиди».

²¹ Писвал увʼин гъалиб хьуз мигъитан, думу ужʼвали ккапӀ.