Рим агьларихьна вуйи кагъаз 11 - Гирами Китаб

Аллагьдиз Чан халкь кӀваълан гьархнадар

¹ Хъа магьа узу гьерхраза: «Аллагьди Чан халкь Чахьан гьадаънадарин?» ИкибаштӀан, ваъ! Узура Ибрагьимдин насил, Вениаминдин тухмиан вуйи израилжви вуза.

² Аллагьди Чаз улихьмиди аьгъю Чан халкь Чахьан гьадаънадар! Гирами китабариъ Илʼясдикан фу дупнаш, аьгъдарди анчвуз? Илʼясди Аллагьдиз израил халкьдилан аьрз апӀуру:

³ «Я Агъа, дурари Яв пайгъамбрар гъийихнийи ва, Увуз гъурбнар хру Яв йишвар ккидирчнийи; анжагъ узу сар сагъди имиза, аммаки, дурариз узура йивну йикӀуз ккунди а».

⁴ Аллагьди дугъаз фициб жаваб тувнийи? «Узу Узуз Ваалдин улихь кӀул ис дарапӀу ургуд агъзур кас гъюрхюнза».

⁵ Гьаму вахтарира Аллагьди Чан ужувлиинди кадагънайи саб бицӀи гъварч адмийир а.

⁶ Аллагьдин ужувлиинди дубхьнайиб, инсандин ляхнариз дилигну, дубхьнадар. Гьаци дайиш, ужʼвал ужʼвалси гъубзидайи.

⁷ Гьамус фу шула? Израилин халкьдиз чпи абгурайиб гъибихъундар. Анжагъ кадагънайидаризтӀан гъибихъундар, имбударин инсанвал гъудубгну.

⁸ Гирами китабариъ дупнайиси: «Аллагьди дурар дерин нивкӀуъ аънийи». «Дурариз дярябкъбан бадали, Аллагьди дурарин улар хъяркьнийи, дурариз деребхьбан бадали, ибариъ итӀишвнийи, ва гьамци гъийин йигъазкьан ими».

⁹ Давудри гъапнийи: «Гъит, дурариз, чпин шадлугъар чпиз ккиву рукьарна чулар ишри. Гъит, дурар хъахъну алдакри ва жазайикк ккахъри.

¹⁰ Гъит, дурариз дярябкъбан бадали, дурарин уларихь мучӀушин гьабхъри. Гъит, дурарин юкьвар гьаргандиз кьяни ишри».

¹¹ Узу кӀураза: «Жугьдар, хъахъну, гъудужвуз даршлуси, алдакнинхъа?» ИкибаштӀан, ваъ! Гьадрарин алдакувалиланмина имбу халкьариз, жугьдар бахил хьпан бадали, уьрхювал гъабхьну.

¹² Дурарин алдакували вари дюнʼяйиз ужʼвал хуруган ва дурариз кам гъахьиган, имбу миллетариз зурба ужувлар шлуган, хъа эгер вари жугьдар Аллагьдихьна хътакиш, имбу дюнʼяйиз фукьан зурба ужувлар шул!

¹³ Гьамус узу, жара миллетар, учвухьна илтӀикӀураза. Узу Аллагь аьгъдру миллетарихьна гьаънайи вакил вуза. Узу йиз гъуллугъ заан вуди гьисаб апӀураза.

¹⁴ Йиз халкь бахил дапӀну, сакьюдаркьана уьрхидиза кӀури, миж кайиз.

¹⁵ Аллагь жугьдарихьан гьидицган, дюнʼяйин жара халкьариз мясляаьт гъабхнуш, хъа Аллагьди жугьдар кьабул гъапӀган, фу шул? Дийихнайидар чӀиви апӀдаринхъа?

¹⁶ Эгер яв уьлин сабпи парча Аллагьдиз бахш гъапӀиш, имбу вари уьлерра гирами хьидияв. Эгер гьарин ччивар гирамидар вуш, дидин кюлерра гирами ву.

¹⁷ Гъяни гьарин кюлер кудуршвнади, дурариин чӀурудар фици улурхьнуш, гьадму жюрейиинди учву, жара миллетар, чӀуру чӀвумуччварси гьамус гъяни гьарин ччиварин кьувватнак кеъначва.

¹⁸ Гьаци вуйиган, кюлерин зиин фурс мапӀан, гьаз гъапиш, ччивариз уьмур туврайир уву дарва, хъа ччивари увуз уьмур тувра.

¹⁹ Уву пидива: «гьатму кюлер узу улурхьбан бадали ктуршвну».

²⁰ Думу гьякь вуяв. Дурар чпин хътругърувалиан ктуршвну. Хъа уву дурарин йишвʼин хъугъувалиан алва. Гьаддиз фурс мапӀан, хъа гучӀ кади гъуз.

²¹ Аллагьди багъри кюлер гьяйиф гъапӀундарш, увура гьяйиф апӀидар.

²² Гьаци вуйиган, увуз Аллагьдин ужʼвалра, хъялра рябкъюравуз. Дугъан хъял Чахьан гьудучӀвдарихьна шулу. Хъа увухьна вуйи ужʼвал, эгер уву Дугъан ужувлакк гъузруш, рябкъюравуз. Гъудрузиш, гьаркан увура кадабтӀиди.

²³ Хъа эгер жугьдар чпин хътругърувалиъ утӀукьну гъудрузиш, дурар хъана гьарик кюрхьди, даршуз, Аллагь му кюлер тазабаштӀан кюрхьюз кьудратлу ву.

²⁴ Хъа эгер уву чӀуру гьаркан кадабтӀнайи циркил, багъри дарди, гъяни гьарик кубхьнуш, хъа кюлериз чпин багъри гьарʼин улурхьуз фукьан рягьят шул!

²⁵ Гъардшар, узуз учву му сирнан гъавриъ адарди гъитуз, учву ичв аьгъювалиин гизаф умуд кивну гъудрузбан бадали, ккундарзуз. Израилин саб пай агьлар, чпин утӀукьну гъузувалиъ арсну, жара миллетар вари тамамди Аллагьдихьна илтӀикӀайизкьан, гъузди.

²⁶ Хъасин, Израилин вари халкь уьрхиди. Гирами китабариъ дибикӀнайиси: «Сион дагъдилан Уьрхрур гъиди. Дугъу Якьубдин тухмиан вари чӀуруб идипиди,

²⁷ ва Узу дурарилан гунгьар алдагъган, дурарихъди йикьрар йитӀидиза».

²⁸ Ужувлан хабар кьабул дарапӀбиинди жугьдарикан Аллагьдин душмнар шула. Жара миллетар ичв хайирназ ву. Мидиз дилигди, жугьдар Аллагьдин кадагънайи халкьди гъузди, Аллагьдиз дурар ккунду, фицики Дугъу дурарин абйириз гаф тувнийи.

²⁹ Фицики Аллагьди Чав дих дапӀнайи халкь ва Чав тувнайи гаф уьрхиди.

³⁰ Саб фила-вуш учву Аллагь гьясбикк апӀдайчва. Хъа гьамус, Дугъахъ жугьдар хъпебехъган, Дугъу учвуз ужʼвал улупура.

³¹ Аллагьди учвуз Чан ужʼвал улупуз, хъасин думу дурариинра алабхъбан бадали гьаму ражари жугьдар Дугъахъ хъпехъурадар.

³² Аллагьди вари халкьариз, хъасин чпилан хил алдабгъбан бадали, хъпебехъри гъузуз шлу вахтар улупнийи.

³³ Фукьан дарин Аллагьдин фагьмин ва зигьмин деринвал ва булвал! Фукьан дарин Дугъан ниятар ктитуз даршлувал! Фукьан дарин Дугъан рякъярин гъавриъ ахъуз даршлувал!

³⁴ «Агъайин фагьум шли аьгъю апӀиди, Дугъаз насигьятар шли тувди?»

³⁵ «Шли фу тувну Аллагьдиз, Дугъу думу кьяляхъ апӀуз буржлу вуйиб?»

³⁶ Вари Аллагьди халкь гъапӀну, аьхир, ва гьадму вари яшайиш анжагъ Гьадгъуланмина ва Гьадгъаз шула. Аьсрариан аьсрариз ад Гьадгъаз ву. Амин!