Рим агьларихьна вуйи кагъаз 10 - Гирами Китаб

Жугьдарихьан уьрхювал абгуз шулу

¹ Гъардшар, узуз йиз кӀваантӀан жугьдар дюрхну ккундузуз, ва Аллагьдиз гьадрарихъан ккарагураза.

² Фицики узу шагьидвал апӀураза, чпи Аллагьдихъ юкӀв хъипну янашмиш шулашра, дурариз дюз рякъ аьгъдар.

³ Гьаз гъапиш дурариз Аллагьди багъиш апӀру гьякьвал аьгъдайи, хъа чпин хусуси гьякьвал арайиз адабгъуз чарйир зигури, Аллагьдин гьякьвализ мютӀюгъ гъахьундар.

⁴ Месигьди, гьарсар хъугъу кас Аллагьдин улихь гьякь апӀбан бадали, Къанундиз аьхир дебккну.

⁵ Мусайи Къанундин гьякьваликан бикӀура: «Къанундин табшуругъар тамам апӀрур яшамиш хьиди».

⁶ Гирами китабариъ хъугъувализ дилигну туврайи гьякьлували гьамци кӀура: «Учву учвхьан мегьерханай: „Фуж аьршариз гъягъиди?“ душвʼан Месигь хъади гъюз?

⁷ ва мегьерханай: Месигь гъийихдарин паччагьлугъдиан хъади гъюз, „Фуж кӀан адрушваз гъягъиди?“»

⁸ Фу дупна Гирами китабариъ? «Аллагьдин Гаф увухъди хъа, яв багахь хьа, думу яв ушвниин ал ва яв кӀваъ а», ва думу Гаф ухьу адмийириз улупурайи хъугъувал ву.

⁹ Эгер уву яв ушвниинди: «Иса Агъа ву», – кӀури, Аллагьди Думу гъачӀидаригъян чӀиви гъапӀубдихъ, юкӀв хъипну, хъугъиш, уьрхидиву.

¹⁰ Гьарсар, юкӀв хъипну, хъугърур, Аллагьдин улихь гьякь хьиди; ушвниинди чан хъугъуваликан ктибтрур уьрхиди.

¹¹ Фицики, Гирами китабари кӀура: «Дугъахъ хъугърур беябур апӀуз хьибдар».

¹² Жугьдарна жара миллетар саб ву, фицики Агъара варидариз Сар ву, ва Чаз дих апӀру варидариз Дугъу ужʼвал тувру.

¹³ «Гьарсар, Агъайиз дих апӀрур, уьрхиди».

¹⁴ Хъа дурари чпи Хътругъруриз фици дих апӀиди? Фици чпиз Дерерхьрурихъ хъугъди? Хъа дурариз, Дугъкан сарикьан дарпиган, фици ебхьиди?

¹⁵ Хъа фици Дугъкан ктибтиди, ктибтрур гьадраиш? Гирами китабариъ дибикӀнайиси: «Фукьан гюрчег дарин Ужувлан хабар рабгърударин ликар!»

¹⁶ Аммаки вари жугьдари му Ужувлан хабар ибак апӀури гъахьундар. Ишаяйи гъапну: «Агъа, фуж хъугъну учу улупу аьгъюваларихъ?»

¹⁷ Гьаци вуйиган, Ужувлан хабар гъеебхьиган, хъугъвал гъюру. Хъа Ужувлан хабар, Месигьдикан ктибтруган, гъюру.

¹⁸ Амма узу кӀураза: «Дурариз Ужувлан хабар гъеебхьундарин?» ИкибаштӀан, гъеебхьну! «Вари дюнʼя вуйибси дурарин дихар гъарагънийи ва дурарин гафар дюнʼяйин тлихъан кӀулихъна гъурукьнийи».

¹⁹ Хъана кӀураза: «Израилин халкь мидин гъавриъ ахъундайкӀан?» Сифте Мусайин китабдиъ кӀура: «Узу учвуъ гъизгъинвал ачмиш апӀидиза, халкь ву дупну гьисаб апӀуз даршлу халкьдиинди. Узу увук хъял капӀдиза, шулайибдин гъавриъ адру халкьдиинди».

²⁰ Хъасин Ишаяйин китабдиъ кӀубанди кӀура: «Узу дарагди гъахьидариз Узу гъидихъну. Узу гьедрерхри гъахьидариз Узу ачмиш гъахьунза»,

²¹ хъа Израилин халкьдикан душваъ кӀура: «МютӀюгъ даршлу ва хъпебехъру халкьдиз вари йигъди Узу, хилар гьачӀаккну, дих апӀури гъахьунза».