Рим агьларихьна вуйи кагъаз 1 - Гирами Китаб

Саламар пуб

^1-2 Иса Месигьдин лукӀ вуйи, Аллагьди вакил хьуз кадагънайи ва Чан пайгъамбрарилантина Гирами китабариъ Чав гаф тувнайиганси, Аллагьдин Ужувлан хабар гъабхуз дих дапӀнайи Павелихьан саламар.

³ Му Хабарнаъ, Чан жилʼин гъабхьи уьмриз дилигну, Давудрин тухмиъ бабкан гъахьи Аллагьдин Балкан кӀура,

⁴ хъа Гирами Рюгьналантина Думу, гъачӀихъан, чӀиви духьну, Аллагьдин Бай вуди кьудратниинди улупна. Му ихь Агъа, Иса Месигь ву.

⁵ Гьадгъулантина узуз, Аллагь аьгъдру халкьар хъугъувалихъна ва хъпехъувалихъна хпан бадали, вакилвалин багъиш гъурубкьунзуз. Му ляхнар Дугъан ад бадали вуйидар ву.

⁶ Учвура гьацдар халкьарикан вучва: Аллагьди учвуз Иса Месигьдин терефкрар хьуз дих дапӀна.

⁷ Узу му, учвуз, вари Римдиъ яшамиш шулайидар, Аллагьдиз ккунидар ва Аллагьдин гирами халкь хьуз дих дапӀнайидар, бикӀуразачвуз. Ужʼвал ва мясляаьт ибшричвуз Аллагьдихьан, ихь Адашдихьан ва Агъа Иса Месигьдихьан.

Чухсагъулин ккарагуб. Римдиз гъюз тямягь хъайивал

⁸ Сифте нубатнаъ, учвхъан варидарихъанди, Иса Месигьдилантина узу йиз Аллагьдиз баркаллагь кӀураза, фицики, вари дюнʼя вуйибси, адмийириз ичв хъугъуваликан ебхьура.

⁹ Вари йиз юкӀв хъипну, Аллагьдин гъуллугънаъ аза. Дугъан Балкан варидариз Ужувлан хабар дебккри, гьарган узу учву кӀваин алауразачву. Магьа дидин шагьид Аллагь.

¹⁰ Гьарган узу йиз ккарагбариъ, Аллагьдин амриинди, узу учвухьна гъюз хьибдайкӀан, кӀури, тӀалаб апӀури шулза.

¹¹ Фицики, учвуз кьувват гъабхи рюгьнан багъиш учвухъди пай апӀуз, йиз учвухьна гъюз гизаф тямягь хъайиз,

¹² жараси кӀури гъабшиш, ихь хъугъувалилантина чиб-чпихьан кьувват бисидихьа – учву узхьан ва узу учвхьан.

¹³ Гъардшар, учвуз аьгъяди ккундузуз, жара халкьаризси, учвузра узкан артухъси мянфяаьт ктабгъуз шлуси, гизаф ражари узу учвухьна гъюз гьязур гъахьунза, хъа гьамусдизкьан, манигъвалар алахьури, гъюз гъабхьундарзухьан.

¹⁴ Вари халкьариз: гьам грекариз, улихь хьайи, ва имбудариз, кьяляхъ хъайи, гьам аьяндрариз ва сабдиканра хабар адрудариз – вардиз узу буржлу вуза.

¹⁵ Магьа гьаддиз узу учвуз, Римдиъ яшамиш шулайидариз, Агъайин Ужувлан хабар дебккуз гьязур вуза.

Ужувлан хабарнан кьувват

¹⁶ Узуз Агъайин Ужувлан хабар рабгъуз нач дарзуз, гьаз гъапиш дидиъ гьарсар хъугъру кас уьрхюз шлу Аллагьдин гьюкум а – сифте жугьдар, ва хъасин имбу халкьар.

¹⁷ Му Ужувлан хабарну, Аллагьди хъугъувалилантина, сифте бинайиан ккудубкӀайизкьан, адмийирикан фици дугъри касар ктауруш, улупура. Гирами китабариъ дибикӀна: «Дугъри касдиз хъугъвали уьмур тувди».

Вари адмийир гунагькрар ву

¹⁸ Гьякьвал чпин нягьякьвалихьди ккапӀрайи адмийири апӀру вари чӀурубдиз ва гьякьсузвализ аьршариан Аллагьдин хъял гъюру.

¹⁹ Адмийирихьан удукьру Аллагьдикан вуйи аьгъювалар, дурариз аьгъю гъахьну, гьаз гъапиш, Аллагьди Чав Чакан аьгъю хьуз гъитну.

²⁰ Дюнʼя арайиз гъабхихъанмина дярябкъру гьаммишандин кьувват ва Аллагьдин заанвал ачухъди аьгъю шула, фицики гьаму вари Аллагьди халкь гъапӀубдиинди рябкъюра. Гьаддиз, гьацдар адмийирилан хил алдабгъуб хьибдар.

²¹ Дурариз Аллагь аьгъяйишра, дурари хай шлуси Дугъаз гьюрмат гъапӀундайи. Мидин ерина, дурар чпин файдасуз фикрар-фагьмариъ ахъну, ва дурарин ахмакь юкӀвар кӀару гъахьну.

²² Чпи фагьумлу ксар вуча кӀурашра, дурар ахмакьар гъахьну.

²³ Дурари аьжалсуз Аллагьдин ад, аьжал хъайи адмийирин, жакьварин, гьяйванатарин, улчвухури гъягъру гьяшаратарин идоларихъ гьюдюхну.

²⁴ Гьаддиз Аллагьди дурар, чпин абдал тямягьяриъ, бедендиз ккуни кфирвалариъ аъру, чпин жанар, чиб-чпихъди чиркин апӀуз гъитру.

²⁵ Дурари Аллагьдикан вуйи гьякьвал кучӀларихъ гьюдюхнийи; хилари гъапӀу шейʼариз икрам апӀуйи, гьадрарин гъуллугънаъ шуйи, хъа халкь ГъапӀурин, гьаммишандиз ужувлиинди Айирин – ваъ. Амин.

²⁶ Гьамцдар апӀруган, Аллагьди дурар чпин аьйибнан тямягьяриъ гъитнийи. Дишагьлийири жиларихъди духьну ккунивал, табиаьтдиз къаршуди, дишагьлийирихъди сатӀи хьувалихъ гьюдюхнийи.

²⁷ Гьаци жиларра, табиаьтдиинди дишагьлийирихъди сатӀи духьну ккунивал гъибтну, табиаьтдиз къаршуди, чиб-чпихъди сатӀи хьувалин тямягьяриъ ахъна. Дурари чпин жанар, жара жиларихъди сатӀи шули, аьйибнан тӀулар апӀури, гьацдар аьйиб ляхнар апӀбиинди, лайикьлу вуйи жазайикк ккирчра.

²⁸ Дурариз Аллагь аьгъю апӀуз даккниган, Дугъу дурарихьди чпин дюз дару фагьмин лайикьсуз тӀулар апӀуз гъитнийи.

²⁹ Гьамцдар адмийир писвалари, тямягьяри, чӀурувалари, кьаст айивали, йивну йикӀуваларихьна ва гъярхьуваларихьна зигрували, кучӀлари ва жарадарикан гьарган варитӀан харжиди фикир апӀували – гьар жюрейин гунгьари ацӀна. Му адмийири футнийир апӀуру,

³⁰ сар-сарилан улхури шулу ва дурариз Аллагь даккунди ву. Дурар сарслидар ву, фурсари ацӀна, жарадарин улихь гьарган чпин адар апӀури шулу, писвал апӀуз рякъяр агру фикрари ацӀна, чпин абйир-бабариз мютӀюгъ шулдар.

³¹ Дурар ахмакьар ву, гьич саб вахтнара чпи туву гаф тамам апӀдар ва гьич саризра я гьюрмат, я ужʼвал апӀдар.

³² Дурари, Аллагьдин гьякьвалиинди гьамци тахсиркар вуйириз аьжал гьадабтӀуб лазим ву, кӀури, хабар ашра, неинки чпи гьаци апӀура, хъа гьаци апӀрударин терефра бисура.