Петрин-2 3 - Гирами Китаб

Иса кьяляхъ гъиди

¹ Йиз ккунидар, узу бикӀурайи кагъаз кьюбпиб вуйиз. Гьадму кагъзариъ узуз учву марцци фикрарихъна хуз ккунди азуз.

² Гьаци гъабхьиган, саб фила-вуш гирами пайгъамбрари гъапи гафар ва ичв вакилари учвухьна дурубкьнайи Агъайин ва Уьрхрурин табшуругъ кӀваинди уьрхидичва.

³ Сифтена-сифте учвуз аьгъю дубхьну ккундуки, аьхиримжи йигъари чпин хусуси тямягьярихъди гъягъру рихшанд апӀувалар арайиз гъиди.

⁴ Дурари, кялхъри, пиди: «Набши Дугъан, гаф тувнайиси, гъюрайивал? Магьа ич абйирра кивну архаин гъахьну, хъа вариб дюнʼя халкь гъапӀхъанмина чан гьаци ими».

⁵ Дурариз саб фила-вуш Аллагьдин Гафниинди жилар ва аьршар штукан ва штуинди халкь гъапӀубдикан кӀваълан гьархна.

⁶ Гьадму штариинди ккапӀну дюнʼя терг гъапӀнийи.

⁷ Хъа гьамусдин аьршарна жилар, Аллагьдин гьадму Гафниинди цӀа йивну ккидирчуз ва Месигьдихъ хътругъдар йихуз, суддин Йигъ хьайиз уьрхюра.

⁸ Йиз ккунидар, магьа фу учву кӀваълан гьархну ккундарш: Агъайиз сад йигъ – агъзур йисси ву ва агъзур йис – сад йигъси.

⁹ Агъайи Чав гъапиб тамам апӀуз, гьеле сакьюдари кьан апӀура кӀурашра, кьан апӀидар. Гьатци, Думу ухьуз гъилигиган гизаф сабур айир ву, Дугъаз ухькан фужкӀа дукӀну ккундар, хъа вари, чпи гъапибдиин ва гъапӀубдиин швумал духьну, Чахьна илтӀикӀну ккунду.

¹⁰ Хъа Агъайин Йигъ, тӀафалси, хабарсузди гъибди. Гьадму йигъан аьршар-завар рахру гъугърумарин дихарихъди дургди; заварин табиаьтар даргъиди ва ургиди; дюнʼяра, чан ляхнар улихь гьаъну, тахсирназ хибди.

¹¹ Ва эгер вари гьамци ккадахьуруш, хъа учву фицдар духьну ккунду, фициб гирамиб ва Аллагьдиз бахш дапӀнайиб вуди ккунду ичв уьмур?!

¹² ЦӀа алабхънайи аьршар ккадахьруган ва завариъ айи ригъар-хядар цӀиъ ерцӀруган, аьгь дарапӀди ва тямягьниинди Аллагь гъюру Йигъаз, учву, гьацдар, фици ккилигуз ккачва?!

¹³ Ухьу, Дугъу гаф тувиганси, дугъривалтӀан адру цӀийи аьршариз ва цӀийи дюнʼяйиз ккилигурахьа.

¹⁴ Магьа гьаддиз, йиз ккунидар, учву Аллагьдихъди мясляаьтнаъ хьпан бадали, гьамци шлувализ ккилигбиинди марццидар ва гаф ктрудар хьуз чара зигай.

¹⁵ Хъанара, Аллагьдин гьадмукьан зурба сабур – учву уьрхюз мумкинвал туврайивал – ичв хайирназ вуди гьисаб апӀинай. Мидкан Аллагьди чаз тувнайи фагьумлувалиинди вари чан кагъзариъ ихь масан гъардаш Павелира гъапнийи.

¹⁶ Дугъу мидкан чан вари кагъзариъ гъибикӀнийи. Дурариъ гъавриъ ахъуз читин шейʼарра а. Дицдар йишвар аькьюлсуз ва мюгькам дару адмийири, Гирами бикӀбарин имбуну йишварси, чпин аьжалназ, айтӀлан апӀуру.

¹⁷ Хъа, йиз ккунидар, учвуз мидкан мугагьназра хабар айиган, намус адру адмийирин кучӀлари учву чпихьинди хъчӀючӀюхюз ва ичв ижми бин ккидидипуз, ихтиятди гъузай.

¹⁸ АйибтӀан артухъ ихь Агъа, Уьрхрур – Иса Месигь, ва Дугъан ужʼвал аьгъю апӀури, гьаддиъ аьхю йихьай. Дугъан ад ибшри гьамусси, гьаммишандин Йигъ гъафиганра. Амин!