Петрин-2 2 - Гирами Китаб

КучӀлин мялимар

¹ Мидлан савайи, халкьдин арайиъ кучӀлин пайгъамбрар ачмиш гъахьиганси, ичв арайиъра кучӀлин мялимар ачмиш хьидивучв. Дурарихьан аьжалихъна гъахру чпин кучӀлин каламар арайиз адагъуз хьиди. Дурари чпи азадвал бадали кадагънайи Гьюкумдар (Агъа) тина апӀиди. Дурар, Агъа кьабул дарапӀбиинди, багарихьди чпи тӀанкь апӀувалихъна гъиди.

² Гизафдари дурари апӀрусдар ягьсуз ва намуссуз тӀулар апӀуз дубгъиди ва гьацдариинди гьякь рякъ биябур апӀуз йишв тувди.

³ Дурар ацӀру касар дар. Дурар чпин иблис ва аьмалдар каламариинди учвлантина гизаф девлетлу хьиди. Аммаки, дурариз ухдитӀан жаза гьадабтӀну гьязурди а, диди кьан апӀидар, ва дурарин аьжал даабхнадар!

⁴ Аллагьди гьеле малайикаркьан гьяйиф гъапӀундар; дурари гунагь гъапӀиган, жегьеннемдиъ дурар уржнийи ва гьаммишандин мучӀушнан зунжрарихьди суддин Йигъ гъяйиз дитӀнийи.

⁵ Дугъу лап кюгьне дюнʼяра гьяйиф гъапӀундар; гьякьʼваликан хабар дебккри гъахьи Нюгьдилан ва дугъахъди хъайи ургур касдилан гъайри, гьюрмат адрударин дюнʼя штухьди ккапӀнийи.

⁶ Содом ва Гомора шагьрарра, гъюз ккимбу гьюрматсузариз мисал вуди, ккидирчну, рюкъдиз илтӀикӀну.

⁷ Хъа Дугъу дугъривалиинди яшамиш шулайи, ягьсуз уьмур хъапӀрайи законсузариккан аьсси духьнайи Лут, гъюрхну.

⁸ Гьаму гьялал касдиз, гьамгъан дугъри гъяназ гьадрари апӀурайи тӀулар ерхьуб ва рякъюб гьар йигъан чакан кчӀикьурайи зивзиварси гьугъужвуйи.

⁹ Намус ва гъирʼят айи касар Агъайиз читинвалариккан уьрхюз аьгъя, хъа гьякьсузар – суд апӀру Йигъаз жаза адабтӀуз уьрхюз аьгъя.

¹⁰ Дурарикан гизафна-гизафси, Агъайин гьюкум гьясбикк ккадарди, чпин жанариз ккунибси апӀру чиркин тямягьярихъди гъягърударин язухъ ву! Гьясбикк ккадру тӀулар апӀрудар ва эдеб адрудар, чпи аьршарин кьудратар биябур апӀурайивалихьан гукӀнидикьан адар.

¹¹ Агъайин улихь тахсрар кирчри, дурарилан улхурайи малайикарикьана, гьеле дурар адмийиртӀан фукьан гизаф кьувватлудар ва удукьрудар вушра, дурар биябур апӀурадар.

¹² Дурар сабдизтӀан хай дару – дисуз ва йихуз пну бабкан шлу, чпин нефстӀан аьгъдру фагьумсуз гьяйванатарсдар ву. Дурари варибдиз чпин фагьмихьан аннамиш апӀуз даршлу агьрар апӀуру. Гьадму гьяйванатарси дурарра йихиди.

¹³ Дурарин чпи гъапӀу чӀурувалариз – чӀурувалʼинди тувди. Дурариз йигъандин аквнахьди кефер хъауз меэлди ву. Дурар чпи ву кфирвал ва ужузвал. Дурари, учвуз кучӀлин чулар ургъбиинди учвухъди саб суфрайихъ деъну, кьукьар апӀура.

¹⁴ Дишагьли гъяркъюбси, дурарин улар кьяппавали ацӀра, ва гьациб гунагьнахьан гьудучӀвуз ккундар. Дурари, чпин дисру рукьариъ итуз, зяиф гъян айидар хъчӀюхюри шулу. Дурарин юкӀвар иблисвалихьди дидиржна. Дурарин кьисмат – пуч хьувал ву.

¹⁵ Дурар диш рякълан улдучӀвну ва ургну. Дурар гунагькар ляхнар апӀузди тувру пешкешнаъ ул абхъну гъушу Боросдин бай Валаамдин рякъюъди гъушну.

¹⁶ Думу Валаам, писвалар апӀурайиган, чӀал аьгъдру дажди, инсандин чӀалназ дуфну, гъидиснийи, ва гьадму пайгъамбрин фагьумсузвал дебккнийи.

¹⁷ Дурар дерццнайи булагъар ву. Дурар, гужал микӀари гьирчнайи кӀару кьюкь-дифар ву! Дурариз гьаммишандин жегьеннемдин мучӀушин ккилибгура.

¹⁸ Дурари чпин кьил ктру гафариинди, ичӀи улхбариинди, гьуркӀну удудукьру жандиз ккуни тямягьярин кюмекниинди, кучӀлариъди яшамиш шулайидарихьан ярхла хьуз хъюгънайидар, чпихьна хъчӀюхюру ва чпин бацаригъ чӀюркьюру.

¹⁹ Дурари, чпи пуч шулайи лукӀʼвалиъ ахънайидари, дурариз азадвал тувуз гаф туври шулу. Фуж фтиз мютӀюгъ шулаш, думу гьаддин лукӀ шула.

²⁰ Эгер ихь Агъа ва Уьрхрур – Иса Месигь аьгъю хьувалиинди гьаму дюнʼяйин чиркинваларихьан гьудучӀвнайидар хъана гьадму чиркинвалариъ ахьиш, дурар хъана гьадрарин лукӀʼвалиъ ахьра. Сифте чпин чиркинвалариъ айибтӀан, гьамус хъадахъну ахъуб – хъа яман ляхин ву.

²¹ Дурариз, гьякь Рякъкан аьгъю дубхьну, чпин хилиъ ивнайи гирами табшуругъарихьан гьудучӀвайиз, дидкан зат аьгъю гъабхьундайиш ужу хьибдийи!

²² Дурарихъди гъабхьибди гьаму мисалнаъ дупнайиб дюз вуйиб улупура: «Ху хъана чан ибичубдихьна хътабкуру» ва «Сил жибкӀ – думу хъана батӀриан идибгъиди».