Петрин-2 1 - Гирами Китаб

Аллагьди ухьуз лазим вуйиб вари тувна

¹ ЛукӀвал апӀурайи Иса Месигьдин вакил Петрихьан – Аллагьди гьякь апӀбиинди ва Уьрхрурин – Иса Месигьдин кюмекниинди ухьуз гъабхьибсиб багьа хъугъувал гъабхьидариз – саламар.

² Учвуз Аллагь ва ихь Агъа Иса аьгъю апӀувалилантина гизаф ужувлар ва мясляаьтар ишричвуз!

³ Исайин Аллагьвалин кьувватну ихь уьмриз гьарсаб лазим вуйиб ва лап кӀваантӀан Аллагьдин гьюрмат уьбхрувал тувнахьуз. Му Чан хусуси адниинди ва Чав ужувлан ляхнар апӀбиинди Учв ухьуз аьгъю хьувалилантина гъурубкьунхьуз.

⁴ Гьаму Касдиланмина ухьуз, гаф тувнайиси, варитӀан багьа ва варитӀан зурба ужувлар дурукьнахьуз. Дурар ухьуз, гьаму дюнʼяйин тямягьяриланмина гъюру аьжалнахьан гьадрарин кюмекниинди учву ярхла духьну, Аллагьдин хасиятнак ктикьбан бадали, багъиш дапӀнайидар вухьуз.

^5-7 Гьаму себеб вуди, ичв хъугъувал – ужудар ляхнариинди, ужудар ляхнар – аьгъювалариинди, аьгъювалар – аьгь апӀбиинди, аьгь апӀуб – ижмишниинди, ижмишин – ужуб гьюрматниинди, ужуб гьюрмат – чвевалин дуствалиинди, дуствал – масанвалиинди мюгькам апӀбан бадали, ичв вари кьувват жалб апӀинай.

⁸ Эгер учвуъ гьамцдар хасиятар аш ва учву дурар зарб апӀуруш, ихь Агъа Иса Месигьдикан вуйи ичв аьгъювалар дурари мянфяаьтсузди ва бегьерсузди гъитдар.

⁹ Хъа гьацдар хасиятар кадрур улихьишв дярябкърайир ва кур ву, чан мугагьназ кайи гунгьарихьан марцц духьнайивал кӀваълан гьапӀнайир ву.

¹⁰ Магьа гьамдиз, гъардшар, хъана аьхю кьувватниинди учвуз дих дапӀнайивал ва учву кадагънайивал тасдикь апӀинай. Гьамци апӀури гъашиш, гьич саркьан алдакидарчва!

¹¹ Гьадмуган учвуз ихь Агъа ва Уьрхрур Иса Месигьдин гьаммишандиз вуйи Паччагьлугъдиъ учӀвуз ихтияр жумартлуди багъиш дапӀну хьибди, аьхир.

¹² Магьа гьаддиз йиз ният вуйиз учвуз гьамдикан гьаммишан кӀваин алапӀуз, гьеле учвуз гьаму варибдикан аьгъяшра ва учвуз дурубкьнайи гьаму гьякьвалиин учву мюгькам духьнашра.

Месигьдин аднан шагьидар

¹³ Сабан узу йиз гьаму бедендин халиъ яшамиш шули имбукьан гагьди, ичв фагьмиз мидкан кӀваин алапӀури, думу гьарган уягъ апӀуз узу йиз буржи вуди гьисаб апӀураза.

¹⁴ Узуз аьгъязуз, аьхир, гьаму йиз хал узхъан хътибтру вахт багахь шула – му узуз ихь Агъа Иса Месигьди ачмиш гъапӀунзуз.

¹⁵ Узу гъушхъантинара ккуни вахтна учвхьан, гьамдикан кӀваин алапӀуз шлуганси, узу йиз хилʼан удубкьруб вари апӀидиза.

¹⁶ Учу учвуз, ихь Агъа Иса Месигь кьудрат хъади кьяляхъ гъиди, гъапиган, учу шлин-вуш аьмалдар махъвар текрар гъапӀундайча. Ваъ, Дугъан зурбавал учуз ич улариинди гъябкъюнчуз!

¹⁷ Дугъахьна «Му Йиз масан Бай вуйиз, Гьадгъаъ Йиз шадвал айиз» кӀуру зурбавалин Аднан дих гъабхьиган, Дугъу Аллагь Адашдихьан гьюрмат ва ад кьабул гъапӀну.

¹⁸ Ва гьаму дих завариан гъафнийи – учуз, Дугъахъди гирами дагъдиин алиган, ич ибариинди гъеебхьунчуз.

¹⁹ Миди ухьуз пайгъамбри гъапи гафар дюз вуйивал хъана артухъди улупура. Учву дурарин гафарихьна, Йигъ аку дубхьну ичв юкӀвариъ гвачӀиндин Хяд гьудудубчӀвкьан гагьди мучӀушнакк убгурайи чирагъдихьнаси янашмиш шулаш, ужуб апӀурачва.

²⁰ Хъа сифтена-сифте кӀваин гъибтну ккундуки, Гирами бикӀбарин гьич сабкьан гъюз имбубдикан гаф адмийи ачмиш апӀуз хъюгъну ккундар,

²¹ фицики адмийин ниятниинди гьич саб вахтнара пайгъамбрарихьан вуйи гъюз имбубдикан гафар гъахьидар дар. Ваъ, адмийири Аллагьдихьан гъюруб кӀуйи ва дурар гьаддихъна Гирами Рюгьну хуйи.