Петрин-1 4 - Гирами Китаб

Уьмриъ дигишʼвалар

¹ Гьаци вуйиган, беден аьзабарикк ккабхъбиинди Месигьди фици аьзиятар гъизигнуш, учвура гьацдар фикрар гьисабназ гъадагъай. (Гьаз гъапиш, беден аьзабарикк ккабхърури гунгьар апӀуб гъибтру).

² Гьацдар фикрар гьисабназ гъадагънайиган, гъюз имбу уьмур – инсандиз ккуниси ваъ, хъа Аллагьдин ниятнаккди хъапӀуз шулу.

³ Дарди хьуз, Аллагь кӀулʼин алдрударси, мяна адру уьмур тямягьяриъна пиянвалариъ, кьяппавалариъна намусузвалариъ ипну, гьар жюре аллагьаризна идолариз икрам апӀури, учву бегьем вахт гьавайиди гьапӀунчва.

⁴ Хъа гьамус дурариз учву, чпихъди чпи айи аьгьвалиъ имдруган, аьжайибди гъугъубжвура ва ушвнихъна гъафиб вари кӀурачвуз.

⁵ Аммаки дурар багарихьди чӀивидаринна гъийихдарин суд апӀуз Гъюрурин улихь чпи гъапибдинна гъапӀубдин жаваб тувуз мажбур хьиди.

⁶ Магьа гьаддиз, гьеле чпи адмийирди имиди бедендиинди жаза дурариз гьадабтӀундаршра – хъа думу жазайиккан дурарихьан ккудучӀвуз хьибдар – хъа чпин рюгьнииндикьан Аллагьдин уьмрихъна гъюбан бадали, Ужувлан хабар гъийихдаризра дебккнийи.

⁷ Варибдин аьхир багахь шула. Гьаддиз ачухъ фикир айидар йихьай, фагьум апӀинай, хъа гьадмуган ккарагуз хьибдичвухьан.

⁸ Сифтена-сифте вари кӀваантӀан чиб-чпи ккун апӀинай, гьаз гъапиш масанвали гизаф гунгьар ккеркру.

⁹ Мурмрар дарапӀди, хялар кьабул апӀури йихьай.

¹⁰ Учвкан гьарсариз жарариз дарубсиб хъуркьвал дурубкьначвуз, гьаци вуйиган Аллагьди учвуз багъиш дапӀнайи гьаму гьарсаб жюре хъуркьувалар, чиб-чпин гъайгъушнаъ шлуси, мянфяаьтлуди ишлетмиш апӀинай.

¹¹ Эгер шлиз гафар апӀувалин хъуркьувалар аш, гъит, дугъу Аллагьдин хабарнакан гаф рабгъри; шлиз гъуллугъ апӀбаъ хъуркьувалар аш, гъит, Аллагьди туврайи кьувватнаъ учв мюгькам ишри. Гъит, варидари Иса Месигьдилантина Аллагьдин ад бадали жафа зигри! Гьадгъаз ибшри аьсрариан-аьсрариз ад ва кьудрат, амин!

Хъугърударин сабурлуваликан

¹² Йиз багьаллуйир, учвухъди фу-вуш саб аьжайиб шула, кӀури, учвʼин алахьурайи гъагъи аьзабариин-аьзиятариин мюгьтал махьанай.

¹³ Хъа гьатцидарихъинди, учву Месигьдин аьзабариъ иштирак шулачва ва, гьаддиз, шад йихьай, хъа гъиямат йигъан, Иса Чан аднаъди гъафиган, шадвали ацӀдичва ва гьарай ипдичва.

¹⁴ Эгер учву Месигьдин ччвурналантина биябур апӀураш, учву бахтаврар вучва, му гьадму кӀуру гаф вуки, Аллагьдин Рюгь Чан вари аднаъди учвуъ архаин духьна.

¹⁵ Эгер учвкан сар фуж аьзабнаъ аш, гъит, думу аьзаб йивну йикӀбалан, ясана гьитӀибкӀбалан, ясана законсузваларилан, ясана футна апӀувалилантина вуйиб дарибшри.

¹⁶ Учву Месигьдихъ хъугънайивалилантина аьзиятариъ ахьнаш, гъит, дицири нач дарапӀри, хъа, гъит: «му Исайихъ хъугърур ву», – кӀуруган, Аллагьди учвуз гьациб ужʼвал дебккнайивализ дилигну, гьацири Дугъан ад апӀри!

¹⁷ Гьаз гъапиш Суд апӀру йигъ багахь хьа. Хъа думу Аллагьдин хуландарилан ккебгъди. Хъа думу ухьлан ккебгърайиган, Аллагьдин Хабар кьабул дарапӀрайидарин аьхир фициб шуйкӀан?!

¹⁸ «Эгер гьякь вуйирихьан саб нуфтдитӀан жвув уьрхюз шулдарш, хъа фу шул кацӀнайидарикан ва гунагькрарикан?»

¹⁹ Гьаддиз Аллагьдин ниятниинди аьзабнакк ккайидар, гъит, гьуркӀну чпи вариб халкь ГъапӀурин ихтиярнаъ учӀври – Думу гьарган аьгьтлур ву – ва чпин фикрар ужудар ляхнариина жалб апӀри.