Петрин-1 3 - Гирами Китаб

Жиларин ва хпарин гьякьнаан

¹ Учвура, хпар, ичв жилариз гьаци мютӀюгъ йихьай. Дурарикан шли Аллагьдин Гаф кьабул апӀурадарш, чпин хпарилантина,

² ичв марцци ва Аллагьдихьан гучӀру уьмур уларикк ккади рябкъюрайибдиинди, саб гаф адарди, дурарра хъугъвалихъна гъиди.

³ Гъит ичв усппагьивал, гьар жюре аьжайиб кӀюлгънар апӀбиинди, гъизиларихьди балгбиинди, ясана уччвудар палтариинди чӀатлануб дарибшри,

⁴ хъа – айтӀануб: чӀур даршлу усппагьивал улупру хъпехъувалиинди ва гьюжатариз ададапӀру рюгьниинди кӀваан вуйиб ибшри – гьамциб ву Аллагьдин улихь багьавал.

⁵ Фила-вуш садар вахтари, Аллагьдиин хъугъвал али дишагьлийири, чпи гьамцдариинди балгуйи, аьхир! Дурар чпин жиларихъ хъпехъуйи.

⁶ Мисалназ, Сара, варибдиъ Ибрагьимдихъ хъпехъуйи ва дугъаз чан агъа кӀуйи. Учвура Сарайин шубар вучва – эгер учву ужувлар апӀуруш ва гучӀури хьуваликк кӀул ккивруш.

⁷ Ари гьамци, сатӀлан вуйи уьмриъ жиларра чпин хпарихьна лайикь вуйибси духьну ккунду. Дурарин гьюрмат дюбхну ккунду, гьаз гъапиш, гьеле дурар цӀибди зяифдар вушра, жиларихьди сабси ужувлан багъишдин ирсчйир ву. Гьаддиз, учву ккарагруган, гьич сарихьанра машат апӀуз хьибдарчвуз.

Гьякь ляхин апӀузди алабхъру аьзабнакан

⁸ Аьхирки, гъит ичв сабсдар фикрар ва гьиссар ишри, ичв гъардшарихьна вуйи саб масанвал ибшри, язухъ зигуб ва фурс ктрувал ибшри.

⁹ Писвализ – писвалиинди, биябурвализ – биябурвалиинди жаваб мутуванай, хъа жараси, ужʼвал апӀбиинди жаваб тувай, гьаз гъапиш, учвуз гьаддиз дих дапӀна ва учвузра, ирс вуди, ужʼвал дебккуз гаф тувна.

¹⁰ «Шлиз бахтаварвалиинди яшамиш духьну ва ужудар йигъар дяркъну ккундуш, гъит, мелз чӀурубдихьан уьбхри, хъа ушв – кӀучӀлихьан.

¹¹ Гъит, писвалихьан ярхла ишри, гъит, ужʼвал апӀри; гъит, мясляаьт абгри, гъит, ислягьвал арайиз хури,

¹² фицики Агъайин улар гьякьлудариин ал ва ибар дурарин ккарагбарихъ хъивна. Хъа писвалар апӀурайидарихьинди лигруган, Агъайин машнак хъял кубчӀвру».

¹³ Хъа шлихьан учвуз зарал тувуз шидихъа, эгер ужʼвал апӀузтӀан ичв тямягь хътарш?

¹⁴ Гьеле учву, ичв гьякьвализ дилигну, балйирикк ккахънашра, бахтаврар вучва! Дурариз гучӀурайибдихьан гучӀ мапӀанай ва гучӀʼвалиъ мугъузанай!

¹⁵ Хъа Агъа Месигьдин гьюрмат ичв юкӀвариъ гирамиди уьбхяй. Учвуъ яшамиш шулайи умуд фтиин биналамиш дубхьна, кӀури, гьерхруриз, ккунириз жаваб тувуз шлубси гьязурди гъузай;

¹⁶ анжагъ аькьюллудина гьюрматлудитӀан жаваб мутуванай. Учву яшамиш шулайи ичв гъяни уьмур кьабул дарди, люкьнар апӀру адмийириз, Месигьдихъ хъугъиган, чпин гъапӀу гафарихьан нач шлуси, ичв намус марцциди уьбхяй.

¹⁷ ЧӀуруб дапӀну, аьзабнакк ккуркьайиз, эгер Аллагьдин ният вуш, ужуб дапӀну аьзабнакк ккахъуб хъа ужуйи даринхъа!

¹⁸ Гьаци Месигьра, ухьу гъапӀу гунгьарихъанди, сабан ва гьаргандиз, Гьякьлур гьякьсузарихъанди, учву Аллагьдихьна хпан бадали, ккахъундаринхъа! Дугъан беден аьжализ тувну гъабкӀну, хъа Рюгь уьмрихъна кьяляхъ хътакну.

^19-20 Иса гьадму Рюгьнаъди, мучӀушнаъ айи рюгьяриз Ужувлан хабарнакан ктибтури, гъушну. Думу рюгьяр, дюнʼя, шид илипну, ккапӀуз ккунди, Нюгьди гими апӀайиз Аллагь сабурлуди ккилигурайи вахтна, Аллагьдихъ хъпебехъу адмийирин рюгьяр ву. Нюгьдихъди штуин али гимдиъди сакьюдартӀан гъюрхюндайи – анжагъ миржир кас.

²¹ Думу шид, цӀийи хьуз, штуан хьувалин лишан ву. Думу лишан гъира кмиди учву уьбхюрайиб ву. Штуан хьувал – му ичв жандилан чиркшин алдапӀувал дар, хъа ичв марцци кӀвахьан Аллагьдиз тувнайи гаф ву, Иса Месигь чӀиви хьубʼинди учву уьрхюрайи.

²² Завариина за духьну, Думу гьамус Аллагьдин арччул хилихъинди хъа. Дугъаз вари малайикар, гьюкмар ва кьудратар мютӀюгъ гъахьну.