Петрин-1 2 - Гирами Китаб

ЧӀиви гъван ва гирами халкь

¹ Гьаци вуйиган, гьарсаб чӀуруб, гьарсаб кучӀал, кью-кьюб маш гъивнайивал, маш ккадарди хьувал, гьар жюрейин футнийир гатӀахьай.

² Тазади бабкан духьну имбу бицӀидарси, рюгьнан тӀяаьмлу никкдихъ, гьаддин кюмекниинди аьхю хьуз ва уьрхювал гъазанмиш апӀуз, тямягь хъивай.

³ ИкибаштӀан, Агъа фици ужур вуш, учвуз аьгъю гъабхьунчвуз.

⁴ Гьадгъахьна гъачай – чӀиви Гъвандихьна, адмийири тина гьадапӀубдихьна, хъа Аллагьди ктабгъубдихьна, Дугъан уларихь багьа вуйибдихьна.

⁵ Учвура, чӀиви гъванарикан хал диврайиси, ичв учвкан рюгьвалин хал тикмиш апӀинай. Гьадмуган, гирами вуйи гъуллугъчйир хьпан кьяляхъ, Месигьдиланмина Аллагьдиз кьабул вуйи, Рюгьниинди вуйи гъурбнар апӀидичва.

⁶ Гьаз гъапиш, Гирами китабариъ гьаци кӀура: «Магьа, Узу Сион дагъдиин мурччван гъван дивдиза – кадабгънайиб, багьа вуйиб. Дугъахъ хъугъру гьич саркьан биябур хьидар».

⁷ Гьаци вуйиган, учвуз, хъугърудариз, Думу зурба хазна ву, хъа хътругърудариз – «Устайи тина гъапӀу гъван мурччвануб гъабхьну»,

⁸ ва «Му Гъван хъарсру гъван ву. Му Гъвандихъ хъарсу адмийир алдакуру». Магьа, дурар хъарсну, гьаз гъапиш Ужувлан хабарнахъ хъугърадар. Дурарихъди гьаци шулайиб ву.

⁹ Хъа учву, кадабгънайи жинс, Паччагьдин гъуллугъчйир, гирами халкь, Аллагьдин хусусият, мучӀушнаан Чан аьжайиб аквнаъ хьуз учвуз Шли дих дапӀнаш, Гьадгъан зурба ляхнарикан хабар дебккбан бадали, гъядягънайидар вучва.

¹⁰ «Саб вахтна, халкь ву дупну – халкь дарудар, хъа гьамус – Аллагьдин халкь. Улихьди – ужʼвал дархьидар, хъа гьамус думу учвуз гъабхьунчвуз».

¹¹ Йиз багьа вуйидар, гьаму дюнʼяйиин улукьуз дуфну, кьяляхъ гъягъюри рякъʼин алидарси, кӀвахьди дяви гъабхурайи жандин тямягьярихьан ярхлади гъузуб учвкан ккун апӀураза.

¹² Гъит, ичв хасият Аллагьдихъ хътругърударин арайиъ марцциб ибшри. Ва гьадмуган, гьаму ражари учвуз, пис касар ву, кӀури люкьнар апӀурайидари, учву апӀурайи ужувлан ляхнар рякъюри, Аллагь гъафи гъиямат йигъан, Дугъан ад апӀиди.

Гьюкумдариз мютӀюгъ йихьай

¹³ Агъа бадали мютӀюгъ йихьай адмийири дерккнайи вари гьюкмариз,

¹⁴ гьюкум гъабхурайидариз, гьаз гъапиш дурари тӀафларизна тӀарашчйириз жазйир гьадатӀуру ва ужувлар апӀрудариз пешкешар тувру.

¹⁵ Даршуз Аллагьдин ният гьациб ву: ужувлар апӀрудари, абдларин чӀуруди улхру ушварихь, ужудар ляхнар апӀбариинди гьитӀибшвну ккунду.

¹⁶ Хъа учву, азад адмийир вуйивализ дилигну, ахмакь ляхнар ккеркуз ичв азадвал ишлетмиш мапӀанай – учву Аллагьдин лукӀар вучва, аьхир.

¹⁷ Варидариз гьюрмат апӀинай, гъардшар ккун апӀинай, Аллагьдихьан гучӀ апӀинай, паччагь гьисабназ гъадагъай.

¹⁸ ЛукӀар, ичв агъйириз хай гъюру жюрейиинди гучӀʼвал кади, неинки гъянириз ва гъюдлириз, хъа учӀвру хасият хъайириз вушра, мютӀюгъ йихьай.

¹⁹ Тяриф хьибди, чан аьзабар аьгь апӀрурин, гьаз гъапиш дицир Аллагьдин ниятнан гъавриъ айир ву; думу лайикь дарди бедбахтваларикк ккахъна.

²⁰ Хъа эгер, тахсир дапӀну, учву урччвураш, ичв фициб ад шул? Хъа учву ужʼвал апӀури, аьзабар сабурлуди аьгь апӀуруш, Аллагьдин улихь ичв аваза за хьибди.

²¹ Учвуз, учву гьамци хьуз, дих дапӀначвуз, аьхир, гьаз гъапиш Месигь учвхъанди аьзабарикк ккахъну ва Дугъу дурар аьгь гъапӀну. Дугъу учвуз, Чан шилнаъди гъюз, мисал гъибтну.

²² Дугъу «гунагь гъапӀундар ва Дугъан ушвниин кучӀал илибшундар».

²³ Учв биябур апӀруган, Дугъу Чавра адмийир биябур апӀуз хъюгъюндар. Учв аьзабарикк ккахънайиган, Дугъу гучӀар ккаундар, хъа Дугъу Учв гьякь вуйи Судʼяйин хилиз тувнийи.

²⁴ Дугъу Чав, ухьу гунгьариз дийихнайидарси хьуз ва гьякьвал бадали яшамиш хьуз, Чан хусуси бедендиъди ихь гунгьар хачриина гъухну. Учву Дугъан зийнариинди сагъ гъахьунчва.

²⁵ Учву саб фила-вуш, марччарси, улдугнайчва, хъа гьамус учву ичв Марччлихънихьна – гъайгъу Зигрурихьна кьяляхъ хътакунчва.