Петрин-1 1 - Гирами Китаб

ЧӀиви умуд

^1-2 Иса Месигьдин вакил Петрихьан гъурабйирди жара жилариин Понтдиъ, Галатдиъ, Каппадокияйиъ, Азияйиъ ва Вифанияйиъ дарагънайи, Аллагьди Чан рябкъювалиинди кадагънайи хъугънайидариз, учву, Рюгьну гирами дапӀнайидар, Иса Месигьдихъ хъпехъбан ва Дугъан ифдиинди марцц хьпан бадали, учвуз гьуркӀну вуйи ужʼвал ва мясляаьт ибшричвуз!

³ Ихь Агъа Иса Месигьдин Адаш ужувлиинди ишричав. Дугъу, Иса Месигь чӀиви апӀбиинди Чан зурба вуйи ужʼвал улупну, ухьу заълан бабкан гъахну ва цӀийи уьмрихъ хъаъну.

⁴ Гьамдиинди ухьук, я аьжалихьан, я камиваларихьан, я вахтнахьан чӀур апӀуз даршлу, чӀиви миж кивунхьук. Ихь миж кайи «девлет» ухьуз аьршариъ уьбхюра.

⁵ Учвуз, ичв хъугъувализ дилигну, Аллагьдин кьудратнакк ккайидар, гъиямат йигъахъна аьхиримжи вахтари ачмиш шлу уьрхювал рубкьидичвуз.

⁶ Гьаци вуйиган, гьеле сацӀиб вахтари гьаржюре читинвалариъ учӀврушнар кчӀикьуб алабхъурушра, гьамдиин шад йихьай.

⁷ Аьгъю йибхьайки, гъизилра цӀиинди таза алапӀурайиб. ЦӀихьан гьеле думу зат имдарди деебцӀну гъядапӀузра шулу, хъа ичв хъугъувал гъизилтӀан лап артухъ багьа ву, ва думу, гьякьди вуйиб вуш, ясана – дарш, Иса Месигь кьяляхъ гъафи вахтна гъиямат йигъан жвуван тяриф, ад ва заанвал жвувахьна рубкьбан бадали, ахтармиш дапӀну ккундарин?!

⁸ Думу (Иса) ккундучвуз, гьеле учвуз гъяркъюндаршра, учву Дугъахъ хъугърачва, гьеле гьаму ражари Думу ичв уларикк ккадаршра. Учву улупуз даршлу аьжайиб шадвали ацӀну урхьурачва,

⁹ гьаз гъапиш ичв хъугъувалин метлеб кӀулиз удубчӀвурайичв – ичв уьрхювал.

¹⁰ Гьаму уьрхюваликан чпин вахтари гьеле пайгъамбрари чпихьан удукьрубкьан ужуйи ахтармишʼвалар гъахури гъахьнийи, ва улихьмиди Аллагьдин гъянивалиан учвуз тувнайи багъишдикан гъапнийи.

¹¹ Дурари, Месигьдин Рюгьну фуну вахтнакан кӀураш, фицдар гьялариъ Месигьдин аьзабар шулуш, ва гьадму аьзабарин кьяляхъ шлу Дугъан аднакан аьгъю апӀуз ккунди, ахтармишʼвалар гъухнийи.

¹² Пайгъамбрариз чпи чпин – ваъ, хъа – ичв гъайгъушин бадали гъилихуваликан ачмиш гъабхьнийи. Дурари аьршариан гьаънайи Гирами Рюгьну дебкку Ужувлан хабарнакан хабар дебккнийи – гьаму ражари рабгъурайи Ужувлан хабар. Гьаму сир аьгъю апӀуз ккунди, гьеле аьршарин малайикарра кмиди тямягьну йихура.

¹³ Гъит, гьаддиз ичв фагьум фагьмихъ хъади ибшри, ва ляхнар апӀуз гьаммишан гьязурди гъузай. Вари ичв умуд Аллагьдин гъянивалиин илипай, хъа гъиямат йигъан Иса Месигь гъафиган, учвуз ичв умуд кайиб вари багъиш апӀиди.

Гирами уьмрихъна дих

¹⁴ Хъпехъру бицӀидарси, учву Аллагьдихъна гъяйиз айи ичв тямягьяр фицдар вуйиш, гьадрарихьди ичв уьмур хъапӀуз мигъитанай.

¹⁵ Хъа гьатци, учвуз дих ДапӀнайир фици Гирамир вуш, учвура гьаци гирамидар йихьай ва ичв хасиятра гирами вуйиб ибшри.

¹⁶ Гьаддиз БикӀбариъ дупна: «Гирамидар йихьай, гьаз гъапиш Узу Гирамир вуза».

¹⁷ Эгер учву сабдизра дилигди, вари адмийирин суд АпӀруриз Адаш кӀураш, му дюнʼяйиъ имиди Дугъхьан гучӀʼвал кади яшамиш йихьай.

¹⁸ Аьгъю йибхьайки, ичв абйирихьан дурубкьнайи гьаму файдасуз уьмриккан учву, гъизилна арсси чӀур дубхьну гъябгърубдихъ кьимат тувну гъадагъну азадвалиъ тӀаънадар,

¹⁹ хъа гьич саб жюрейин зиян, я скаш ктру ччилан ифдихъси, варитӀан багьа вуйи Месигьдин ифдихъ гъадагъну, азадвалиъ тӀаънайидар вучва.

²⁰ Иса, дюнʼя арайиз хайиз, учву бадали Кадагънайир вуйи, ва гьаму аьхиримжи йигъари Думу жилиина гъафну.

²¹ Учву Думу гъачӀидаригъян чӀиви гъапӀу ва Дугъаз ад туву Аллагьдихъ, Гьадгъулантина хъугъначва. Гьаци вуйиган, ичв хъугъвал ва миж Аллагьдиъ авучв.

²² Учвуз ичв хъугънайи гъардшар, жвув гьякьвалихъ хъебехъну марцц гъахьиган, кью-кьюб маш гъидривру масанвалиинди, марцци юкӀвариинди ва жандин вари кьувватниинди ккун гъахьунчвуз!

²³ Учвуз цӀийи уьмур тувру тум алаур йибкӀру тум даричв, аьхир, хъа – дирибкӀру тум. Думу тум чӀиви ва гьаммишандиз вуйи Аллагьдин Гаф ву.

²⁴ Гьаддиз Гирами китабариъ дупна: «Инсаният укӀси ву, дурарин усппагьивал – хутӀлин кюкюси. УкӀ ебццуру – кюкюра алдабхьуру.

²⁵ Агъайин гаф аьсрариан-аьсрариз гъубзра». Агъайин гьадму Гаф, учвуз гъурубкьу Ужувлан хабар ву!