Насигьятар 8 - Гирами Китаб

Аькьвлин тяриф

¹ Му Аькьвлин дих дайкӀан, ебхьурайиб дугъан фагьумлу сес дайкӀан?

² Тепейин кӀакӀниин рякъюхъ хъайи, рякъяр жара шлушвʼин думу дийигъна;

³ гимихъ дих апӀура, шагьризди учӀврушвахъ гьарай ипна:

⁴ – Учвуз, инсанар, дих апӀураза, йиз гьарай вари инсаниятдиз вуйиз!

⁵ Уьмрин тажруба цӀибди айидар, фагьум апӀуз дубгъай, абдлар, фикрихьди ацӀай!

⁶ Хъебехъай йиз чӀалнахъ заан, даршуз йиз ушвниин ализ дюзвал,

⁷ гьякьʼвал деебтура мелзну йиз, ва хявиди ву писвал йиз ушвниз.

⁸ Гьякьлу ву вари йиз улхбар, я иблисвал ктар дурарик, я алдатмишʼвал;

⁹ фикир айириз ачухъди ву вари дурар, хликк кка дурар агрударин аьгъювалар.

¹⁰ Йиз насигьят заанди бисай арстӀанна, аьгъювалар – зина ву багьа гъизилтӀанна.

¹¹ Даршуз аькьюл успагьиб ву, гьар рангнан багьа гъванартӀан, жвуваз ккуниб фукӀара дидихь ттевуз шулдар.

¹² Узу Аькьюл вуза. Узухъди хъа фагьум, узу гъадагъунза аьгъюваларна аьяндарвал.

¹³ РАББИЙИХЬАН гучӀ хьайивал – писвализ вуйи хъял ву. Къурзлувал ва кялхъюб, писвалин жилгъа ва кучӀлин ушвар, узуз дяркъну ккундар.

¹⁴ Узухь хьазухь теклиф, узухь хьазухь хъуркьувал, узу вуза фагьум, ва узухъди хъа кьувват.

¹⁵ Узʼинди паччагьвал апӀура паччгьари ва дюзвал дебккра гьюкумдрари;

¹⁶ узʼинди гъахура ляхнар регьбрари – аьхюдари ва вари жилин диванчйири.

¹⁷ Шлиз узу ккундуш, думу узузра ккундузуз, ва шли узу агураш – дихъиди.

¹⁸ Девлет ва ад – узухъди хъа – ккудудубкӀру арбабвал ва гьякьʼвал.

¹⁹ Ужудар ву йиз йимишар багьа гъизилтӀан, узу зина вуза марцци арстӀан.

²⁰ Узу гъягъюраза гьякьлу жилгъайиъди, дюзвалин рякъяр-хулариъ,

²¹ узу ккунидариз лайикь вуйибси тувуз ва дурарин хазнаханйир ацӀуз.

²² РАББИЙИ Чан жилгъайин эвел узу гъапӀну, вари Чан ляхнартӀанна улихьна, дегьзаманайианмина.

²³ Узу арайиз гъафунза вахтарин эвеларианмина, дегьзаманайианмина, дюнʼяйин бин ккиврайиган.

²⁴ Сифтейин кӀан адрушв хьайиз ва штарин булагъар арццайиз – узу гъахьунзу;

²⁵ мегьел дагълар ва тепйир дурснадайи – арайиз гъяйиз узу –

²⁶ мегьел Дугъу дапӀнадайи жилин яркьушнар, я жилин рюкъ – сабпи карккьан!

²⁷ Узу душвахь хьайза: Дугъу аьршар дюзмиш апӀурайиган; кӀан ккадрушван гъирагъ дебккрайиган;

²⁸ Дугъу зиин дифар дерккрайиган; кӀан ккадрушван булагъар мюгькам апӀурайиган;

²⁹ Дугъу, штарихьан улдучӀвуз даршлу гьюлин дарг дебккрайиган; жилин бин ккиврайиган –

³⁰ Дугъахъди устаси узура хъайза; Дугъан гьарйигъандин шадвал вуйза; сикин дарди Дугъан улихь шадвалиъ айза –

³¹ шадвалиъ айза дюнʼяйикан ва зурба шадвал ипнийза инсаниятдикан.

³² Хъа гьамус узухъ хъебехъай, жан веледар: хушбахтаврар ву йиз жилгъйирихъан хъичӀихнайидар!

³³ Хъебехъай насигьятнахъ – хьидичва аькьюл ади, думу нигь мапӀанай.

³⁴ Хушбахтавар ву узухъ хъпехъурайир, йиз урчӀарихъ йишв ва йигъ адапӀурайир, йиз раккнарилан ул алдадабгърайир.

³⁵ Узу чаз гъадагъури – гъадабгъну уьмур, ва РАББИ хьиди дугъʼин рази.

³⁶ Хъа узуз къаршу вуйири, апӀура чав учв пуч: узу даккун апӀрур аьжал ккун апӀрур ву.