Насигьятар 6 - Гирами Китаб

¹ Йиз бай! Эгер уву тмунурихъанди буржар тувуз гаф тувнаш, «Дугъхъанди пул тувурза» дупнаш, –

² жвуван хусуси гафнакк ккахъунву, жвуван хусуси гафну йисирвализ гъидисунву.

³ Гьамци апӀин, жан бай, ккудучӀв, фицики сарун уву жарарин гьюкмиъ ава: ликарикк ккархь, миннат апӀин, кьяляхъ миван,

⁴ хъутӀубкк нивкӀ жвувхъан, ул мииливан,

⁵ жвув уьрх, чахъ хъачӀарккнайи жейрандиси, учв бисурайирихьан – жакьвлиси.

⁶ Темпел! Гъарах зимзрахьна, дубгъ увуз дидхъан аькьюл:

⁷ алдар дидʼин я регьбер, я аьхюр, я гьюкумдар,

⁸ хъа диди хьадʼантӀан чаз хураг апӀура гьязур, игнарин вахтнара артухъ апӀура сурсатар.

⁹ Фукьан дахъну гъузру, я темпел, вахт дарин нивкӀʼан хъергуз?

¹⁰ Хъана цӀиб ахарва, улар мани апӀарва, хил хилʼин иливну хъана дусарва –

¹¹ ва гъибди увухьна касибвал, тӀафалси, аьжузвал гъибди тӀарашчиси.

¹² ЧӀурурин ва писурин кам шулдар кучӀал мелзналан:

¹³ дурари я улариинди, я ликариинди, я тӀубариинди кучӀлин ишарйир улупиди.

¹⁴ Дугъан кӀваъ харживал а, дугъан фикрариъ – чӀуру кьаст, варишвариъ дугъу ккергъру гъалмагъалар.

¹⁵ Мидин кӀуллан дугъак бала кубкӀди, йикӀиди хабарсузди, кьяляхъ дяргъруси.

¹⁶ Йирхьуб мутму РАББИЙИЗ дяркъну ккундар, ургубпибра ву Дугъаз хявишин:

¹⁷ кялхъру лигуб, мелз кучӀлин, тахсир ктру ифи удубзру хилар,

¹⁸ писвалин кьаст гьязур апӀурайи юкӀв, чӀуруб апӀуз тяди жаргъурайи ликар,

¹⁹ кучӀлин ил хътабгъурайи шагьид, ва чвйирин арайиъ гъярхьувалар урзру кас.

²⁰ Жан бай! Адашдин илим уьбх ва дадайин насигьят мапӀан нигь.

²¹ Гьарган дурар яв кӀваъди гъайих, жавагьирси гардандиъ ахь.

²² Гъягърур гьадрари хъади гъахидиву, дахъдива ахуз, гьадрари уьрхидиву, хъергиган, увухъди улхиди дурар.

²³ Даршуз табшуругъ – лампа ву, аьгъювалар – акв ву, хъа кьатӀʼи насигьят – уьмрин жилгъа.

²⁴ Дурари ккадаидиву намуссуз дишагьлийиккан, жарарин хпирин иблис гафариккан.

²⁵ Алдатмиш апӀуз мигъитан дугъан гюрчегʼвалихьди яв юкӀв, йисир махьан дугъан уччву лигбарин.

²⁶ Фицики лицру дишагьлийин кьимат – уьлин чӀилли чӀукӀ, хъа жарарин хпирихъанди вари уьмрин тувдива кьимат.

²⁷ ГъятӀнихъ цӀа гьитӀибкӀуз шулин, ва палатдик ктрабхъди гъубзрин?

²⁸ Аржлариинди гъягъюз шулин, ва ликар дурургди гъузрин?

²⁹ Гьаци ву гъягърурра хпирихьна жарарин: хьибдар жаза адарди дугъак куркӀуриз.

³⁰ Гашʼвалиан чаз ипӀуз гьитӀибкӀурикан, аьйиб апӀури шулдар;

³¹ хъа гъидисиш – ургубан артухъди зарал ккебкди, чан айи вари мутму тувди.

³² Жарарин хпирихъди шлуриз фикир гьубкӀрадар – гьязур апӀура дугъу хусуси аьжал чаз.

³³ Зийнар ва гьяясузвал ккилибгура дугъаз, ва аьйиб – марцц апӀуз даршлу.

³⁴ Фицики жилир ургура гъанихвалиан, ва дугъу язухъ зигидар хъял алдабгъру йигъан;

³⁵ ккадауз шлу гьич саб кьиматназра хьидар рази, фукьан багъишар туврушра, гъузди наразиди.