Насигьятар 4 - Гирами Китаб

¹ Жан баяр, насигьятарихъ адашдин хъебехъай, иб хъивай, фагьумлувалихьди юкӀвар ацӀай.

² Фицики узу учвуз ужуб улупуразачвуз, йиз теклиф ибак дарапӀди мигъибтанай.

³ Гъахьунзухъ адашна дада узухъра, узура гъахьунза дурариз айир сар, ккунир ва ктӀатӀарццрур.

⁴ Магьа фици адашди улупуйиш узуз: уьрх кӀваъ йиз гафар, тамам гъапӀиш табшуругъар йиз, хьидива яшамиш.

⁵ Гъазанмиш апӀин аькьюл, гъадагъ аьгъювалар, магьархан кӀваълан ва мапӀан тина гъапиб узу.

⁶ Мигъибтан аькьюл – диди уьрхидиву, ккун апӀин думу – дидира зигиди яв гъайгъу.

⁷ Фтиъ а эвел аькьвлин? Гъадабгъ аькьюл, уву фу уч апӀури гъашишра, уч апӀин фагьум.

⁸ Аьгъю апӀин кьимат аькьвлин – дидира заъди уву, адлу апӀиди уву, эгер хабаъ тӀапӀиш думу.

⁹ КӀулʼин иливидияв гизаф успагьи кунцӀ, хибди увуз думу крабчӀурайи таж.

¹⁰ Хъебехъ, жан бай, йиз гафар кьабул апӀин – ва ярхи хьиди йисар яв уьмрин.

¹¹ Жилгъа аькьвлин улупидизавуз, аъдизаву рякъюъ диш.

¹² Гъягъидива – лик улдубгидар, гъажаргъишра, уву алдакидар.

¹³ ХъичӀих му къайдйирихъан, магатӀахьан, уьрх дурар, фицики гьадрариъ а яв уьмур.

¹⁴ Гьякьсузарин рякъюъ лик мииван, пис ксарин жилгъайиъ маахъан:

¹⁵ дидиъди мягъян, хъадак душвхъан, ярхлаанси илтӀикӀ, гъарах жара рякъюъди.

¹⁶ Дурарихьан ахуз шулдар аьхир, писвал дарапӀиш, ул иливну ахидар, сар фужкӀа пуч дарапӀиш.

¹⁷ Фицики ацӀра дурар писвали, уьлиси, ва убхъура инсафсузвал, чяхирси.

¹⁸ Ужʼвал хрударин жилгъа – ву ахсрарин аквси, йигъ улубкьбахъ акутӀан аку шулайи.

¹⁹ Хъа гьякьсузарин жилгъа – мучӀушнаъ а, ва хабар адар дурариз, наан чиб алдакуруш.

²⁰ Жан бай, хъебехъ йиз гафарихъ, иб хъив дурарихъ.

²¹ Ваъ, ярхла даришри дурар увхьан, уьрх дурар, деринариъ яв кӀван.

²² Фицики йиз гафар гъидисуриз уьмур хьибди, дурари бедендиз сагъʼвалра хибди.

²³ Уьбх яв юкӀв варитӀан заанди, гьаз гъапиш думу булагъ ву уьмрин.

²⁴ Тина апӀин гафар кучӀлин, иблисвал ушвнихьан яв гьутӀубкк;

²⁵ гъит улар яв лигри дишди, хъа яв лигуб гьарган ачухъуб ибшри,

²⁶ ва ккив яв рякъ дюзди, ва вари жилгъйир яв гьякьлудар хьиди;

²⁷ я арччлахъинди, я гагвлахъинди миилтӀикӀан, кьяляхъ йихь писвалихьан.