Насигьятар 30 - Гирами Китаб

Агур пайгъамбрин мисалар

¹ Якейин бай, пайгъамбар Агурин гафар. Магьа мугъу Итиэлиз гъапидар, Итиэлиз ва Ухализ.

² ИкибаштӀан, вари инсанартӀан камир вуза ва адмивалин фагьум узуъ адар,

³ узу аькьюл гъудубгъур дарза ва гирами аьгъюваларик кайир дарза.

⁴ Фуж завʼина гъушну ва гъафну? Шилхьан дебккуз гъабхьну гъурдаъ микӀ? Шли гъюнарихъ хъипрубдигъян гъибиржну шид? Шли дерккну гъирагъар жилин? Дугъан ччвур фуж ву? Фуж ву ччвур дугъан балин? Увуз аьгъяйвуз?

⁵ Гьарсаб гаф марцциб ву Заанурин; Думу – Гъалхан ву, Чак миж кайириз.

⁶ Дугъан гафариин фукӀа мииливан, даршиш уву иливнайиб Дугъу ачухъ апӀиди, ва уву кучӀлар апӀуб аьгъю хьибди.

⁷ Кьюб мутму тӀалаб апӀураза Увкан, узуз ваъ макӀан узу чӀивидимиди:

⁸ ичӀи ва кучӀлин гаф ярхла апӀин узхьан, я касибвал, я девлет узуз мутуван, кадабтӀ узуз йиз пай уьлин кьацӀ;

⁹ ацӀиган, узу Уву ярхла дарапӀуз, дарпуз: «Хъа фуж ву думу – РАББИ?», вая, касиб гъахьиган, гьитӀитӀибкӀуз, кфир апӀури ччвур Заанурин йиз.

¹⁰ ЛукӀралан чӀуруб макӀан чан эйсийиз, даршиш кубкӀдивук лукӀран гъапӀу агь.

¹¹ А гьацдар, абйириз агьрар апӀури, бабариз ужʼвал ккун дарапӀди;

¹² а гьацдар, чпи марцциди гьисаб апӀури, аммаки чпин нежсихьан дижрикӀди;

¹³ а гьацдар, инсандиз заълансина лигрудар, лигбари инсан асккан апӀрудар;

¹⁴ а гьацдар, сппар – ханжларси, шархьлар – йикк убкрурин гаркӀларси, инсанарин арайиъ айи касибар итӀуз ва пай дурубкьдар дюнʼяйилан илдитуз ккунидар.

¹⁵ Кьюб бицӀи зили а – «ча! ча!» кӀурудар. Шубуб мутму гьич ацӀидар, ва юкьубпибдира «чӀяаьн!» пидар:

¹⁶ гъачӀидарин дюнʼя, бицӀир даршлу дишагьли, гьич затра штухьди адрабцӀру жил, ва зат «чӀяаьн!» даркӀру цӀа.

¹⁷ Эгер ул, кялхъруси чан адашдиз либгураш, ва чан дадара фужкӀа дарди гьисаб апӀураш – думу удубдиди дерейиъ хъюттари, итӀиди дицир люкьяри.

¹⁸ Шубуб мутмуйи узу гъах апӀуразу, ваъ, юкьубдин – узу гъавриъ адарза:

¹⁹ аьршариъ айи люкьран жилгъайин, гъарзарик кайи битӀран жилгъайин, гьюлин кьялаъ айи гимийин жилгъайин, шурахьна жилижвуван жилгъайин.

²⁰ Хъа чӀат ул айи дишагьлийин жилгъа гьамциб ву: дугъу ипӀиди, кӀвантӀар марцц апӀиди хъа пиди: «ФукӀара узу чӀуруб гъапӀундарза».

²¹ Шубуб мутмуйи гукӀни апӀура жил ва юкьубпибра дидхьан гьял апӀуз шуладар:

²² паччагь шуз хъюгъю лукӀ; ипӀрубдихьди фун абцӀу авам;

²³ швуваз гъушу чӀуру хасиятнан дишагьли; чан ханумдин йишв гъибису гъараваш дишагьли.

²⁴ Ал жилиин юкьуб бицӀи мутму, аммаки дурар аькьюл айидартӀан аькьюл айидар ву:

²⁵ зимзар – бицӀи халкьсиб, пузкьан кьувватлу даруб, хъа ипӀруб уч апӀура хьад кмиди;

²⁶ даманар – бицӀи халкьсиб, пузкьан мюгькам даруб, хъа мукьар апӀуру гъарзарин арйириъ;

²⁷ цицӀар, паччагь адру, аммаки сабхилди дурар гъедергуру;

²⁸ чурчул, хилиъ гъадабгъуз шлу, аммаки думу паччгьарин ужагъариъра шулу.

²⁹ Шубурин магьа, гъягъбан успагьи саягъ, ваъ, юкьурин – фукьан заанди ликар алдагърудар дарин:

³⁰ аслан – гьяйванатарин арайиъ гужли – саризра диди рякъ тувидар;

³¹ датт – пеэрин кӀулʼин; кьун – лижан улихь; паччагь – кьушмин кӀулиъ.

³² Эгер абдалвалиан уву яв тяриф гъапӀнуш, эгер чӀуруб апӀуз ният гъапӀнуш – хилин гагьнахьди яв ушв чӀюбкь,

³³ фицики хах гъутӀубччвган, шулайиб ву кӀаму, хъюхъниз гъивган, удубчӀвурайиб ифи ву, ва хъял адапӀган, арайиз гъюрайидар гъярхьувалар ву.