Насигьятар 3 - Гирами Китаб

¹ Йиз бай, адашдин илим магьархан, йиз насигьятар кӀваъ уьрх.

² Фицики миди ярхи апӀиди яв йисар-йигъар ва артухъ апӀидивуз ужувлар.

³ Гъит гьякьну ва рягьми уву гатӀатӀахьри: гавагьирарси яв гардандиъ ахь дурар, бикӀ яв кӀвак –

⁴ хъа хьибди увуз масанвал ва гьюрмат Заанурихьан ва адмийирихьан.

⁵ Вари юкӀв хъипну, РАББИЙИН ихтибарнаъ учӀв, жвуван хусуси фагьмиин хъугъʼвал мапӀан.

⁶ Фунуб жилгъайиъди гъярашра, РАББИ аьгъю апӀин, дюз алаиди Дугъу яв рякъяр.

⁷ Жвув аькьюл айирси, гьисаб мапӀан, гучӀ апӀин РАББИЙИХЬАН, йихь ярхла писвалихьан –

⁸ му хьибди сагъʼвал яв бедендиз, ва артухъ апӀиди кьувват яв кӀурбарин.

⁹ РАББИЙИЗ яв айибдикан тув, гьарсаб ляхнин сабпи бегьернаканра тув,

¹⁰ ва ацӀди ккунибдихьди яв танхар, таза чяхрихьди улдузури хьиди чяхир апӀрушвар.

¹¹ Насигьятар РАББИЙИН, йиз бай, нигь мапӀан, Дугъан кирчу тахсрарихьан мугьудучӀван.

¹² Фицики РАББИЙИ тахсир кипра Чав ккун дапӀнайирик, адашди кипруганси ккуни балик.

¹³ Бахтавар ву аькьвлин эйси гъашир ва фагьум гъазанмиш гъапӀур.

¹⁴ Аькьюл гъазанмиш апӀуб ужу ву арстӀан, даршуз думу багьа ву гъизилтӀан;

¹⁵ заан ву думу багьа гъванартӀан; жвуваз ккуниб фукӀара дидихь ттевуз шлуб дар.

¹⁶ Арччул хилиъ дидин уьмрин ярхи йисар а, хъа девлетна гьюрмат гагул хилиъ а.

¹⁷ Рякъяр дидин – рякъяр шадвалиндар ву, вари дидин жилгъйир хатӀасузвалиндар ву.

¹⁸ Дидик карснайириз думу уьмрин гьар ву, ва дидхьан жара даршлур хушбахтавар ву.

¹⁹ РАББИЙИ аькьвлихьди жилин бина ккивну, Чан фагьмихьди аьршар дерккну,

²⁰ штун деринар Дугъан аькьвли арццра, ва дифари чиг крубзура.

²¹ Жан бай, ваъ, гьитӀитӀибкӀри увхьан аьяндарвална ужувлан фикир ва гъит дурари уву уьрхри.

²² Дурари увуз уьмур тувди, адмийирин масанвал увуз жавагьирси хьибди.

²³ Гьадмуган хатӀасуз хьибди яв рякъ, ва алдакидарву.

²⁴ Дахъдива ахуз гучӀ дарди, ахидива – нивкӀра хьибди мегьел.

²⁵ ГучӀ мапӀан хабарсуз хатӀайихьан, ва гьякьсузариин алабхъру пучʼвалихьан;

²⁶ фицики РАББИ – яв терефнаъ а, Дугъу гъитдар ахъуз уву ичӀазди.

²⁷ Ужʼвал апӀбахьан мугьудучӀван, дидикк ул ккайидариз, эгер думу удубкьруб вуш яв хилʼан;

²⁸ увухьна гъафириз макӀан: «Гъарах, хъа гъидива, закур тувдизавуз» – эгер увуз тувуз аш ужуб.

²⁹ ЧӀуру кьаст мапӀан адмийиз – увʼин хъугъвал алириз.

³⁰ Дав гьюжатар мапӀан дарапӀурихъди увуз чӀуруб.

³¹ Инсафсузвал апӀурайириин бахил махьан ва рякъяр макадагъан дугъан,

³² фицики хявир ву чӀуру кьастар айир РАББИЙИЗ, хъа дюзвалиндар Дугъан хъугъвалиъ а.

³³ Гьякьсузрин хулариин ал РАББИЙИН агь, хъа гьякьлударин Дугъу ужувлакк ккапӀра ужагъ.

³⁴ Кялхърудариин Думу аьлхъиди, хъа фурс ктру ксариз бахш апӀура масанвал.

³⁵ Аькьюл айидари апӀиди гъазанмиш ад, хъа абдлар арсди аьйибнаъ.